Bautizakuriptinlla y yachatsikurpis manaraq qallaptinmi Diabluqa Jesusta tentëta munarqan, peru pëqa alleqmi tsarakurqan. Atska kutim tentëta munarqan, tsëmi pëqa Diablupaq parlarnin kënö nirqan: “Porqui mana cäsukoq nunakunapa gobernaqninmi shamun, y pëqa manam noqata dominamëta puëdintsu” (Juan 14:30).

Apostol Juanqa juk suëñïninchönömi rikarqan ‘mantsanëpaq jatun culebrata’ ima pasanampaq kaqta, tsëqa ‘unë kaq culebra, Diablu y Satanas jutiyoqmi’. Awmi, nunakunata alläpa chikeq Diabluqa patsamanmi qarpushqa kanan karqan y “alläpa piñashqam” këkänan karqan, ‘wallka tiempullachöna’ ushakänampaq kaqta musyar (Revelacion 12:9, 12). Llapan cristiänunam alleq musyantsik tsë “wallka tiempullana” pishinqan witsanchö kawëkanqantsikta, jina ichikllachöna “mantsanëpaq jatun culebrata” ushakätsiyänampaq y jatun uchkuman llawiyänampaq kaqtapis. Y tsëchömi waranqa watapa imatapis mana rurashpa llawiranqa, y Jesusnam tsë watakunapa Diospa Gobiernunchö gobernanqa (Revelacion 20:1, 2).

¿Imaraq pasakunqa tsë waranqa watakuna täranqantsik Patsachö? ¿Pikunaraq tsëchö täräyanqa y imanöraq kawë kanqa? Tsëtaqa Jesusmi musyatsikurqan. Üshakunapaqwan chiwakunapaq parlar igualatsikïchömi, rikätsikurqan Jesuspa wawqinkunata shumaq trataq y pëkunata yanapaq üshanö kaq nunakuna shamoq tiempuchö imata chaskiyänampaq kaqta. Jina chiwanö kaq mana cäsukoq nunakuna imachö ushayänampaq kaqtam cläru rikätsikurqan. Kënömi nirqan: “Pëkunam chipyëpa ushakëman ëwayanqa, peru alli kaqta ruraqkunanam, imëyaqpis kawëman” (Mateu 25:46).

 Tsëwanmi lädunchö këkaq ladronta Jesus ninqanta maslla entiendirintsik. Mana jaqeq apostolninkunata äninqampitaqa, alläpa jukläyam tsë nunata äninqanqa karqan. Apostolkunataqa pëwan ciëluchö kayänampaqmi nirqan, peru tsë ladrontaqa këtam änirqan: “Rasuntam kanan neq, noqawanmi Shumaq Patsachö kanki” (Lücas 23:43). Tsënö nirmi Jesusqa tsë nunata Shumaq Patsachö kawanampaq änikarqan, tsëqa juk shumaq huertanömi kanqa. Jina tsë Shumaq Patsachömi, üshatanö akranqan nunakunapis “imëyaqpis kawakïta” puëdiyanqa.

Tsëqa, Shumaq Patsachö kawë imanö kanampaq kaqta apostol Juan ninqannöllam karqan. Pëmi kënö qellqarqan: “Diospa carpa wayinmi nunakunawan këkan, pëmi pëkunawan täranqa, y pëkunam markan kayanqa. Y kikin Diosmi pëkunawan këkanqa. Y nawinkunapitam llapan weqita pitsanqa, y wanïqa mananam masqa kanqanatsu, ni manam alläpa llakikï ni waqakï ni nanatsikï kanqanatsu. Unë kaq cösaskunaqa pasarishqanam” (Revelacion 21:3, 4).

Jesus parlapanqan juknin kaq suwakoq nuna Shumaq Patsachö kanampaqqa, kawarimunanraqmi. Peru manam pëllatsu kawarimunqa, porqui Jesusmi kënö änikurqan: “Chëkämunnam höra, y sepultürakunachö llapan këkaqkunam qayakunqanta wiyayanqa y yarqayämunqa, alli kaqkunata rurashqa kaqkunaqa kawayänampaqmi kawariyämunqa, y chipyëpa mana allikunata rurashqa kaqkunaqa, juzgashqa kayänampaqmi kawariyämunqa” (Juan 5:28, 29).

Peru, ¿imataraq ciëluchö rurayanqa Jesuspa apostolninkuna y wakin ciëlupaq akrashqa ichik grüpu nunakuna? Bibliam kënö nin: “Diospa y Cristupa sacerdötinkunam kayanqa, y pëwanmi waranqa (1.000) watapa gobernayanqa” (Revelacion 20:6). Jesuswan ciëluchö gobernaqkunaqa Patsachö kawashqa ollqukuna y warmikunam kayan. Tsëmi imanö kanqantsikta musyarnin alläpa ankupämäshun y entiendimäshun (Revelacion 5:10).

Jesus wanunqanrëkurmi kë Patsachö kawaqkunaqa jutsapita y sufrimientukunapita libri quedariyanqa. Jinamampis, Jesuswan ciëluchö gobernaqkunaqa kë Patsachö Diosta sirweq nunakuna jutsannaq tikrayänampaqmi yanapakuyanqa. Awmi, Adantawan Ëvata Diosnintsik äninqannöllam llapan nunakunapis kawayanqa, wamrayoq kayanqa y atskaqyäyanqa. Y Adan jutsata ruranqanrëkur wanï shamunqampis manam kanqanatsu.

Tsënömi Jesusqa Teytan Jehovä llapan mandanqanta cumplirinqa. Y waranqa watapa gobernarirninmi jutsannaq nunakunata Teytampa makinman churarinqa. Tsëta rurarmi humildi kanqanta rikätsikunqa, tsëmi apostol Pablupis kënö qellqarqan: “Llapan imëkakunapis pëpa autoridäninman churashqa kariptinqa, tsëqa, kikin Tsuripis autoridäninman llapan imëkakunata churaq Kaqpa autoridäninchömi kanqa, tsënöpa Diosllana llapampa Gobernaqnin kanampaq” (1 Corintius 15:28).

Awmi, Jehovä änikunqankuna cumplikänampaqqa juk precisaq carguyoq Jesus kanqantam rikantsik. Y tiempu pasanqanmannömi Jehovä änikunqankunaqa cumplikar sïguinqa y Jesusqa “näni, rasumpa kaq y kawë” kanqantam imëpis rikätsikunqa (Juan 14:6).