Josëqa Marïatam riyarkatsirqan alläpa precisaq willakïta willanampaq. Jehoväpa juk angelninmi suëñïninchö yuripurqan y kënö nirqan: “Sharkï, wamratawan mamäninta pusharkur Egiptuta escapakï, y tsëchö quedakï noqa ninqaqyaq, porqui Herödismi wamrata ashïkur wanutsinampaq këkan” (Mateu 2:13).

Tsëmi Josë, Marïa y Jesusqa paqas këkaptimpis jinan höra sharkur ëwakuyarqan. Tsëllanam Herödisqa cuentata qokurirqan qoyllurkunata rikëkur tantiyaq nunakuna pëta engañashqa kayanqanta. Pëqa wamra mëchö këkanqanta kutirnin willayänampaqmi nishqa karqan, peru pëkunaqa markankunatam juk nänipa kutikushqa kayarqan. Herödisqa alläpam piñakurqan. Jesusta wanutsita munarmi, Belenchö y jiruroqnin markakunachö täraq ishkë watapita urëpa llapan ollqu wamrakunata wanutsiyänampaq mandakurqan. Qoyllurkunata rikëkur tantiyaq nunakunata tapupashqa kanqampitam, Jesus ëka watayoqnö kanqanta musyarirqan.

Herödis mandakunqanqa alläpa espantakïpaqmi karqan. Manam musyantsiktsu ëka wamrakunata wanutsiyanqantaqa, peru wamrankunarëkur warmikuna waqar kayanqanchömi Diospa willakoqnin Jeremïas qellqanqan cumplikärirqan (Jeremïas 31:15).

Manaraq tsëkuna pasakuptinmi, Josëwan familianqa Egiptuman ëwakushqa kayarqan y tsëchömi tärar qallëkuyarqan. Tsëpita mas tiempu pasariptinnam, suëñïninchö Josëta juk angel yuripurqan y kënö nirqan: “Sharkï, wamrata y mamäninta pusharkur Israel markata ëwë, porqui wanuriyashqanam wamrapa kawëninta ushakätsita asheqkuna” (Mateu 2:20). Tsëta musyarirmi Josëwan familianqa nacionninkunaman kutikuyarqan. Tsëta rurayanqanchömi  Egiptupita tsurinta Jehovä qayamunampaq kaq willakï cumplikärirqan (Osëas 11:1).

Itsa Josëqa familianwan Judëata täraq kutita pensëkarqan, Belenpa juk amänun markaman, porqui Egiptuta escapar manaraq ëwarqa tsëchömi tärarqan. Peru Herödispa alläpa mana alli tsurin Arquelau Judëata gobernëkanqantam musyarirqan. Jina Diosmi juk suëñïninchö musyatsirqan tsëman täraq kutiqa peligrösu kanqanta. Tsëmi Josëwan Marïaqa Jerusalenpita mas karuchö këkaq Galilëapa Nazaret markanman ëwakuyarqan. Jesusqa tsëchömi winarqan, tsënöpam Dios kënö musyatsikunqan cumplikarqan: “Nazaret markapita nirmi reqishqa kanqa” (Mateu 2:23).