Elisabetqa qeshpikunampaqnam këkarqan. Marïaqa kima killam pëwan tärashqa karqan. Tsëpitaqa Judëapa uma kaq lädunchö këkaq alläpa karu Nazaret markanmanmi kutikurqan. Tsëpita joqta killallachönam pëpis qeshpikunan karqan.

Marïa ëwakunqanllachönam Elisabetqa qeshpikurirqan, pëqa allim këkarqan y wamrampis sänum yurikurqan. Elisabetwan Zacarïasqa alläpa kushishqam këkäyarqan. Elisabetqa vecïnunkunata y kastankunatam llullunta rikätsikurqan, tsëmi pëkunapis alläpa kushikuyarqan.

Diospa leyninqa mandakoq, juk ollqu wamra yurikunqampita puwaq junaq pasariptin penqëninchö señalayänampaq y jutin churayänampaqmi (Levïticu 12:2, 3). Wakinqa teytan Zacarïasnö jutin kanampaqmi niyarqan, peru Elisabetqa, “jutinqa Juanmi kanqa” nirqanmi (Lücas 1:60). Angel Gabrielqa tsë llullupa jutin Juan kanampaq kaqtam nishqa karqan.

Vecïnunkuna y kastankunaqa manam acuerdutsu kayarqan, tsëmi kënö niyarqan: “Peru manataq mëqan kastëkipis tsënö jutiyoqqa kantsu” (Lücas 1:61). Sëñasta rurarmi wamrata ima jutita churëta munanqanta Zacarïasta tapuyarqan. Ichikllan tablan apapuyänampaqmi Zacarïasqa mañakurqan y tsëchömi kënö qellqarqan: “Juanmi jutinqa kanqa” (Lücas 1:63).

Tsë höram Zacarïasqa parlar qallëkurqan. Yachakunqantsiknöpis, Elisabet wamrayoq kanampaq kaqta angel ninqanta mana creirmi müdu tikrashqa karqan. Tsëmi vecïnunkunaqa mantsakäyarqan yapë parlar qallëkuptin, tsëmi kënö niyarqan: “¿Imaraq kë wamra kanqa?” (Lücas 1:66). Tsënöpam cuentata qokuriyarqan Diospita tsë jutita chaskishqa kanqanta.

Tsënam Zacarïasqa santu espïrituwan junta tikrarir kënö nirqan: “Israelpa Diosnin Jehovä alabashqa katsun, porqui markantam yarpärishqa  y libri këtam apamushqa. Y sirweqnin Davidpa wayinchömi juk puëdeq salvamaqnintsikta sharkatsimushqa” (Lücas 1:68, 69). Tsë ‘puëdeq salvamaqnintsikqa’ señornintsik Jesusmi kanan karqan, y pëqa manaran yurishqaraqtsu karqan. Tsëpitanam Zacarïas nirqan, chikeqninkunapita Diosnintsik markanta salvanampaq kaqta, y tsë Salvakoqwan pëkuna ‘mana mantsashpa pëta sirwiyänampaq jaqinampaq kaqta, llapan kawayanqan junaqkuna mana jaqirishpa y alli kaq rurëkunata rurar’ (Lücas 1:74, 75).

Tsëpitam Zacarïas kënö nirqan: “Qamqa, wamrallä, Llapampa Janampa Këkaq Diospa willakoqnin nirmi reqishqa kanki, porqui Jehoväpa puntantam näninkunata alistarnin ëwanki, jutsanta perdonarnin salvanampaq kaqta markanta musyatsinëkipaq Diosnintsik shonqupita patsë alläpa ankupäkoq kanqanrëkur. Tsë ankupäkïninwanmi rarapita juk patsa warë watukamäshun ampeqchö y wanïpa wäninchö tëkaqkunata aktsinampaq y chakintsikkunata yamë kë nänipa pushanampaq” (Lücas 1:76-79). ¡Tsënö ninqanqa alläpa kushikïpaqmi karqan!

Tsëyaqqa, Marïaqa Nazaretchö wayinman chashqanam karqan. Peru manaraq casakushqa këkar qeshyaq këkanqanta llapankuna musyariyaptinqa, ¿imaraq pasakunman karqan?