Galilëa qochapa inti jeqanan kaq lädunmampa täraq judïukunaqa, Decäpolispita Jesus kutirinqantaqa musyariyarqanmi. Itsachi qochachö alläpa vientuta y laqcheqsaq yakuta päratsinqanta, y ishkë nunakunapita supëkunata qarqunqanta wakinkunaqa musyayarqan. Tsëchi “mëtsikaq nunakuna” qocha kuchunman Jesusta chaskeq ëwayarqan, itsapis Capernaum markapa amänunman (Marcus 5:21). Imata ruranampaq kaqtam llapankuna rikëta munayarqan.

Tsë nunakunachömi Jesusta rikëta alläpa munaq nunapis këkarqan. Jutinqa Jairum karqan y pëqa Diosta adorayänan wayita rikaqkunapitam karqan, itsapis Capernaumchö këkaq Diosta adorana wayita rikaq. Jesusta rikëkurqa, chakin kaqmanmi qonqurikïkurqan y kutin kutinmi kënö nir rogakurqan: “Warmi wamrallämi alläpa qeshyëkan. Shamïkullë y makikita pëman churëkullë kachakärinampaq y kawar sïguinampaq” (Marcus 5:23). ¿Imatataq Jesusqa rurarqan Jairupa 12 watayoqllaraq y alläpa kuyë wamranta kachakätsinampaq? (Lücas 8:42).

Jairupa wayintam ëwarqan. Jesuswan ëwaq nunakunaqa juk milagruta ruranampaq kaqta pensarninmi alläpa kushishqa këkäyarqan. Jina tsë nunakunachömi alläpa antsaq qeshyampita kachakëta munaq warmipis këkarqan.

Tsë warmiqa judïam karqan y 12 watapanam yawar ëwëwan qeshyëkarqan. Mëtsikaq doctorkunamanmi ëwashqa karqan y kachakëta munarmi imëkanta ushashqa karqan. Peru ichikllapis alliyänampa rantinmi, mas antsäkurkushqa karqan (Marcus 5:26).

Tsë qeshyaqa kallpannaqtachi tikraratseq. Jina mana allitachi sientikatseq y penqakatseqchi. Pipis tsë qeshyayoq karqa manachi pï mëtapis willakurtsu purinman. Jina Moises qellqanqan Leyqa, yawar ëwëwan kaq warmi limpiu mana kanqanta y wakin nunakunawan Diosta adorëta mana puëdinqantam neq. Tsëmi tsënö warmita yataq kaq o yawarllana röpanta tenqeq kaqqa, paqakunan kaq y tardiyanqanyaqmi limpiunötsu rikashqa kaq (Levïticu 15:25-27).

Tsë warmiqa Jesuspaq willakuyanqantam wiyashqa karqan. Peru ley ninqannö limpiu mana karmi, mana mäkutsikushllapa mëtsika nunakuna chowpinman yëkurirqan. Pëqa, “janan kaq röpanllatapis yatëkurninqa, kachakärishaqmi” nirmi pensëkarqan. Y Jesuspa röpampa kuchunta yatëkurqa, tsë höram yawar ëwënin tsakirirqan. ¡“Alläpa sufritseq” qeshyampitam kachakärishqa karqan! (Marcus 5:27-29).

Tsë höram Jesusqa, “¿pitaq yatamashqa?” nir tapukurqan. ¡Tsë höraqa imanöraq tsë warmiqa mantsakëkurqan! Tsënam Pëdruqa ardë tapukïkanqanta pensarnin, “Maestru, mëtsikaq nunakunataq jiruroqnikichö këkäyan y kichkipëkäyäshunki” nirqan. Peru ¿imanirtaq Jesusqa tsënö tapukurqan? Kikinmi kënö nirqan: “Pipis yatamashqam, porqui noqapita poder yarqoqtam mäkurqö” (Lücas 8:45, 46). Awmi, tsë warmiqa Jesuspa poderninwanmi kachakärishqa karqan.

Cuentata qokushqa kanqanta mäkurirmi, tsë warmiqa alläpa mantsakashqa y karkaryëkar Jesuspa nöpanman qonqurikïkurqan. Llapan nunakunapa jananchömi imapita qeshyashqa kanqanta y tsëllaraq kachakärishqa kanqanta willarqan. Tsënam Jesusqa shoqarnin kënö nirqan: “¡Hïja! Markäkïnikim kachakäratsishurqunki. Yamë ëwakï, y sufritsikoq qeshyëkipita kachakë” (Marcus 5:34).

Rikanqantsiknöpis, Patsata gobernamunampaq Diosnintsik akranqan Reyqa, alläpa kuyakoq y ankupäkoqmi. Jina alläpam nunakunaman yarpachakun y pëkunata yanapanampaqpis podernin kanmi.