Fariseupa wayinchö mikïkarmi, Jesusqa alläpa precisaq yachatsikïta tsëllaraq yachatsikurishqa karqan. Tsëpitaqa, Jerusalenmanmi ëwar sïguirqan y mëtsika nunakunam yanaqäyarqan. ¿Imanir? ¿Rasumpatsuraq qateqninkuna këta munayarqan imata rurayänan kaptimpis?

Ëwarëkarmi, “pipis noqaman shamoq kaq, y teytanta y mamanta y warminta y wamrankunata y wawqinkunata y paninkunata, awmi, hasta kikimpa kawënintapis mana chikeqqa, manam qatimaqnï këta puëdintsu” nirqan, y tsënö ninqampitaqa itsachi wakinkunaqa espantakuyarqan (Lücas 14:26). ¿Ima nitataq munëkarqan?

Manam kastankunata rasumpa chikiyänampaq kaqtatsu qateqninkunataqa nikarqan. Sinöqa kastankunapitapis pëta mas kuyayänampaq kaqtam nikarqan. Manam churanqan igualatsikïchö tsëllaraq casakurishqa karnin invitayanqan mikïman mana ëwaq nunanötsu kayänan karqan (Lücas 14:20). Bibliaqa willakun pëkunapa unë kastankuna Jacobqa, warmin Leata chikinqanta y juknin warmin Raquelta kuyanqantam. Tsënö nirqa, Leata manam rasumpa chikinqantatsu nikarqan, sinöqa mana alläpa kuyanqanllatam (Genesis 29:31).

Jina Jesusqa, rasumpa kaq qateqninqa “kikimpa kawënintapis” chikinampaq kaqtam nishqa karqan, juk parlakïchöqa, Jesustam kawënimpitapis mas kuyanan karqan. Jesusrëkur wanunampaqpis listum këkänan karqan. Awmi, Cristupa qateqnin këtaqa manam pöcu cäsullapaqtsu pipis churarinman. Jina manam rasllatsu decidirinman, sinöqa alliran yarpachakunan.

Jina Jesuspa qateqninkunaqa itsachi mana allikunapa pasayänan karqan y chikirpis sufritsiyänan karqan, tsëmi Jesusqa kënö nirqan: “Sufritsikoq qerunta mana apaq kaq y qepäta mana shamoq kaqqa, manam qatimaqnï këta puëdintsu” (Lücas 14:27). Tsëmi rasumpa kaq qateqninqa pënö sufrinampaq listu këkänan. Kikin Jesuspis chikeqninkunapa makinchö wanunampaq kaqtam nishqa karqan.

Tsëmi pëwan ëwëkaq nunakunaqa, alliraq pensayänan karqan qateqnin këta munarqa. Tsëta rikätsikurmi Jesusqa kë igualatsikïta churarqan: “¿Mëqëkitaq juk törrita sharkatsita munarqa puntataqa mana täkurintsu, y ushatsinampaq ëkata gastanampaq kaqta y tinkunqanta o mana tinkunqantaraq rikantsu? Tsëta mana rurarqa, cimientutaqa rurarinmanmi, peru manam ushatsita puëdinqatsu” (Lücas 14:28, 29). Tsëmi pëwan ëwëkaqkunaqa, Jesuspa qateqninkuna manaraq tikrar, listu këkäyänan karqan imatapis jaqiriyänampaq. Tsëta maslla entienditsikunampaqmi juk igualatsikï masta churarqan.

Kënömi nirqan: “¿O mëqan reytaq juk reypa contran guërraman ëwarqa puntata mana täkurintsu, y consejaqninkunawanraq rikäriyantsu  chunka waranqa (10.000) soldädukunawan, contran ishkë chunka waranqa (20.000) soldädukunawan shamoq kaqta vencita puëdinampaq o mana puëdinampaq kaqta? Rasumpa kaqchöqa, mana puëdinampaq kaqta rikarqa, contran shamoq karullachöraq këkaptinmi, juk comisionta kachan yamë këta ashiyänampaq”. ¿Imatataq Jesus yachatsikïta munarqan? Kikinmi kënö nirqan: “Jina tsënölla qamkunapis këta alleq musyayë, manam qamkunapita ni pipis imëkankunata mana jaqirqa qatimaqnï këta puëdintsu” (Lücas 14:31-33).

Jesus tsënö ninqanqa manam pëwan ëwëkaqkunallapaqtsu karqan. Pipis qateqnin këta munarqa, listum këkänan imëkanta jaqirinampaq, hasta përëkur wanurinampaqpis. Tsëta ruranampaqqa, alliran pensanan y Diosman mañakunan.

Tsëpitanam, Jirkachö Yachatsikïkar qateqninkunata “qamkunaqa patsapa kachinmi kayanki” ninqampita yapë parlarqan (Mateu 5:13). Mikïkuna mana ismurinampaq kachi yanapakunqannöllam, Diospa amïgun këta y alli portakïta mana jaqiyänampaq qateqninkuna nunakunata yanapëkäyarqan, tsëchi tsënöqa nirqan. Tsë witsanqa, Jesusqa sagrädu rurëninta ushëkarqannam, tsëmi kënö nirqan: “Rasumpa kaqchöqa, kachiqa alläpa allim. Peru kachi qamläriptinqa, ¿imawanraq kachitashqa kanqa?” (Lücas 14:34). Kachipaq parlanqanta wiyaqkunaqa, alleqmi musyayaq wakin kachiqa imawampis takushqa kanqanrëkur mana sirwinqanta.

Qatir sïguiyänanta imapis mana qelanäratsinampaqmi, mëtsika watapana qateqninkunatapis Jesusqa alli cuidakuyänampaq nirqan. Qelanäkuriyaptinqa, qamläreq kachinömi sirwiyänannatsu karqan. Tsëmi pëkunapita burlakuyänan karqan, y mananam Diospa rikëninchö allinatsu kayänan karqan y jutintapis rakchatäyänan karqan. Tsënö mana ushanapaqmi cuidakunantsik. Tsëmi Jesusqa, “wiyanampaq rinriyoq kaqqa, wiyakutsun” nir usharirqan (Lücas 14:35).