¿PIKUNARAQ kayan tsë warmiwan ishkë nunakunaqa? Jesuspa yanasan María Magdalena nishqanshi tsë warmiqa. Y nunakunaqa angelkunash kayan. Jesuspa cuerpon churayanqan panteonmanshi qawarëkan Marïaqa, ¡pero manash tsëchönatsu këkan ayaqa! ¿Piraq apakushqa? Mä rikärishun.

Tsëpitanash, ‘kima hunaqllatam kawariramushaq nerqam Jesusqa kawëkar. Panteonta täpëkatsi. Tsënöpam cuerponta qateqninkuna mana apakuyanqatsu, ¡kawariramushqam niyänanrëkur!,’ nishpa niyänaq sacerdötekuna Pilätota. Tsënash Pilätoqa, ‘soldädokunata kachayë,’ ninaq.

Pero Jesús wanonqan kima hunaqllatash, qoya qoya Jehoväpa angelnin yurirkur panteón llawiraq rumita kuyuratsinaq. Tsënash mantsakëwan kuyukuyampistsu soldädokunaqa. ¡Panteonman qawarkuyänampaqnash, Jesuspa cuerponqa kanaqnatsu! Tsënash sacerdötekunata willariyänaq wakin soldädokunaqa. ¿Y kë mana alli sacerdötekunaqa imataraq rurayan, musyankiku? ‘Punukäyanqäyaqmi qateqninkuna apakuyashqa,’ nishpa ulikurkur niyänampaqshi paguëkuyänaq.

Tsëyaqnash panteonman ëwar watukariyänaq Jesuspa yanasankuna. ¡Y manash kanaqtsu! Chipapaq röpashqa ishkë angelkunallash tsëchö këkäyänaq. ‘¿Imanirtaq ashiyanki Jesusta këchö?’ ‘Pëqa kawariramushqanam, hina hora ëwar qateqninkunata willëkuyë,’ nishpash niyänaq tsë angelkuna. Tsënash ëqillapa willakoq ëwarëkäyaptinna huk nuna nänichö harkäriyänaq. ¡Jesusshi! ‘Tsënash qatiyämaqnïkunata ëwar willëkuyë,’ ninaq.

Tsënash, ‘Jesustaqa kawëkaqtam rikäyarqö,’ nishpa warmikuna niyaptin qateqninkuna creiyantsu. ¡Y tsëshi panteonman ëqillapa ëwëkuyänaq Pëdrowan Juan y manash tariyantsu! Tsëpeq pëkuna kutikuyaptinnash María Magdalënaqa qepäkurinaq. Tsëshi panteón rurinta qawärir ishkë angelkunata rikëkunaq.

¿Imaraq pasarqan Jesuspa cuerponwan, musyankiku? Kikin Teyta Diosshi tsinkaratsishqa kanaq. Y manaraq wanur kanqantanötsu manash Jesustaqa Teyta Dios kawaritsimunaq. Angelkunapatanö mushoq espíritu cuerponshi qonaq. Tsëshi kawëkanqanta qateqninkuna musyayänampaq Jesusqa unë kanqan cuerponwan yuripunaq.