Jerusalenpita kima kilömetruchönömi, Olïvus jirkapa juknin lädumampa Betania caserïuqa këkarqan (Juan 11:18). Tsëchömi Marta, Marïa y Läzaru täräyaq, pëkunaqa Jesuspa kuyë amïgunkunam kayarqan, tsëmi pëkunata watukarqan.

Jesustaqa alläpa kushishqam wayinkunachö chaskiriyarqan. Tsëmi Martaqa mas alli kaq mikïta rurar qallëkurqan. Tsëta rurapakur këkaptinmi, nanan Marïaqa, Jesusta wiyakur chakin kaqchö kushishqa tëkarqan. Tsëpita rätunllatanam Martaqa Jesusta kënö nirqan: “Teytë, ¿manaku imapis qokushunki imëka rurëkuna këkaptin nanä japalläta jaqiramashqa kanqan? Shamur yanapamänampaq nïkï” (Lücas 10:40).

Peru Jesusqa manam Marïata piñaparqantsu. Sinöqa “Marta, Marta, imëka cösaskunapaq yarpachakur y afanakurmi qamqa këkanki. Peru wananqantsik cösaskunaqa juk ishkëllam, o jukllëllam. Peru Marïaqa, mas precisaq kaqtam akrashqa, y tsëtaqa manam ni pipis qochinqatsu” nirqan (Lücas 10:41, 42). Tsënömi Martata rikätsirqan tukïläya mikïta rurë mana precisanqanta.

Martaqa alläpa kuyakoq kanqantam rikätsikïta munarqan. Peru imëkata rurarmi Diospa Tsurin yachatsikïkanqantaqa mana wiyëkarqantsu. Peru nanan Marïa allita ruranqantam Jesusqa nirqan, y tsëpin yachakunqanqa llapan kawëninchömi pëta yanapanan karqan. Marïa ruranqantam llapantsikpis yarpänantsik.

Juk kutichönam juk precisaq asuntupita yachatsikurqan. Juk qateqninmi, “Teytë, yachatsiyämë mañakïta, qateqninkunata Juan yachatsinqannölla” nir mañakurqan (Lücas 11:1). Tsë asuntupaqqa, juk wata pullantanönam Jirkapita Yachatsikunqanchö Jesusqa yachatsikushqana karqan (Mateu 6:9-13). Peru itsachi tsë qateqninqa tsëchötsu këkarqan, tsëmi Jesusqa yapë yachatsikurqan. Tsëpitanam mana jaqita Diosman mañakï imanir alläpa precisanqanta rikätsikur juk pasakunqanta willakurqan.

Kënömi nirqan: “Qamkunapita mëqëkipapis juk amïguïkikuna kayäpushunkiman, y pullan paqas pë kaqman ëwëkur kënö niyankiman: ‘Amïgu, kima tantata mañëkallämë, juk amïgümi karupita chämushqa, y manam imäpis kantsu qarëkunäpaq’. Peru pëna ruripita kënö contestamunman: ‘Ama fastidiakamïtsu. Punkupis alli segurashqanam këkan, y wamräkunapis cämachönam noqawan punïkäyan. Manam sharkamïta y imatapis qoyta puëdeqtsu’. Këtam niyaq, amïgun këkar imatapis qonampaq mana sharkurpis, kutin kutin qayakunqanrëkurmi sharkurnin llapan wananqanta qoykunqa” (Lücas 11:5-8).

Jesusqa manam mañakïnintsikkunata Jehovä contestëta mana munanqantatsu nikarqan. Sinöqa, amïgunta juk nuna yanapëta mana munëkarpis kutin kutin mañakunqanrëkur munanqanta qoykaptinqa, Diosnintsikpis sirweqninkuna mañakuyanqanta contestanampaq kaqtam rikätsikïkarqan. Jina Jesusqa kënömi nirqan: “Sïguiyë mañakurnin, y qoyäshunkim; sïguiyë ashirnin, y tariyankim; sïguiyë takakurnin, y kichapuyäshunkim. Porqui llapan mañakoqkunam chaskiyan, y llapan asheqkunam tariyan, y llapan takakoqkunatam kichapuyanqa” (Lücas 11:9, 10).

Tsëpitanam, tsë yachatsikïta mas alleq entienditsikïta munarnin, teytakuna rurayanqampaq kënö nir parlarqan: “¿Pï teytataq wamran pescäduta mañaptin, pescädupa rantin culebran qoykunman? ¿O ruruta mañaptin, atoq kurun qoykunman? Tsëqa, qamkuna jutsasapa këkarpis wamrëkikunata alli qarëkunata qoyta yachëkäyaptikiqa, ciëluchö këkaq Teytanäqa, ¡masraqchi mañakoqninkunataqa santu espïrituta qoykunqa!” (Lücas 11:11-13). Awmi, Diosnintsikqa wiyamantsikmi y wananqantsikkunatam qomantsik.