Jesus y pëwan ëwëkaqkunam Jericöman chäriyarqan, tsëpitaqa juk junaqtanöran Jerusalenman chäyaq. Tsë witsanqa, Jericöqa ishkë markam karqan, unë kaq y mushoq kaq, mushoq kaqtaqa Röma mandakunqan witsanmi patsätsiyarqan, y unë markapitaqa ishkë kilömetruchönömi këkarqan. Jesus y pëwan ëwëkaqkuna juknin markapita juknin markaman ëwëkäyaptinmi, ishkë wisku nunakuna tsëpa pasëkäyanqanta wiyariyarqan. Juknimpa jutinqa Bartimeum karqan.

Jesus tsëpa pasëkanqanta Bartimeuwan wisku mayin wiyarirqa, “¡Teytë, Davidpa Tsurin, ankupëkalläyämë!” nirmi sinchipa qayakur qallëkuyarqan (Mateu 20:30). Peru wakin nunakunaqa upälla kayänampaqmi piñapäyarqan; peru pëkunaqa mas sinchiparan qayakuyarqan. Tsënam Jesusqa tsë wiskukunata qayayänampaq mandakurqan. Jesusta wakin yanaqaqkunanam juknin kaqta kënö niyarqan: “¡Kallpata tsari! Sharkï; qayashunkim” (Marcus 10:49). Tsënam tsë wiskuqa, raslla sharkurir Jesus kaqta ëwarqan.

Tsënam Jesusqa, “¿qamkunapaq imata ruramunätataq munayanki?” nir tapurqan. Pëkunanam, “Teytë, nawilläkunata kichëkallämï” niyarqan (Mateu 20:32, 33). Jesusqa alläpa llakiparmi nawinkunata yatarqan y juknin kaqta kënö nirqan: “Ëwakï. Markäkïnikim kachakäratsishurqunki” (Marcus 10:52). Tsë höram, tsë wiskukunapa nawinkunaqa kichakärirqan y Diosta alabarmi qallëkuyarqan. Tsëta rikëkurmi llapan nunakuna Jehoväta alabayarqan, y tsë ishkan nunakunapis Jesusta qatirmi qallëkuyarqan.

Mëtsika nunakunam Jericö markapa pasëkaptin qatiyarqan. Pï mëmi rikëta munayarqan. Peru jiruroqninchö mëtsikaq kayaptinmi, wakinqa rikëta puëdiyarqantsu. Tsëmi Jericöchö impuestu cobrakoqkunapa mandaqnin Zaqueu jutiyoq nunatapis pasarqan. Takshalla karmi rikëta puëdirqantsu, tsëmi tsë nänipa Jesus pasanan kaptin, puntärir juk sicömuru montiman lloqarqan. Tsëpitaqa llapantam rikëta puëdirqan. Tsëpa pasëkarnam, montichö lloqarëkaqta rikëkur Jesusqa kënö nirqan: “Zaqueu, apurë, ras yarpamï, porqui kananqa wayikichömi posadakunä” (Lücas 19:5). Tsënam Zaqueuqa jinan höra yarpurir, wayinta alistapakoq ëqikurqan.

Tsëta rikaq nunakunaqa Jesuspa contranmi parlar qallëkuyarqan. Nunakunata engañar impuestukunata masta cobrakurnin kapoqyoq këman Zaqueu chashqa kaptinmi, nunakunaqa jutsasapatanö rikäyaq, tsëmi pëpa wayinman Jesus ëwëkanqantaqa mana allitanö rikäyarqan.

Zaqueupa wayinman yëkureqta rikärirmi nunakunaqa, “juk jutsasapa nunapa wayinmanmi posadakoq yëkushqa” nir parlayarqan. Peru Jesusqa, Zaqueu arrepentikïta puëdinqantam  pensarqan, y tsënömi pasakurqan. Sharkurmi Zaqueuqa kënö nirqan: “¡Rikë! Llapan kapamanqankunapitam pullan kaqta waktsakunata qoykushaq Teytë, y pitapis engañarnin qellëninta suwapunqä kaqtam chusku kuti masta kutitsishaq” (Lücas 19:7, 8).

Zaqueu tsënö ninqanqa, shonqupita patsë arrepentikushqa kanqantam rikätsikurqan. Itsachi llapantapis apuntashqata katsir, Zaqueuqa musyarqan pikunata masta cobrashqa kanqanta y pëkunata chusku kutipitapis mas kutitsinampaqmi änikurqan. Tsëqa Ley mandakunqampitapis masmi karqan (Exodu 22:1; Levïticu 6:2-5). Jina Zaqueuqa llapan kapunqampita pullanta waktsakunata qoykunampaqmi änikurqan.

Zaqueu arrepentikunqampita alläpa kushikurmi, Jesusqa kënö nirqan: “Kananmi kë wayiman salvacion chämushqa, porqui pëpis Abrahanpa tsurinmi. Porqui nunapa Tsurinqa oqrakashqa këkaqkunata asheq y salvaqmi shamushqa” (Lücas 19:9, 10).

Jehoväpita karupäkurishqakuna imanö këkäyanqanta rikätsikunampaqmi, oqrakashqa wamrapaq igualatsikïwan yachatsikushqa karqan (Lücas 15:11-24). Y Zaqueuqa tsë wamra cuentam oqrakashqanö këkarqan, peru arrepentikuriptinqa imëka tarikärishqa cuentanam karqan. Zaqueu nunakunapaqnö Jesus yarpachakunqampita pushakoq religiösukuna contran parlayaptimpis, Jesusqa Abrahanpa oqrakashqa wamrankunata asheq cuentam, arrepentikuyänampaq nunakunata yanaparqan.