Unë tiempo pasanqanllatatsu manam Bibliaqa willamantsik, shamoq tiempokunachö pasanantawanmi willamantsik. Y tsë shamoq tiempokunachö pasanantaqa manam nunakuna musyayantsu. Tsëmi Teyta Diospita Biblia shamonqanta musyantsik. ¿Imaraq shamoq tiempokunapaqqa Biblia nimantsik?

Teyta Diospa hatun peleampaqmi parlan. Kë hatun peleanchöshi Teyta Diosqa llapan mana alli nunakunata, y Patsachö llapan mana allikunatapis ushakäratsimonqash, pero llapan sirveqninkunataqa tsapëkonqash. Tsënönash, nunakuna qeshyayänanta ni wanuyänanta mana permitenqanatsu Teyta Dios churashqan rey Jesucristoqa, y tsënöpash llapan Teyta Dios sirveq nunakunaqa kushi kushi kayanqa kë Patsachö.

¿Manaku kë Patsata selläma shumaq huertata Teyta Dios ruraramunanta musyarir kushikushwan? Pero kë shumaq huertachö kawëta munarqa, Teyta Diostam servishwan kë librontsik ushanan willakïchö yachakonqantsiknö. Tsëmi shamoq tiempokunapaq Biblia yachatsikonqanta leinëki kë PUWAQ kaq Parte nishqan willakïkunachö.