Jesusqa tsëllaran oqrakashqa wamrapaq willakïwan yachatsikushqa karqan. Impuestu cobrakoqkuna, Ley qellqaqkuna y fariseukunaqa, arrepentikoqkunata Dios perdonanampaq listu këkanqanta entiendiyänanqa alläpam precisarqan (Lücas 15:1-7, 11). Tsëpitanam qateqninkunata juk willakïta Jesus willarqan. Tsë kutiqa, juk kapoqyoq nunapa mayuralnin o wayinta rikaqnin imëkankunata lluta rikëkanqampaqmi willakurqan.

Tsënö ruranqampita tsë mayuralta patronnin qarqurinampaq kaqtam Jesusqa willakurqan. Tsënam tsë mayuralqa kikinllachö kënö nirqan: “¿Imataraq kananqa rurashaq mayural kënïta patronnï qochikämaptinqa? Manam kallpä kannatsu chakrachö trabajanäpaq, y limushna mañakïtaqa penqakümi”. Tsënam kënö pensarirqan: “¡Äh yä!, musyänam imata ruranäpaq kaqta, tsënöpa mayural kënïpita jorqaramaptin, wayinkunaman chaskimaqkuna kayänampaq”. Tsëmi jinan höra patronnimpa jaqan kaqkunata qayarir, punta kaqta kënö tapurqan: “¿Ëkataq patronnïpa jaqan kanki?” (Lücas 16:3-5).

Pënam, “pachak (100) tupï olïva aceititam” nirqan. Tsëqa 2.200 litrunömi karqan. Itsachi tsë jaqayoq nunaqa olïvu montikunayoq o aceitita rantikoq karqan. Mayural nunanam, “yapë tsari ruranqëki conträtu papelta, y tëkur, raslla pitsqa chunka (50) nir qellqë” nirqan, tsëqa 1.100 litrunömi karqan (Lücas 16:6).

Juknin kaqtanam kënö tapurqan: “Y qamqa, ¿ëkataq jaqan kanki?”. Pënam, “pachak (100) jatun tupï trïgutam” nirqan. Mayuralnam, “ruranqëki conträtu papelta yapë tsarirkur, puwaq chunka (80) nir qellqë” nirqan. Y mas wallkallatana kutitsinampaqmi qellqaratsirqan (Lücas 16:7).

Patronnimpa imëkankuna makinllachöraq katsirmi, tsë mayuralqa tsëta ruranampaq autoridäyoq karqan. Tsënö rurarmi, trabäjunnaq quedariptin tiempuwan yanapayänampaq tsë jaqayoq nunakunapa amïgun tikrarirqan.

Mas wallkallatana kutitsiyänampaq kaqta musyarirpis, mayuralnin tsënö ruranqampitam alläpa espantakurqan. Tsëmi “patronninqa tsë mayuralta alabarqan, porqui mana allita ruraq karpis, yachëyoq kanqantam rurëninchö rikätsikurqan”. Jina Jesusqa kënömi nirqan: “Kanan witsanchö kawaq nunakuna kikinkunapura tratanakuyanqanchöqa, atsikyaqchö këkaq nunakunapitapis mas yachaq kayanqantam rurëninkunawan rikätsikuyan” (Lücas 16:8).

Jesusqa manam tsë mayural ruranqan alli kanqantatsu nikarqan, ni manam negociukunata rurar suwakunapaqtsu nikarqan. Tsëqa, ¿ima nitataq munarqan? Qateqninkunatam kënö entienditsirqan: “Kë munduchö kayäpushunqëki riquëzakunata provecharnin amïgu këta ashiyë, tsënöpa tsë riquëzakuna ushakäriyaptin, mana ushakaq sitiukunachö [...] chaskiyäshunëkipaq” (Lücas 16:9). Tsë igualatsikïqa puntallapitana imatapis patsätsinapaq y yachëwan ruranapaqmi  yachatsimantsik. Diospa sirweqninkunaqa imata chaskinapaq kaqman yarpararninmi, kapamanqantsikkunata shumaq utilizänantsik.

Jehoväwan Jesusllam ciëluchö Gobiernupaq o Shumaq Patsapaqqa pitapis chaskita puëdiyan. Tsëmi Diospa Gobiernumpaq kapamanqantsikkunata utilizarnin pëkunawan alli amïgu këta tïranantsik. Tsënöpam öru, pläta metal y kapamanqantsikkuna manana sirwiptin, shamoq tiempuchö shumaq kawanapaq següru kashun.

Jina riquëzakunata utilizäyanqanchö markäkïpaq karninqa, alläpa precisaq asuntukunachöpis markäkïpaq kayänantam Jesusqa nirqan. Tsëpitanam kënö nirqan: “Kayäpushunqëki riquëzakunawan mana markäkïpaq nuna kayanqëkita rikätsikushqa këkäyaptikiqa, ¿piraq rasumpa kaq riquëzakunata markäkuyäshunki [Diospa markanchö carguyoq këchönö]?” (Lücas 16:11).

Jesusqa qateqninkunata nikarqan, “mana ushakaq sitiukunachö” këta munarqa llapan puëdiyanqanmannö kallpachakuyänampaq kaqtam. Manam Diospa y kë munduchö Kapoqyoq Këpa sirweqnin këta puëdintsiktsu. Tsëmi kënö nir usharirqan: “Manam ni pï sirwipakoqpis ishkë patronpa sirweqnin këtaqa puëdintsu; porqui bienmi jukninta chikinqa y jukninta kuyanqa, o bienmi jukninta yachananqa, y jukninta desprecianqa. Manam Diospa y Kapoqyoq Këpa sirweqnin këta puëdiyankitsu” (Lücas 16:9, 13).