Judïukunapa Precisaq Cortinchö kaqkuna Jesusta wanutsiyänampaq churapakashqa këkarnimpis, manam wanutsita puëdiyarqantsu, porqui Jesusqa Jerusalenpa wak tsimpan Efrain markatam ëwakurqan. Tsëchömi qateqninkunawan chikeqninkunapita karunchö quedakuyarqan (Juan 11:54). Tsënö kaptimpis, 33 wata Pascua fiestapaqmi ichikllachöna kutinan karqan. Samariapa pasarirmi Galilëata witsarqan. Manaraq wanukurqa, tsë kutillanam tsë provinciata ëwarqan.

Caserïun caserïun ëwëkarmi, lepra qeshyayoq chunka nunakunawan toparirqan. Tsë qeshyawanqa, höraqa dëdunkunapita y rinrinkunapitam qarankuna ushakar qallëkun (Nümerus 12:10-12). Diospa Leyninqa mandakoq, “¡leprayoqmi kä! “¡Leprayoqmi kä!” sinchipa niyänampaqmi (Levïticu 13:45, 46).

Tsërëkurmi lepra qeshyayoq tsë chunka nunakunaqa, karullapita Jesusta kënö nir qayayarqan: “¡Jesus, Maestru, ankupëkalläyämë!”. Jesusnam kënö nirqan: “Sacerdötikunaman ëwayë rikäyäshunëkipaq” (Lücas 17:13, 14). Tsënömi Jesusqa Leyta respetanqanta rikätsikurqan, sacerdötikunallam pipis tsë qeshyapita kachakashqa kanqantaqa nita puëdiyaq. Tsëpitaran tsë nunaqa wakin nunakunawan juntu tärëta puëdeq (Levïticu 13:9-17).

Milagrukunata Jesus rurëta puëdinqanmanmi lepra qeshyayoq tsë chunka nunakunaqa markäkuyaq, tsëmi jinan höra manaraq kachakarpis, sacerdötikuna kaqta ëwayarqan. Tsënö markäkuyanqanrëkurmi, nänita ëwarëkar kachakäriyarqan.

Tsë chunka nunakunapitam, isqun nunakuna sacerdötikuna kaqman ëwar sïguiyarqan. Peru Samariapita kaq nunaqa, Jesusta asheqmi kutirqan. ¿Imanir? Tsë nunaqa alläpam kushikurqan Jesus kachakätsinqampita. Tsëmi “Diosta sinchipa alabarnin kutirqan”, porqui cuentatam qokurirqan Jehovä kachakätishqa kanqanta (Lücas 17:15). Jesusta taririrqa, puntanman qonqurikïkurmi alläpa agradecikurqan.

Tsënam Jesusqa tsëchö këkaqkunata kënö nirqan: “¿Chunkanmi kachakäyashqa aw? Tsëqa, ¿mëtaq isqun kaqkunaqa? ¿Manaku wakin kaqkunaqa ni mëqampis Diosta alabaq kutiyämushqa, sinöqa kë juk nacion nunallaku?”. Tsënam tsë nunata kënö nirqan: “Sharkï y ëwë, markäkïnikim kachakäratsishurqunki” (Lücas 17:17-19).

Tsë lepra qeshyayoq chunka nunakunata kachakätsirqa, Jehovä yanapëkanqantam Jesusqa rikätsikurqan. Jina tsë milagrurëkurqa, Jesusman kuteq nunaqa manam kachakarqanllatsu, sinöqa itsachi kawëman chätsikoq nänitapis taririrqan. Kanan witsankunaqa Diosqa manam Tsurinta tsë milagrukunata ruratsinnatsu. Tsënö kaptimpis, Jesusman markäkurqa kawëman chätsikoq nänichömi purita puëdishun. Tsënö kanqampitaqa, ¿Samariapita nunanöku alläpa agradecikuntsik?