Yawar ëwëwan qeshyaq warmita Jesus kachakäratsishqa kanqantam Jairuqa rikärishqa karqan, tsëchi següru këkarqan, wamran wanushqana kanqanta pensarpis, Jesusqa yanapëta puëdinampaq kaqta (Mateu 9:18). ¿Puëdirqantsuraq Jairupa wamranta yanapëta?

Kachakätsinqan warmiwan Jesus parlëkaptinmi, Jairupa wayimpita juk ishkë nunakuna chäriyarqan y pëta kënö niyarqan: “¡Warmi wamrëkiqa wanurishqanam! ¿Imapaqnataq Maestruta afanakatsinki?” (Marcus 5:35).

Tsënö niriyaptinmi Jairuqa ni imanö këtapis musyarirqantsu. Tsë alläpa respetashqa nunaqa manam ima rurëtapis puëdirqantsu. ¡Japallan warmi wamranmi wanurishqa karqan! Jairuta tsënö nirishqa kayanqantaqa, Jesusqa wiyarishqam karqan, tsëmi kallpata qornin kënö nirqan: “Ama mantsakëtsu, markäkïnikilla katsun” (Marcus 5:36).

Tsënam Jairuwan wayinta Jesus ëwarqan. Chäriyänampaqqa, wayichöqa büllarmi këkäyarqan. Nunakunaqa waqarnin, qayarirnin y kikinkunata kutakurmi këkäyarqan. Wayiman yëkurirmi Jesusqa, “¿imanirtaq waqayanki y büllata rurayanki? Shipashqa manam wanushqatsu, sinöqa punïkanmi” nirqan (Marcus 5:39). Tsëta wiyarirmi, shipash wanushqa kanqanta musyaq nunakunaqa, pëpita burlakur qallëkuyarqan. Peru Jesusqa, pitapis punïkaptin riyarkatseqnölla Diospa poderninwan wanushqakunata kawaritsita puëdinqantam, ichikllachöna rikätsikunan karqan.

Jesusqa llapan nunakunatam waqtaman yarqaratsirqan, peru Pëdruta, Santiäguta, Juanta y warmi wamrapa teytanta y mamantaqa manam. Tsëpitanam warmi wamra këkanqanman pëkunawan ëwarqan y, wamrata makipita tsarirkurmi “‘Tal·i·tha cü·mi’ nirqan, tsëqa, ‘shipash, noqam neq: “¡Sharkï!”’ ninanmi” (Marcus 5:41). Tsëmi wamraqa jinan höra sharkaramurqan y purir qallëkurqan. ¡Jairuwan warminqa alläpachi kushikuyarqan! Tsëpitanam, rasumpa kawëkanqanta rikätsikïta munar, mikunampaq imallatapis qoyänampaq mandakurqan.

Juk kutikunachö kachakätsinqan nunakunata pitapis mana willakuyänampaq ninqannöllam, tsë wamrapa teytankunata pitapis mana willakuyänampaq nirqan. Tsënö kaptimpis, tsë pasakunqampaq willakuyanqanqa, “tsë kinrëchö llapan markakunaman y estanciakunamanmi” chärirqan (Mateu 9:26). Peru ¿piraq mana willakunmantsu kuyashqa kastan o amïgun kawariramuptinqa? Mateu, Marcus y Lücas qellqayanqanchö willakunqannöpis, tsëyaqqa ishkaqtanam Jesusqa kawaritsishqa karqan.