Jesusqa kawariramurmi 11 apostolninkunata, pëwan juntakäyänampaq Galilëa provinciapa juk jirkaman witsäyänampaq nirqan. Tsëchömi pitsqa pachaknö qateqninkunapis këkäyarqan. Wakinqa manaran creiyarqanraqtsu Jesus kawarishqa kanqanta, peru tsëpita Jesus ninqanmi pëkunata chipyëpa creiratsirqan (Mateu 28:17; 1 Corintius 15:6).

Ciëluchö y Patsachö autoridäyoq kanampaq Diosnintsik cargun qonqanta nirirmi, Jesusqa pëkunata kënö mandarqan: “Ëwayë y qatimaqnïkuna tikrayänampaq llapan nacionkunapita nunakunata yachatsiyë, Teytapa, Tsuripa y santu espïritupa jutinchö bautizatsirnin, y llapan mandayanqaqkunata wiyakuyänampaq yachatsirnin” (Mateu 28:18-20). Pë kawëkanqan y Diospa Gobiernumpita alli willakïta yachatsikur sïguiyänanta munanqanqa clärum këkarqan.

Jesusqa llapan qateqninkunatam, ollqukunata, warmikunata y wamrakunatapis nunakunata Diospita yachatsiyänampaq carguta qoshqa. Chikeqninkunaqa tsëta rurayänantam michäkïta tïrayänan karqan, peru Jesusqa kënömi nirqan: “Diosmi ciëluchö y patsachö imëkata rikänäpaq autoridänï qomashqa”. ¿Ima nitataq munëkarqan? Kënömi nirqan: “¡Rikäyë!, llapan junaqkunam qamkunawan këkäshaq imëkapis imanö këkanqampa ushëninyaq”. Manam alli willakïkunata llapan willakoqkuna milagrukunata rurayänampaq kaqtatsu Jesusqa nikarqan. Peru santu espïritupa yanapakïnintaqa llapanmi chaskiyänan karqan.

“Chusku chunka (40) junaqpam” Jesusqa qateqninkunata yuripushqa karqan. Jinamampis, tukïläya nunakunanö yuripurninmi ‘atska cläru pruëbakunawan rikätsikurqan’ kawarimushqa kanqanta y “Diospa Gobiernumpitam pëkunata parlaparqan” (Hëchus 1:3; 1 Corintius 15:7).

Galilëallachöraq apostolkuna këkäyaptintsunchi Jesusqa Jerusalenta ëwayänampaq nirqan. Y pëkunawan tsëchö juntakärirmi kënö nirqan: “Ama Jerusalenpita ëwakuyëtsu, sinöqa, noqa willayanqaqta, awmi, Teyta änikunqanta shuyarnin sïguiyë; porqui rasumpa kaqchöqa, Juanqa yakuchömi bautizarqan, peru qamkunaqa, kanampita wallka junaqkunallachönam santu espïrituwan bautizashqa kayanki” (Hëchus 1:4, 5).

Tsëpitanam Jesusqa apostolninkunawan yapë juntakärirqan. Tsënam “waqtaman aparqan, hasta Betaniayaq”, tsë markaqa Olïvus jirkapa inti yarqamunan lädumampam këkan (Lücas 24:50). Ciëluta ëwakunampaq kaqta Jesus willëkaptimpis, pëkunaqa Gobiernun kë Patsachö patsakänampaq kaqtaran pensëkäyarqan (Lücas 22:16, 18, 30; Juan 14:2, 3).

Tsëmi apostolkunaqa kënö tapuyarqan: “Teytë, ¿kanan witsanku Israelpa gobiernunta yapë patsëkätsinki?”. Pënam kënö nirqan: “Qamkunapaqqa manam precisantsu Teyta kikimpa autoridäninman churanqan tiempukunata o señalashqa junaqkunata musyayänëki”. Tsëpitanam yachatsikur sïguiyänampaq parlar yapë kënö nirqan: “Qamkunaman santu espïritu shamuptinmi poderta chaskiyanki, y noqapita musyatsikoq testïgum kayanki Jerusalenchö, entëru Judëa provinciachö, Samariachö, y patsapa mas karu kuchunyaq” (Hëchus 1:6-8).

Olïvus jirkallachöraq apostolkuna këkäyaptinmi Jesusqa illaqpita ciëluman ëwar qallëkurqan. Jinan höram pukutë tsaparirqan. Pëqa kawarimunqampita patsëmi qateqninkunata tukïläya nunaman tikrar yuripushqa karqan. Peru ciëluman ëwakurqa, espïrituman tikrarirmi ëwakurqan (1 Corintius 15:44, 50; 1 Pëdru 3:18). Jesus ëwakoqta apostolkuna rikarëkäyaptinmi, “yulaq röpashqa ishkaq nunakuna” lädunkunaman yuririyarqan. Pëkunaqa nunaman tikrashqa angelkunam kayarqan, y pëkunatam kënö tapuyarqan:  “Galilëa nunakuna, ¿imanirtaq ciëluman rikarar shëkäyanki? Qamkunapita ciëluman apashqa Jesusqa, ciëluman ëwakoqta rikäyanqëkinöllam shamunqa” (Hëchus 1:10, 11).

Jesus ëwakoqtaqa manam pï mëtsu rikäyarqan. Mana jaqipa qateqninkunallam ciëluman ëwakoqtaqa rikäyarqan. Y kutimoqtapis manam pï mëtsu rikanqa. Qateqninkunallam Reynö këkämunqantaqa cuentata qokuyanqa.

Tsëpitanam apostolkunaqa Jerusalenman kutiyarqan y Jesuspa wakin qateqninkunawanmi waränin junaqkuna juntakäyarqan. Tsëchömi “Jesuspa mamänin Marïa, y Jesuspa wawqinkuna këkäyarqan” (Hëchus 1:14). Llapankunam mana jaqipa mañakuyarqan. Jüdas Iscariötipa rantin jukta akrayänampaqpis mañakïkäyarqanmi, tsënöpa puntatanölla 12 apostolkuna yapë kayänampaq (Mateu 19:28). Pëkunaqa Jesus ruranqankunata y kawarimushqanta rikaq nuna kanantam munayarqan. Tsëmi Diosnintsik pita akranqanta musyayänampaq sortiyayarqan. Bibliachöqa tsë kutillanam willakun tsënö rurayanqanta (Salmus 109:8; Proverbius 16:33). Sortiyayanqanchöqa Matïasmi akrashqa yarqurirqan, pëqa itsapis 70 qateqninkunata yachatsikuyänampaq Jesus kachanqanchö këkarqan. Tsëpita patsëmi pëqa “chunka juk (11) apostolkunawan juntu yupashqa karqan” (Hëchus 1:26).

Ciëluta Jesus ëwakunqampita chunka junaqkuna pasariptinmi, judïukunaqa 33 wata Pentecostes fiestata celebrëkäyarqan. Tsë kutim Jesuspa 120 qateqninkunaqa Jerusalenchö juk wayipa altus cuartunchö juntarëkäyarqan. Tsëchö këkäyaptinmi illaqpita imëka shukukï vientu büllaqnöraq wayi junta wiyakärirqan. Y cada ünupa janankunaman qallunö ninakuna churakaqtam rikäriyarqan. Tsëmi tsëchö këkaqkunaqa tukï idiömakunachö parlar qallëkuyarqan. Tsënömi santu espïrituta pëkunaman ramanampaq kaqta änikunqanta Jesus cumplirirqan (Juan 14:26).