Waränin junaqnam, domingu 9 de nisan, Jesuswan qateqninkuna Betaniapita Jerusalenman ëwar sïguiyarqan. Olïvus jirkachö Betfaguëman chäriyaptinmi, Jesusqa ishkë qateqninkunata kënö mandarqan:

“Ëwayë rikënikikunachö këkaq caserïuman, tsëchömi tariyanki watarëkaq china ashnuta, y lädunchö malta ashnu këkaqta. Tsëta paskarir noqaman apayämi. Y pipis imatapis niyäshuptikiqa, ‘Señormi wanan’ niyanki. Tsënam pëqa jinan höra apëkatsiyämushunki” (Mateu 21:2, 3).

Qateqninkunaqa manam tsë höraqa cuentata qokuyarqantsu, Jesus tsënö mandëkanqan Diospa juk musyatsikïninta cumplinampaq kaqta. Tsëpita tiempu pasarinqanchöran, Zacarïas qellqanqan tsëpin cumplikashqa kanqanta cuentata qokuriyarqan. Pëqa willakushqa karqan, Dios änikunqan ‘yachanëpaq geniuyoq’ Rey, china ashnupa “malta wawan ashnuta montashqa” Jerusalenman yëkunampaq kaqtam (Zacarïas 9:9).

Qateqninkuna Betfaguëman chärir china ashnutawan malta ashnuta paskëkäyaptinmi, tsëta rikaqkuna kënö niyarqan: “¿Imatataq rurëkäyanki tsë malta ashnuta paskarnin?” (Marcus 11:5). Señorpaq apëkäyanqanta niriyaptinmi, pëkunaqa apayänanta jaqiriyarqan. Qateqninkunanam janan kaq röpankunawan tsë ishkan ashnukunata karunayarqan, y Jesusnam malta kaqpa jananman montarqan.

Jerusalenman Jesus yëkïkaptinnam, mas nunakunawan toparkurqan. Mëtsikaqmi janan kaq röpankunata, y wakinna montikunapa rämankunata näniman mashtayarqan. Y kënömi niyarqan: “¡Salvëkullë, rogakulläyaqmi! ¡Bendicishqam Jehoväpa jutinchö shamoq kaqqa! ¡Bendicishqam teytantsik Davidpa shamoq Gobiernun!” (Marcus 11:8-10). Tsëta wiyëkurnam fariseukunaqa alläpa piñakurnin Jesusta kënö niyarqan: “Maestru, qateqnikikunata piñapë”. Pënam, “këtam niyaq, sitsun pëkuna upälla kakuyanman, tsëqa rumikunam sinchipa parlayanman” nir contestarqan (Lücas 19:39, 40).

Jerusalenta rikëkurmi, Jesusqa kënö nir waqar qallëkurqan: “Sitsun qam, kikiki, kanan junaq cuentata qokunkiman karqan yamë këta ima qoshunëkipaq kaqta..., peru kananqa nawikipita pakashqanam tsëkuna këkan”. Mana wiyakoq kayanqampitam ushakäyänan karqan. Jesusmi kënö nirqan: “Chikiyäshoqnikikuna puntash shukshukunata jawir jiruroqnikipa cercuta rurayämunan junaqkunam chämunqa, y jirurüriyäshunkim y llapan lädïkikunapam cercuta sharkatsiyämunqa. Pëkunam patsaman jitariyäshunki, qamta y qamchö këkaq wamrëkikunata, y qamchö perqarëkaq rumikunataqa manam ni jukllëllatapis mana juchutsishqataqa jaqiriyanqatsu” (Lücas 19:42-44). Jesus tsënö ninqanqa 70 watachö Jerusalenta ushakäratsiyaptinmi cumplikärirqan.

Jerusalenman Jesus yëkuriptinmi, nunakuna büllar qallëkuyarqan, y kënö niyarqan: “¿Pitaq këqa?”. Wakinnam, “¡këqa Galilëa provinciachö këkaq Nazaretpita Diospa willakoqnin Jesusmi!” niyarqan (Mateu 21:10, 11). Läzaruta Jesus kawaritsinqanta rikaqkunam, wakinkunata tsëta willar qallëkuyarqan. Peru fariseukunaqa alläpam piñakuyarqan, porqui manam ni imatapis lograyarqantsu. Tsëmi kikinkunapura kënö ninakuyarqan: “¡Rikäyë! Llapan nunakunam pëpa qepanta ëwakuyashqa” (Juan 12:18, 19).

Jerusalenchö këkar imëpis ruranqannöllam, Jesusqa templuta yachatsikoq ëwarqan. Tsëchömi wiskukunata y cöjukunata kachakätsirqan. Wamrakunam, “¡rogakulläyaqmi, Davidpa Tsurinta salvëkullë!” nikäyarqan, tsëta wiyëkurmi  precisaq sacerdötikunawan Ley qellqaqkunaqa alläpa piñakuyarqan. Tsëmi Jesusta kënö niyarqan: “¿Wiyankiku këkuna ima nikäyanqanta?”. Pënam kënö contestarqan: “¿Qamkunaqa manaku ni imëpis leyiyashqanki kënö neqta: ‘Pishi wamrakunapa y llullu wamrakunapa shiminkuna alabayäshunëkipaqmi rurarqunki’?” (Mateu 21:15, 16).

Templuchö ima pasakïkanqantam Jesusqa rikärirqan. Peru tardina kaptinmi, apostolninkunawan ewkurqan. 10 de nisan manaraq qallaptinmi, Betaniaman kutirqan y tsëchömi domingu ampi quedakurqan.