Galilëachö sagrädu rurëninta ruranqanchöqa imëkatam Jesusqa rurarqan. Tsënö kaptimpis, “jina Diospa Gobiernumpita alli willakïkunataqa juk markakunachöpis willakunämi” nirqa, manam tsë provinciapa juk markankunachö yachatsikunanllapaqtsu parlëkarqan. Tsëmi Diospita yachatsikuyänan wayikunachö yachatsikurnin Judëapa ëwarqan (Lücas 4:43, 44). Tsëpaqa ëwarqan tamya pasariptin marzu killa ushë y abril qallanan killa Jerusalenchö Pascua fiesta ichikllachöna qallanan kaptinchi.

Mateu, Marcus, Juan y Lücas librukunaqa, Galilëachö sagrädu rurëninta ruranqampaqmi masqa willakun, peru Judëachö ruranqampaqqa wallkallatam. Itsachi Judëa marka nunakunaqa Jesusta allipatsu chaskiyarqan, tsënö kaptimpis, willakurnin y alli kaq rurëkunata rurarmi tsë provinciapa Jesusqa purirqan.

Tsëpitaqa 31 wata Pascua fiestata celebraqmi Judëapa precisaq markan Jerusalenman ëwarqan. Mëtsika nunakuna puriräyänan Üshakunapa Punkun nishqampa lädunchömi, columnakunayoq Betzäta jutiyoq juk kita kaq. Tsëmanmi mëtsikaq wiskukuna, cöjukuna y mas qeshyaqkuna ëwayaq, porqui yaku kuyunqan höra tsë kitaman yëkur kachakäyänampaq kaqtam creiyaq.

Säbadu junaqchö tsëpa pasëkarmi, Jesusqa 38 watapana juk qeshyëkaq nunata rikärirqan. Tsënam pëman witirir, “¿munankiku kachakëta?” nir tapurirqan. Tsë nunanam kënö nirqan: “Teytë, manam ni pïnïpis kantsu yaku kuyunqan höra kitaman yëkatsimänampaq, y ëwar nakëkaptïmi, manaraq chaptï jukna yëkurin” (Juan 5:6, 7).

Tsënam, “¡sharkï! Qopikita tsararkur, purï” nirqan tsë nunata. Tsëmi tsë nuna y wakin wiyëkaq nunakunapis Jesus tsënö ninqampita alläpa espantakuyarqan (Juan 5:8). Jinan höram tsë nunaqa kachakärirqan y Jesus mandanqannöllam qopinta tsararkur purir qallëkurqan.

Judïukuna tsë nunata rikärirqa, kushikuyänampa rantinmi alläpa piñashqa kënö niyarqan: “Kananqa Säbadum, y mana allitam rurëkanki qopikita puritsirnin”. Tsë nunanam kënö nirqan: “Kikin kachakätsimaqnïmi, ‘qopikita tsararkur, purï’ nimashqa” (Juan 5:10, 11). Tsë judïu nunakunaqa alläpa mana allitanömi rikäyaq säbadu junaqchö pitapis kachakätsitaqa.

“¿Pitaq ‘qopikita tsararkur purï’ nishoqniki nunaqa?” nirmi tapuyarqan. Peru tsëchö këkaq mëtsika nunakunapa rurimpa Jesus ëwakushqa kaptinmi, tsë nunaqa pï kachakätsishqa kanqanta musyarqantsu (Juan 5:12, 13). Mas tardimampanam Jesuswan templuchö yapë toparirqan, tsëchömi pï kanqanta musyarirqan.

Tsënam tsë nunaqa judïukunata ashirqan y qeshyampita Jesus kachakätsishqa kanqanta willarqan. Tsënam pëkunaqa Jesusta asheq ëwayarqan, peru manam tsë milagrukunata imanö ruranqanta tapuyänampaqtsu, sinöqa säbadu junaqchö milagrukunata imanir ruranqanta niyänampaqmi. Hasta qatikacharmi qallëkuyarqan.