Jerusalenman Perëapa viajar sïguikaptinmi, juk jövin ëqipa ëwëkur Jesuspa puntanman qonqurikïkurqan. Pëqa “juk gobernadormi” karqan, itsachi Diosta adorayänan juk wayita rikaq, o Judïukunapa Precisaq Cortinchö kaqkunapita karqan. Tsëpitanam, “Alli Maestru, ¿imatataq ruranä imëyaqpis kawakïta chaskinäpaq?” nir tapurqan (Lücas 8:41; 18:18; 24:20).

Jesusnam, “¿imanirtaq Alli Maestru nimanki? Manam pipis alliqa kantsu, sinöqa jukllaqllam, Dioslla” nirqan (Lücas 18:19). Tsë witsan yachatsikoqkunaqa pitapis precisaqpaq churarmi “Alli Maestru” nir qayayaq, itsa tsëchi tsë jövinqa Jesusta tsënö qayarqan. Peru Jesusqa alli yachatsikoq karpis, Diosllata “Alli” nir qayayänampaq kaqtam cläru rikätsikurqan.

Tsëpitanam, “kawëta chaskita munarqa, Diospa mandakïninkunata imëpis wiyakï” nir Jesus consejarqan. Jövinnam, “¿mëqankunata?” nirqan. Tsëmi Jesusqa, pitapis mana wanutsinampaq, mana majanwan mana oqllanakunampaq, mana suwakunampaq, pitapis mana tumpanampaq y teytantawan mamanta precisaqpaq churar respetanampaq Ley mandakunqanta yarpätsirqan. Tsëpitanam kë precisaq mandamientuta cumplinampaq nirqan: “Nuna mayikitam kikikitanö kuyanëki” (Mateu 19:17-19).

Jövinnam, “tsë llapankunatam wiyakurqö; ¿ima masta ruranätaq pishin?” nirqan (Mateu 19:20). Itsachi imëyaqpis kawëta chaskinampaqqa, juk alli rurëkunata rurananraq pishinqanta pensarqan. Shonqupita patsë tsëta tapukïkanqantam Jesusqa cuentata qokurirqan, tsëmi alläpa ankuparqan (Marcus 10:21). Peru imëyaqpis kawëta chaskinampaqqa jukran michëkarqan.

Tsë jövinqa imëkankunatam alläpa kuyarqan. Tsëmi Jesusqa kënö nirqan: “Jukta ruranëkim pishin: ëwë, llapan kapushunqëkikunata rantikïkï y tsë qellëta waktsakunata qoykï, tsëqa ciëluchömi fortünëki kapushunki; y shamï, qatimaqnï kë”. Tsë jövinqa kutitsita mana puëdeq waktsa nunakunata qellëninta qarakïkurmi, Jesuspa qateqnin këta puëdinman karqan. Peru  manam tsëta rurarqantsu. Tsëpa rantinqa, alläpa llakishqam Jesus rikarëkaptin ewkurqan. Tsë nunaqa “imëkayoqmi karqan” y tsëninkunata alläpa kuyarmi, rasumpa kaq fortüna mëchö këkanqantaqa cuentata qokurqantsu (Marcus 10:21, 22). Tsëmi Jesusqa kënö nirqan: “¡Imanö sasam kanqa atska qellëyoq nunakunapaq Diospa Gobiernunman yëkïqa!” (Lücas 18:24).

Tsënö ninqampitam qateqninkunaqa alläpa espantakuyarqan. Jina, “mas fäcilmi awjapa uchkumpa juk camëllu pasarinman, kapoqyoq nuna Diospa Gobiernunman yëkunampitaqa” ninqampitapis alläpam espantakuyarqan. Tsëta wiyarirnam, “tsëqa, ¿pillanataq salvakïta puëdinman?” nir tapuyarqan. Pënam kënö nirqan: “Nunakunapaq mana puëdipaqnö kaqkunaqa, Diospaqqa puëdikanmi” (Lücas 18:25-27).

Pëdruqa kapoqyoq jövinnö mana decidiyanqanta rikätsikurmi kënö nirqan: “¡Rikë! Noqakunaqa llapan imëkakunatam jaqiyarqö y qamta qatiyarqoq; tsëqa, ¿imataq noqakunapaq kanqa?”. Jesusnam kënö nirqan: “Llapampis mushoq këman kutinqanchö nunapa Tsurin chipapäkïkaq täkunanman täkuriptinmi, qamkunapis qatiyämaqni kaqkuna, chunka ishkë (12) gobernar täkunakunaman täkuyanki, y Israelpa chunka ishkë (12) kastankunata juzgayanki” (Mateu 19:27, 28).

Jesusqa shamoq tiempupaqmi parlëkarqan, tsë witsankunam llapampis mushoq këman kutinqa y Patsachö kawakïqa Eden huertachönömi kanqa. Pëdruwan Jesuspa wakin qateqninkunaqa rey kë cargutam chaskiyanqa y alläpa shumaq tikrashqa Patsatam Jesuswan gobernayämunqa. Tsë bendicionqa manam imata jaqiyanqanwampis igualantsu.

Peru manam llapan bendicionkunatatsu shamoq tiempuchöraq chaskiyänan karqan. Wakin bendicionkunataqa chaskikäyarqannam, tsëpaq parlarmi Jesusqa kënö nirqan: “Pipis wayinta, o warminta, o wawqinkunata, o teytankunata, o wamrankunata Diospa Gobiernunrëkur jaqishqa kaqqa, atska kuti mastam kanan witsan chaskinqa, y shamoq tiempuchönam, imëyaqpis kawakïta” (Lücas 18:29, 30).

Awmi, mëta ëwarpis qateqninkunaqa creikoq mayinkunawanmi familiankunapitapis mas kuyanakuyänan karqan. Peru tsë kapoqyoq gobernadorqa tsë bendicionta y ciëluchö Diospa Gobiernunchö kawëtapis oqrarirqantsunchi.

Tsëpitanam Jesusqa kënö nirqan: “Peru mëtsikaq puntachö kaqkunam, qepachö kayanqa; y qepachö kaqkunanam, puntachö kayanqa” (Mateu 19:30). ¿Ima nitataq munëkarqan?

Tsë kapoqyoq gobernador jövinqa, judïukunapa juk pushakoqnin karmi ‘puntachö kaqkunawan’ këkarqan. Diospa mandamientunkunata cäsukoq karmi, Jesuspa qateqnin karqa allikunata y maskunata rurëta puëdinman karqan. Peru kapoqyoq këta y imëka kapunqankunatam mas precisaqpaq churarqan. Peru wakin nunakunaqa Jesus yachatsikïkanqan rasumpa kaq kanqanta y kawëman chätsikoq kanqantam cuentata qokuriyarqan. Pëkunam imëka ‘qepachö kaqkunanö’ kayarqan, peru tsëpitaqa ‘puntachömi kayarqan’, porqui shumaqman tikratsishqa Patsatam Jesuswan gobernayämunampaq Rey kë carguta chaskita puëdiyänan karqan.