3 KAQ TAPUKÏ
¿Imanötaq teytäkunata parlapäman?
¿QAMQA IMATATAQ RURANKIMAN?
Këman pensari: mierculis tardim. 17 watayoq Guillermum tarëanta usharirnin, televisionta prendirir y kuyë sillonninman jitakärin kënö nir: “¡Kananqa jamarinä höranam!”.
Tsënam teytanqa piñashqa yëkurir kënö nin:
“¡Guillermu! ¿Manaku ima ruranëkipis kan? ¿Manaku tarëanwan wawqikita yanaparëkankiman? ¡Manam imëpis mandayanqaqta rurankitsu!”.
Guillermunam shimin rurinllachö kënö nir contestarin: “Qallëkamunkinam qamqa”.
Y teytannam mas witïkur kënö nin: “¿Ima nimarqunkim?”.
Guillermunam piñarnin, “manam” nin.
Papäninqa alläpa piñarmi kënö nin: “¡Ama noqataqa tsënö parlapämëtsu!”.
Guillermu karqa, ¿imataraq rurankiman karqan teytëkiwan mana pleytunëkipaq?
ALLEQRAQ PENSË
Cärruta manejar ëwëkaptiki päsi mana kaptinqa, ¿imataraq rurankiman? Juk nänitachi ashinkiman. Jina tsënöllam teytëkikunata shumaq parlapänëkipaqpis juk formakunata ashinëki.
TANTIYARINAPAQ:
Lidiam kënö nin: “Papänïwan parlëqa manam fäciltsu. Höraqa, parlapanqäpita unëtaran, ‘¿ima nimarqunkim?’ niman”.
LIDIAQA KIMA FORMAPAM CONTESTËTA PUËDIN
-
Qayapëpa.
Lidiam qayapëpa kënö nin: “¡Wiyamë! ¡Precisaqtam parlapëkaq!”.
-
Manana parlapëta.
Lidiaqa mananam tsë asuntupita teytanta parlapëta munannatsu.
-
Alli tiemputa shuyarëta.
Lidiaqa mas tardiraq parlapänampaq o qellqanampaqmi pensarin.
¿Mëqan kaqta ruranampaqraq Lidiata ninkiman?
KËMAN PENSË: Lidiapa teytanqa juk cösaskunaman yarpachakurninmi, parlapanqanta entiendishqatsu. Punta kaqta akraptinqa, itsa teytanqa entiendinqatsu imanir qayapëkanqanta, y Lidiata wiyanqanatsu. Jinamampis, tsënö parlaparqa teytanta mana respetëkanqantam rikëkätsinqa (Efesius 6:2). Qayapëpa parlapanqanqa manam teytampaq ni Lidiapaqpis allitsu.
Parlanëki fäcil mana kaptimpis, teytëkikunata juknöpa parlapëtaqa puëdinkim.
Ishkë kaqta ruranan mas fäcil kaptimpis, manam yachaq këtatsu rikätsikun. ¿Imanirtaq tsëta nintsik? Porqui problëmanta altsëta munarqa Lidiaqa papäninwanmi parlanan. Y papäninqa musyëtam wanan imapa pasëkanqanta yanapanampaq. Upälla kakïqa manam yanapakuntsu.
Peru kima kaqta rurarninqa, Lidiaqa manam permitintsu papäninwan parlananta ni imapis michänanta. Tsëpa rantinqa, mas tranquïlu kanqan höram tsë asuntupita parlapan. Y juk cartata teytampaq qellqarninqa, itsa mas alli sientikunqa.
Cartata qellqarninqa ima nita munanqantam mas cläru rikätsinqa. Y teytan leyirirninqa imapa pasëkanqantam entiendirinqa. Kima kaqta akraptinqa, Lidiapaq y papänimpaqpis mas allim kanqa. Y Biblia kënö ninqantam rurëkanqa: “Tsemi imanopapis allita rureta tïrashun shumaq pasacunantsicpaq” (Romänus 14:19).
¿Ima mastataq Lidia rurëta puëdin?
Juknöpapis parlapänampaq kaqta musyarqa këchö qellqari, jina imanö yarqunampaq kaqtapis.
CLÄRU PARLAKÏ
Yarpë: cläru mana parlapaptikiqa teytëkikunaqa juknöpam entiendiyanqa.
KËMAN PENSARI:
Teytëkikuna imanir piñashqa këkanqëkita tapuyäshuptiki, itsa kënö contestankiman: “Manam tsë asuntupita parlëta munätsu”.
Tsëqa itsa teytëkikuna kënö ninqëkita entiendiyanqa: “Manam teytäkunaman confiakütsu. Problëmäkunapitaqa amïgükunawanmi parlashaq”.
Alläpa problëmapa pasëkaptiki teytëki o mamëki yanapashïnikita procurëkaptin, itsa kënö nirinkiman: “Ama yarpachakïtsu, tsëtaqa kikïmi altsarishaq”.
-
¿Imatataq teytëkikuna ninqëkipita entiendiyanman?
-
¿Ima ninqëkiraq mas alliqa kanman?
Capaz këkunapis gustashunki
WAKIN JÖVINKUNA IMATA PENSAYANQAN
¿Imanötan teytäkunawan parläman?
Teytëkikunawan shumaq parlakunqëkiqa imëkachömi yanapashunki.
