ATSKA kutish qateqninkunata yuripunaq Jesusqa. Huk kutinäqa 500 qateqninkunash rikäyänaq, ¿imapitaraq parlapaq Jesús? Teyta Diospa reinompitash. Tsë reinopita nunakunata yachatsinampaqshi kë Patsamanqa Jehoväqa kachamushqa kanaq Jesusta. Wanushqakunapita sharkamurpis tsëtash rurëkan Jesusqa.

¿Ima Teyta Diospa reinon kanqanta yarpankiku? Ciëlochö rasumpëpa Diospa gobiernonshi, y reypaq Dios Akrashqanqa Jesusshi. ¡Rikanqantsiknöpis mallaqaqkunata qarar, qeshyaqkunata kachakätsir, y wanushqakunata kawaritsir alläpa alli rey kanantam Jesusqa rikätsimarqantsik!

Waranqa wata ciëlochö Jesús reinamuptenqa, ¿imaraq kë Patsachöqa pasanqa? Hinantin Patsash selläma shumaq huerta tikrarenqa. Mananash wanutsinakïkuna, qeshyakuna ni wanïpis kanqanatsu. Selläma shumaq huertachö llapan nunakuna täräyänampaq Patsata Dios rurashqa kaptinmi kënö nintsik. Tsëpaqshi Edén huertataqa ruranaq. Llapan Teyta Dios munanqantash ruramonqa Jesusqa.

Jesús ciëlota kutikunan tiemposh chäramushqa. Pë kawëkanqantaqa musyayanshi qateqninkuna 40 hunaq yuripuyashqa kaptin. Pero ‘espíritu santota chaskiyanqëkiyaq, quedakuyë kë Jerusalenchö,’ nishpash ninaq manaraq ewkurnin. Diospa kallpanshi tsë espíritu santoqa, Teyta Dios munanqanta qateqninkuna rurayänampaqshi viento pükaqnö yanapëkonqa. ‘Hinantin patsachömi qamkunaqa noqapita willapäkuyanki,’ nishpash Jesús usharinaq.

Tsëpitanash, espantëpaq pasëkunaq tsë llapanta parlar ushariptin. Këchö rikanqëkinöshi, ciëloman lloqar qallëkunaq. Pero mananash qateqninkuna rikäyänaqnatsu pukutë tsaparkuptin. Tsënöshi ciëlota ewkur Patsachö qateqninkunaman Jesús gobernar qallëkamunaq.