Jesusqa Diospita yachatsikurninmi Galilëachö alläpa ocupädu këkarqan, 32 wata Pascua fiesta chëkaptinnam, Diospa Leynin mandakunqannö Jerusalenman celebranampaq ëwëkarqan. Peru wanutsita munayaptinmi, cuidädulla ëwarqan (Juan 7:1). Tsëpitaqa Galilëatam kutikurqan.

Fariseukuna y wakin Ley qellqakuna Jerusalenta asheq ëwayaptinqa, Jesusqa itsa Capernaumchö këkarqan. ¿Imanirtaq Jerusalenyaq viajayarqan? Costumbrinkunata mana cäsukunqanta nirmi imëkanöpa Jesusta acusëta munayarqan. Tsëmi kënö tapuyarqan: “¿Imanirtaq qateqnikikunaqa unë witsan nunakunapa costumbrinkunata qatiyantsu? Këllata niriyashqëki, manam makinkunata paqakuyantsu mikuyänampaq” (Mateu 15:2). Peru Diosqa manam ni imëpis mandakushqatsu karqan “kukuchinkunayaq makinkunata” paqakuyänampaq (Marcus 7:3). Tsënö rurayanqan alläpa mana alli kanqantam fariseukunaqa pensayaq.

Jesusqa defendikunampa rantinmi, Diospa Leyninta ardëpa mana cäsukuyanqanta nirqan. “¿Imanirtaq qamkunaqa costumbrikikunata qatiyanqëkirëkur Dios mandakunqanta qatiyankitsu? Këllata niriyashqëki, Diosqa kënömi nirqan: ‘Teytëkitawan mamänikita precisaqpaq churar respetë’, y: ‘Pitapis teytampaq o mamampaq mana allita parlaqtaqa, wanutsiyätsun’. Peru qamkunaqa kënömi niyanki: ‘Pipis teytanta o mamanta, “qamta yanapanaqpaq kaq llapan kapamanqankunatam Diosta qarëtanö qoykurqö” neq kaqqa, mananam ni imanöpapis teytanta respetar yanapanannatsu’” (Mateu 15:3-6; Exodu 20:12; 21:17).

Qellëninkunata, chakrankunata y imëka kayäpunqanta Diospaq y templupaq qarë cuentata qoyaptinqa, ni imachöpis mana utilicëta puëdiyanqantam fariseukunaqa niyaq. Peru rasumpa kaqchöqa, tsëkunaqa duëñumpa makinllachöraqmi këkaq. Këllaman pensarishun, juk nunaqa qellënin y chakrankunaqa corban kanqantam neq, juk parlakïchöqa, Diospaq y templupaq qarë kanqanta. Tsëwanqa edäna y pishipakïkaq teytankunapita templu mas precisaq kanqantam rikätsikuyaq, y tsënöpam teytankunata cuidëpita libri quedariyaq. Peru kikinkuna wanarqa utilicëta puëdiyaqmi (Marcus 7:11).

Diospa Leyninta mana kaqpaq churayaptin piñakurninmi, Jesusqa kënö nirqan: “Tsënö nirmi qamkunaqa costumbrikikunarëkur Diospa palabranta mana kaqpaq churayarqunki. Ishkë qaqllakuna, rasumpa kaqtam Isaïasqa qamkunapaq kënö nir willakurqan: ‘Kë nunakunaqa shiminkunallawanmi respetayäman, peru shonqunkunaqa noqapita alläpa karuchömi këkan. Ardëllam adorayäman, porqui yachatsikïninkunaqa nunakunapa mandakïninkunallam kayan’”. Fariseukunaqa manam Jesusta contestëta puëdiyarqantsu. Peru Jesusqa kënömi nirqan: “Wiyayë y ima ninan kanqanta käyiyë: manam shimipa yëkoqtsu nunataqa rakchatan, sinöqa, shimipita yarqamoq kaqmi, tsëmi nunataqa rakchatan” (Mateu 15:6-11; Isaïas 29:13).

Juk wayichö këkarninnam, qateqninkunaqa Jesusta kënö tapuyarqan: “¿Cuentata qokurqunkiku ninqëkita wiyëkurnin fariseukuna ofendikuyanqanta?”. Tsëta contestarnam pëqa kënö nirqan: “Ciëluchö këkaq Teytä mana plantanqan kaq plantaqa, llupishqam kanqa. Jaqiriyë, wisku pushakoqkunam pëkunaqa kayan. Tsëmi, sitsun juk wisku juk wiskuta pushanqa, ishkanmi uchkuman jeqakurkuyanqa” (Mateu 15:12-14).

Tsëpitanam Pëdruqa nunakunata ima rakchatanqanta maslla entienditsikunampaq Jesusta mañarqan. Itsa tsërëkur Jesusqa kënö nirqan: “¿Manaku musyayanki shimipa yëkoqqa pachaman  chanqanta y desäwichö ushanqanta? Peru shimipita yarqamoqqa shonqupitam yarqamun, y tsëkunam nunataqa rakchatan. Këllata niriyashqëki, shonqupitam yarqamun alläpa mana alli pensëkuna, wanutsikïkuna, mana majanwan oqllanakïkuna, rakcha rurëkuna, suwakïkuna, mana rasun kaqta parlëkuna y ofendikïpa parlëkuna. Tsëkunam nunataqa rakchatan; peru makita mana paqakurnin mikïqa manam nunata rakchatantsu” (Mateu 15:17-20).

Tsënö ninqanwanqa, limpiu kë mana precisaq kanqampaqtsu manam Jesusqa parlëkarqan. Jina mikuyänampaq o mikïta rurayänampaq makinkunata mana paqakuyänampaqtsu manam nikarqan. Tsëpa rantinqa, ishkë qaqlla pushakoq religiösukunapa rurëninkunatam condenëkarqan, porqui pëkunaqa Dios mandakunqanta rurayänampa rantinmi, nunakunapa costumbrinkunallata qatiyaq. Awmi, shonquchö mana alli munëkunam nunataqa rakchatan.