TIMOTEO shutiyoqshi këchö apóstol Pablowan këkaq jövenqa. Listra markachöshi familianwan täran Timotëoqa. Eunice ninshi mamampa shutenqa y Loida ninshi abuelïtampaqa.

Këwanqa kë Listra markaman kima kutinash shamun. Pablowan Bernabé willapäkur kë markachö qallayanqampitaqa huk watanönash pasarishqa. Kananqa amïgon Silas nishqanwanshi Pablo kutimushqa.

¿Imaraq Timotëota nerqa Pablo, musyankiku? ‘¿Sïlaswan y noqawan shamïta munankimantsuraq? Karu markakunachö nunakunata willaparchi yanapayämankiman,’ nishpash ninaq Pabloqa.

Tsënash Timotëoqa, ‘awmi,’ ‘allichi kanman,’ nishpa yaskirinaq. Tsënö, unëllatanash Pablowan y Sïlaswan familianta haqirïkur ewkunaq. Pero kë viajempita yachakunapaqqa, puntata rikärishun mä imash Pablota pasëkashqa. Damascoman nänichö Jesús yuriponqampitaqa 17 watanash pasarishqa.

¡Yarpë, Jesuspa qateqninkuna maqaqshi Damascoman Pabloqa shamushqa kanaq, pero kikimpis kananqa Jesuspa qateqninnash! Tsëpitanash, Pablota wanutsiyänampaq ashïkuyänaq chikeqninkuna, pero yanaqinkunash huk canastaman winarkur tsë markapa perqan hanampa yarparatsiyämunaq, tsënöpash yanapëkuyänaq safakunampaq.

Tsëpitanash, willapäkoq Antioquía nishqan markapa Pablo ewkunaq. Këchöshi Jesuspa qateqninkunata, puntata shutitsiyänaq cristianos nishpa. Kë Antioquía markapita patsëshi huk karu markata kachayänaq Pablotawan Bernabé nishqan yanaqinta. Tsënöshi Timoteo täranqan Listra markamampis chäyänaq.

Huk watanöna pasarishqanchönash, Listra markaman yapë kutirishqa kanaq Pablo. Kananqa Pablowan y Sïlaswanshi Timotëopis yarqurinaq, ¿mëtaraq ëwayarqa, musyankiku? Mäpata rikärishun yachakunapaq.

Puntatash, Iconio nishqan markata ëwayänaq, tsëpitanash Antioquía nishqan markata. Tsë markapitanash Troas nishqan markata heqariyänaq, tsëpitanash Filipos, Tesalónica y Berea nishqan markakunaman pasariyänaq. ¿Atenas markata rikankiku mäpachö? Tsëchöshi willapäkunaq Pabloqa. Tsëpitanash Corinto markachö huk wata y pullanyoq willapäkuyänaq. Ushayänampaqnash Éfeso markachö ichik karirnin Cesarea markaman barcowan kutikayämunaq, tsëpitanash Pablo posadakunan Antioquía markaman witsäyänaq.

Tsënöshi Timotëoqa mushoq congregacionkunata kichar y “alli willakïkunata” willapäkur Pablota yanapanaq karu markakunapa ëwar. Winarerqa, ¿Timotëonötsuraq qampis Teyta Diospa fiel servidornin kanki?