Kuyukïta mana puëdeq nunata kachakäratsirmi, Galilëa qocha kuchunchö këkaq Capernaum ëwëchö juk tiempupa Jesus quedakurqan. Yapëmi mëtsikaq nunakuna pë kaqman ëwayarqan, tsëmi pëkunata yachatsirqan. Tsëpitanam impuestu cobrakuyänan wayipa pasarqan y tsëchömi Levï nishpa reqiyanqan Mateu jutiyoq nuna këkarqan, pëtam Jesus kënö nirqan: “Qatimaqnï kë” (Mateu 9:9).

Tsë markachö Jesus ruranqanta y yachatsikunqantaqa Pëdru, Andres, Santiägu y Juannöchi Mateuqa alkäbu këkarqan. Qateqnin kanampaq Jesus niriptinqa, pëkunanöllam Mateupis raslla änirirqan. “Sharkurnin qatir qallëkurqan” nirmi kikimpaq willakur qellqarqan (Mateu 9:9). Tsënömi impuestu cobrakoq këta jaqirirqan y Jesuspa qateqnin tikrarirqan.

Tsëpitaqa itsachi qateqnin kanampaq Jesus qayanqampita agradecikurnin wayinchö juk jatun mikïta rurarqan. Jesusta, pëpa qateqninkunata, unë trabajaq mayinkunata y impuestu cobrakoq wakin nunakunatam invitarqan. Tsë nunakuna Röma gobiernu mañakunqan impuestuta cobrakuyaptinmi, judïukunaqa chikiyaq. Jina pëkunaqa tsë markaman chaq barcukunata, tröpëpa pureq nunakunata y juk nacionkunapita negociuta yëkatseqkunatam impuestuta cobrayaq. ¿Imanötaq impuestu cobrakoqkunata wakin judïukuna rikäyaq? Nunakunata engañarnin alläpata cobrayaptinmi, pëkunataqa despreciayaq. Jinamampis, tsë jatun mikïchöqa jutsasapa y jukwan jukwan purikoq reqishqa nunakuna y warmikunapis këkäyarqanmi (Lücas 7:37-39).

Tsënö nunakunawan mikïkaqta rikëkurmi, fariseukunaqa Jesuspa qateqninkunata kënö niyarqan: “¿Imanirtaq maestrïkikunaqa impuestu cobrakoqkunawan y jutsasapakunawan mikun?” (Mateu 9:11). Tsëta wiyarirmi Jesusqa kënö nirqan: “Sänu nunakunaqa manam doctorta wanayantsu, peru qeshyëkaqkunam sïqa. Tsëmi niyaq, ëwayë y yachakuyë kënö ninqan ima ninan kanqanta: ‘Ankupäkoq kayänëkitam munä, manam pishtashqa ofrendata qoyämänëkitatsu’. Porqui manam alli kaqta ruraqkunata qayaqtsu shamurqö, sinöqa jutsasapakunata qayaqmi” (Mateu 9:12, 13; Osëas 6:6). Jesusta ‘maestru’ nirpis, fariseukunaqa manam maestru kanqanta creiyaqtsu. Tsënö kaptimpis, Jesusqa alli kaqta rurëpitaqa imëkatam musyaq.

Itsachi Mateuqa impuestu cobrakoqkunata y jutsasapakunataqa invitarqan Jesusta wiyayänampaq y Dioswan amishtayänampaq (Marcus 2:15). Dioswan alli amïgu kayänampaqmi Jesusqa yanapëta munarqan. Manam fariseukunanötsu pëkunataqa despreciarqan, sinöqa alläpam ankuparqan. Imanömi qeshyëkaqkuna juk doctorman ëwayaq, tsënöllam Jesusmampis Diospa kaqchö alliyäyänampaq ëwëta puëdiyaq.

Impuestu cobrakoqkunapa y jutsasapakunapa mana alli rurëninkunataqa chikeqmi, peru pëkunataqa qeshyëkaqkunatanöllam Jesusqa alläpa ankupaq. Lepra qeshyayoqta kachakätsinqan nunatam, alläpa ankuparnin kuyëpa kënö nirqan: “¡Munämi kachakänëkita!” (Mateu 8:3). ¿Manatsuraq noqantsikpis yanapayänanta wanëkaqkunata y masqa, Diospa kaqchö wanaqkunata ankupar yanapashwan?