Jesusqa “wallkalla üshakuna” Diospa Gobiernunchö kayänampaq kaqtam tsëllaraq nirishqa karqan (Lücas 12:32). Peru tsëchö këtaqa manam mana kaqpaqqa churariyänantsu karqan. Tsëmi Diospa Gobiernunchö kayänampaq kaqkuna imanö këkäyänampaq kaqta cläru entienditsikurqan.

Kutimunampaq listu këkäyänampaqmi qateqninkunata Jesus kënö consejarqan: “Alli vistishqa, listu, y chiwchikikunata sendirkur këkäyë, y casamientupita patronnin kutimunanta shuyarëkaq nunakunanö kayë, pëkunaqa tsënö kayan, kutimur takakuptin, jinan höra kichapuyänampaqmi. ¡Kushishqam tsë sirwipakoqkunaqa kayanqa patronnin shamurnin täpakur këkäyaqta tariptinqa!” (Lücas 12:35-37).

Jesus nikanqantaqa alleqmi entiendiyarqan. Churanqan igualatsikïchöqa, sirwipakoqkunaqa listum patronninta shuyarëkäyarqan. Jesusmi kënö entienditsikurqan: “[Patronnin] pullan paqas shamuptin, o gällu cantanan höra shamuptimpis, listu këkäyaqta tariptinqa, ¡kushishqam pëkuna kayanqa!” (Lücas 12:38).

Tsënö nirqa, manam alli sirwipakoq o alli trabajaq kayänampaq kaqllatatsu Jesusqa nikarqan. Tsëqa cläru rikakärirqan kikimpaqpis tsë igualatsikïchö parlashqa kaptinmi. Tsëmi qateqninkunata kënö nirqan: “Qamkunapis listu këkäyë, porqui mana pensayanqëki höram nunapa Tsurinqa shamunqa” (Lücas 12:40). Awmi, Jesusqa shamoq tiempuchömi yapë kutimunan karqan y tsëpaqmi llapan qateqninkuna listu këkäyänan karqan, masran “wallkalla üshakuna” kaqkunanäqa.

Jesus entienditsikïkanqanta alleq käyita munarmi, Pëdruqa kënö tapukurqan: “Teytë, ¿kë igualatsikïkunataqa noqakunallataku nikäyämanki o wakin kaqkunatawanku?”. Y Señornam kënö nirqan: “Rasumpa kaqchöqa, ¿pitaq wayinchö sirwipakoqkunata tiempunchö mikïninkuna qornin sïguinampaq patronnin churanampaq kaq alli juiciuyoq, markäkïpaq kaq mayural? ¡Kushishqam kanqa tsë sirwipakoq, patronnin chärir tsënö rurëkaqta tariptinqa! Rasuntam niyaq, llapan kapunqankunata rikänampaqmi churanqa” (Lücas 12:41-44).

Punta kaq igualatsikïchö ‘patronqa’ Jesusmi. Peru juknin kaq igualatsikïchö ‘markäkïpaq kaq mayuralqa’ rikätsikun Diospa Gobiernunta chaskiyänampaq “wallkalla üshakuna” kaqpita wakinkuna kayänampaq kaqtam (Lücas 12:32). Jesusqa, pëkunapita wakin kaqkuna “wayinchö sirwipakoqkunata tiempunchö mikïninkuna” qoyänampaq kaqtam nirqan. Tsëmi Pëdruwan Jesuspa wakin qateqninkunaqa shamoq tiempuchö Jesus kutimunampaq kaqta entiendiriyarqan. Tsë witsankunapaqqa, “wayinchö sirwipakoqkunata” o juk parlakïchöqa, qateqninkunata Diospa kaqchö mikïninkuna qoyänampaqmi alli churanakushqa grüpu kanan karqan.

Jina Jesusqa, imanir mäkoq mäkoq y imanö këkäyanqanta rikäkuyänampaqmi nirqan, porqui sinöqa hasta wakin sirwipakoq mayinkunapa contranmi churakäriyänan karqan. Tsëmi nirqan: “Peru sitsun imëllapis tsë sirwipakoq shonqunchö kënö ninman: ‘Patronnïqa manam chämunqaraqtsu’, y sirwipakoq mayinkunata ollqutapis y warmitapis maqar qallëkunman, jina mikur, upyar y machar qallëkunman, tsëqa, tsë sirwipakoq mana shuyanqan junaq y mana musyanqan höram patronnin chäramunqa, y alläpa feyupam castiganqa, y mana wiyakoq kaqkunatawanmi churanqa” (Lücas 12:45, 46).

Tsëpitanam Jesusqa, “ninata tsaritseqmi patsaman shamurqö” nirqan. Awmi, yachatsikunqanwan mana alli kaq yachatsikïkunata y costumbrikunata  imëka ninawannö ushakätsishqa kaptinmi, nunakunaqa discutir këkäyarqan. Tsërëkurmi Jesusqa kënö nirqan: “Teytam tsurimpa contran kanqa, tsurinam teytampa contran kanqa, mamam warmi wamrampa contran kanqa, warmi wamranam mamampa contran kanqa, suegram lumtsïnimpa contran kanqa, y lumtsïnam suegrampa contran kanqa”. Y tsënöllam pasakun (Lücas 12:49, 53).

Jesusqa qateqninkunatam parlapëkarqan, peru tsëpitaqa llapan wiyëkaqkunatam parlapar qallëkurqan. Cäsi llapan nunakunam Diospa Akrashqan pë kanqantaqa creiyaqtsu. Tsëmi pëkunata kënö nirqan: “Inti jeqanan läduchö pukutë shärikaqta rikarqa, rasmi ‘vientuwan tamyam shamun’ niyanki, y tsënömi pasan. Y ura kaq lädupita vientumuptinnam, ‘alläpam achachämunqa’ niyanki, y tsënömi pasan. Ishkë qaqllakuna, imanö tiempu kanampaq kaqta rikëtaqa yachayankim, peru ¿imanirtaq kanan witsankuna imëkapis imanir pasakïkanqantaqa musyayankitsu?” (Lücas 12:54-56). Clärum këkarqan, Jesusta chaskiyänampaqqa manam listutsu këkäyarqan.