Wanunampaq ichikllana pishikaptinmi Jesus Pëdruwan, Santiäguwan, Juanwan y Andreswan parlarqan. Ushanan junaqkunachö këkämunanta willakurmi qateqninkunata alläpa precisaq tapukïta kënö tapurqan: “¿Pitaq wayinchö kaqkunata mikïnin höranchö qaranampaq patronnin churanqan llapanchö wiyakoq y yachëwan sirweq?” (Mateu 24:3, 45, NM; Marcus 13:3, 4). Kënö nirmi, patron Jesusqa nikarqan mikï cuenta Diospa yachatsikïninta ushanan tiempukunachö qateqninkunata qarëkänampaq juk grüpu nunakunata churanampaq kaqta. ¿Pikunataq kayan?

Jesuspa wallkaqlla akrashqa qateqninkunam kayan. Kë “sirweqqa” Jehoväpa Testïgunkunata Pushaqkunawan juknöllam kayan. Y höranchömi cristiänu mayinkunata mikï cuenta Diospa yachatsikïninta qaran. Pëkunapitam ‘miquita hörancho’ chaskintsik (Lücas 12:42).

Diospa markantam rikäyan (1 Timoteu 3:15). Jesusqa tsë sirweqkunatam atska trabäjuta qorqan Patsachö Jehoväpa markanta tukïnöpa rikäyänampaq, llapan kapunqankunata alli cuidayänampaq, wayin wayin yachatsikïta dirigiyänampaq y congregacionwan imanö yachatsikayämunampaqpis. Tsëmi ‘llapanchö wiyakoq y yachëwan sirweqqa’ necesitäyanqä mikï cuenta tukïläya publicacionkunatam qoyäman wayin wayin yachatsikuyänäpaq, jina reunionkunapaq y asamblëakunapaqmi tukïläya yachatsikïkunata ruramun.

Kë ‘sirweqqa’ llapanchö wiyakun, Biblia ninqanta rurar y wayin wayin yachatsikurmi, y yachëwanqa sirwin, entëru Patsachö Cristupa llapanninkunata shumaq rikarmi (Hëchus 10:42). Jehoväqa pëkuna rurayanqanta alläpam bendicikan mas cristiänukunata miratsirnin y mikï cuenta Diospa yachatsikïninkunata atskata qornin (Isaïas 60:22; 65:13).

• ¿Pitataq Jesus encargarqan mikï cuenta Diospa yachatsikïninta qateqninkunata qaranampaq?

• ¿Imakunachötaq kë ‘sirweqqa’ llapanchö wiyakun y yachëwan sirwin?