Këman pensari: Sandrawan Pabluqa ishkë killapanam enamorädu kayan y llapan kawëninkunachö juntu kashqanönam sientikuyan. Llapan junaqkunam mensäjita mandanakuyan y telëfunupa parlayan, hasta juknin ima ninampaq kaqtam puntallapitana musyayan. Peru kananqa Pabluqa masmanmi chëta munan.

Pabluwan Sandraqa makillapitam tsarinakuyashqa y höra hörallam mutsanakuyashqa. Sandraqa manam masman chëta munantsu, jina manam noviunta oqrëta munantsu. Alläpa shumaq kanqanta y alläpa precisaq kanqantam noviunqa sientitsin. Sandram kënö pensan: “Imanö kaptimpis Pabluwanqa enamorädum këkäyä”.

Noviuyoq kanëkipaq edäyoqna karqa y Sandra pasëkanqampa pasarqa, ¿imataraq rurankiman?

Malograkunëkipaq kaqta musyëkarnin, juk altu sitiupita saltarirninqa alläpam sufrinkiman. Jina tsënöllam oqllanakï asuntupaq Dios mandakunqankunata mana wiyakurpis alläpa sufrinki (1 Tesalonicensis 4:3).

¿Imakunapitataq sufrinkiman mana wiyakurninqa? Bibliam kënö nin: “Pipis rakcha ruranakïman ishkirqa cuerpumpa contranmi jutsata rurarin” (1 Corintius 6:18, Traducción del Nuevo mundo). ¿Këwanqa ima nitataq munëkan?

 Manaraq casakurnin oqllanakushqa jövinkuna imapa pasayanqankunata alleq estudiarmi, yachaq nunakuna cuentata qokuyashqa këkunapa pasayanqanta:

• PËSAKUYAN. Cäsi llapan jövinkunam manaraq casakurnin piwampis oqllanakurirqa pësakuyan.

• YARPACHAKUYAN. Enamorädunwan oqllanakurirqa, “¿piwan masraq oqllanakushqa?” nirmi wakinkunaqa tapukuyan.

• LLAKIKUYAN. Mëtsikaq shipashkunam shumaq cuidaqninwan këta munayan y manam pëpita provechakoqwantsu. Y mëtsikaq chölukunanam gustayannatsu fäcil-lla oqllanakuriyanqan shipashkunataqa.

• Këpitaqa yachakuntsik këtam: manaraq casakurnin piwampis oqllanakur ruranakurqa, qampaq alläpa precisaq kaqtam o imanö kënikitam despreciëkankiman (Romänus 1:24). Cuerpïkiqa alläpa valoryoqmi. ¡Ama pitapis entreguëtsu!

Alleq tsarakï y manaraq casakurninqa ama piwampis oqllanakur ruranakïtsu (1 Tesalonicensis 4:3). Casakurirnam tsëtaqa rurëta puëdinki. Tsëchönam mana pësakushpa, mana yarpachakïpa y mana llakikïpa kushikïta puëdinki, porqui mana casakushpa oqllanakoqkunaqa mana alli sientikurllam kakuyan (Proverbius 7:22, 23; 1 Corintius 7:3).

• Rasumpa kuyashurnikiqa, ¿manatsuraq imëpis alli sientikunëkita munanman?

• Rasumpa alli kanëkita munarqa, ¿Dioswan amïgu kënikita ushakätseq rurëkunata ruranëkipaq mañashunkimantsuraq? (Hebrëus 13:4).