Jesusqa jutsannaq y llapan cuerpunchö alli karmi, wakin nunakunanöqa imëkapaq yarpachakoqtsu. Tsënö kaptimpis, shonqupita patsëmi nunakunapaq yarpachakoq y imëkata rurar yanapanampaqmi listu këkarqan. Manam wanayanqanllachötsu yanaparqan, sinöqa tsëpitapis mastam rurarqan. Awmi, ankupäkoq karmi wakinkunata yanaparqan. Tsëta imanö ruranqantaqa kë willakïkunachömi tarinki: 32, 37, 57 y 99.

Precisaq tukoq mana kaptinmi, Jesusmanqa tukï edä nunakuna, jövin kar o mayorna karpis kushishqa witiyaq. Pëkunaman alläpa yarpachakunqanta rikarmi, Pëpa lädunchöqa kushishqa sientikuyaq. Yachanëpaq kanqanta imanö rikätsikunqantaqa kë willakïkunachömi tarinki: 25, 27 y 95.

Japallan këkar o Diosta adoraqkuna rikëkäyaptimpis, Jesusqa shonqupita patsëmi imëpis mañakoq. Më tsëchö këkarnimpis mañakoqmi, y manam mikunanllapaqtsu. Mañakïninkunachöqa Teytantam agradecikoq y alabaq, jina precisaq asuntukunata manaraq decidirninmi yanapanampaq mañakoq. Tsëta imanö ruranqantaqa kë willakïkunachömi tarinki: 24, 34, 91, 122 y 123.

Höra höraqa jamaritam Jesusqa wanaq, tsënö kaptimpis, wakinkunata yanapëta munarmi höraqa jamaqtsu. Manam kikinllamantsu yarparäkoq. Tsënö ruranqanta qatinapaqqa, alläpam precisan alli yachakunantsik. Tsëta imanö rikätsikunqantaqa kë willakïkunachömi tarinki: 19, 41 y 52.

Jesusqa manam wakinkunata perdonanapaq listu këkänallapaqtsu yachatsikurqan, sinöqa qateqninkunata y wakin nunakunata imanö tratanqanchömi tsëta rikätsikurqan. Tsëta imanö rikätsikunqantaqa kë willakïkunachömi tarinki: 26, 40, 64, 85 y 131.

Diospa musyatsikïninkunaqa rikätsikurqan, Diospa Akrashqanta cäsi llapan judïukuna mana chaskiyänampaq y wanutsiyänampaq kaqtam. Tsëta musyëkarpis, Jesusqa llapan puëdinqanmannömi Diosta adorayänampaq yanapakurqan. Tsëmi wiyamënintsikta mana munayaptin o contrantsik churakäyaptimpis, qateqninkunaqa Jesusnölla kallpachakunantsik. Tsëman yarpachakunapaqqa kë willakïkunam yanapamäshun: 16, 72 y 103.

Jesusqa, musyanqanchö, yachëninchö y maskunachömi jutsasapa nunakunapita mas alli karqan. Llapanchö alli kaptinmi, rurëta puëdinqanchö y pensanqanchöqa ni pï nunapis igualëta puëdirqantsu. Tsënö karpis, humildim karqan y wakinkunatam sirwirqan. Humildi kënimpitaqa kë willakïkunachömi yachakïta puëdintsik: 10, 62, 66, 94 y 116.

Apostolninkuna y juk nunakuna consejakunqanta mana cäsukuyaptin o ruranqannölla mana rurayaptimpis, Jesusqa manam piñakurqantsu. Pëqa pacienciakurmi, Jehoväman witiyänampaq yanapakoq yachatsikïkunata yapë yachatseq. Pacienciakoq kanqanta imanö rikätsikunqantaqa kë willakïkunachömi tarinki: 74, 98, 118 y 135.