Tamya witsan pasariptinmi Josëwan familianqa, amïgunkunawan y kastankunawan Jerusalenta juntu ëwayaq. Diospa Leynin ninqannömi Pascua fiestaman cada wata ëwayaq (Deuteronomiu 16:16). Jerusalenqa Nazaretpita 120 kilömetruchönömi këkarqan. Tsë junaqkunaqa llapankunam kushishqa imëkata alistarnin kayaq. 12 watayoqnam Jesusqa karqan, y tsë fiestachö y templuchö këtam alläpa munaq.

Jesuswan familianqa atska junaqkunam Jerusalenchö kayarqan. Pascua fiesta ushariptinqa, Levadürannaq Tantata Mikuyänan fiestatam qanchis junaqpa celebrayaq (Marcus 14:1). Tsë fiestataqa Pascua fiestatanöllam rikäyaq. Nazaretpita yarquyanqampita hasta kutiyanqanyaqqa ishkë semänanöran pasaq. Peru tsë wataqa Jesusrëkurmi masraq demorayarqan.

Nazaret-ta kutikarqa, kastankunawan y amïgunkunawan Jesuspis ëwëkanqantam Josëwan Marïaqa pensayarqan. Peru punuyänampaq jamarirqa manam Jesusta rikäyarqantsu. Pëkunawan ëwëkaqkunachömi ashir qallëkuyarqan, peru manam tariyarqantsu. Tsëmi Josëwan Marïaqa jinan höra Jerusalenman asheq kutikuyarqan.

Ishkë junaq entërum ashiyarqan, peru manam tariyarqantsu. Waräninran templupa juk sälanchö këkaqta taririyarqan. Yachatsikoq judïukunapa chowpinkunachömi tëkur wiyakïkarqan y pëkunatam tapupëkarqan. Tsë yachatsikoqkunaqa alläpam espantakuyarqan Diospa kaqkunata alli entiendinqampita.

Rikëkurnam Marïaqa kënö tapurqan: “Hïju, ¿imanirtaq këta rurayämarqunki? Rikë, teytëkiwan noqaqa alläpa yarpachakurmi ashikäyarqoq” (Lücas 2:48).

Jesusqa manam entiendirqantsu imanir mëchö këkanqanta teytankuna mana musyayanqanta. Tsëmi kënö tapurqan: “¿Imanirtaq ashikäyämarqunki? ¿Manaku Teytäpa wayinchö kanäpaq kaqta musyayarqëki?” (Lücas 2:49).

Tsëpitaqa Josëwan y Marïawanmi Nazaret-ta kutirqan y pëkunata wiyakur y respetarninmi Jesusqa sïguirqan. Poqurnin y mas yachaq tikrarninmi sïguirqan, tsëmi Diospis y nunakunapis masraq kuyayarqan. Wamra kanqampita patsë Diospa kaqta puntaman churanqampita y teytankunata Jesus respetanqampitaqa, kanan witsan jövinkunapis yachakïta puëdiyanmi.