Jerusalenchöqa tamya witsan pasarishqanam karqan. Jesuswan qateqninkunaqa 30 wata Pascua fiesta ushariptinmi Jerusalenpita ëwakuyarqan. Peru manam tsë höratsu Galilëachö wayinkunaman kutikuyarqan, sinöqa Judëa ëwëpa mëtsika nunakunata bautizarninmi ëwayarqan. Bautizakoq Juanqa juk watanam tsëta rurëkarqan, itsapis Jordan mayu uran ëwëchö y wakin qateqninkunaqa pëwanran këkäyarqan.

Jesusqa manam pitapis bautizarqantsu. Sinöqa qateqninkunam pë ninqannölla nunakunata bautizayarqan. Tsë witsan Jesuspa sagrädu rurëninchöqa, Diospa Leynimpa contran jutsallakuyanqampita arrepentikushqa judïukunatam Jesuswan Juanqa yachatsiyarqan (Hëchus 19:4).

Juanpa qateqninkunaqa kënö nirmi piñakuyarqan: “Jordan mayupa wak tsimpanchö qamwan këkanqan [Jesus] nunam [...] bauticëkan, y llapan nunakunam pë kaqman ëwëkäyan” (Juan 3:26). Peru Juanqa manam Jesuswan piñakurqantsu. Tsëpa rantinqa, alli yarqupukïkanqampitam kushikurqan y qateqninkuna kushikuyänampaqpis nirqanmi. Tsëmi kënö nir yarpätsirqan: “Kikikikunam testïgu kayanki kënö ninqäpita: ‘Noqaqa manam Cristutsu kä, sinöqa pëpa puntantam kachamushqa karqö’”. Y alli entiendiyänampaqmi juk igualatsikïta churarqan y kënö nirqan: “Novium noviata katseqqa. Peru noviupa amïgunqa, tsëkunachö shëkar noviuta wiyarirqa, alläpam kushikun noviu parlaqta wiyar. Tsënömi noqapis chipyëpa kushikü” (Juan 3:28, 29).

Pasaq killakuna qateqninkunata Jesusta reqitsirqa, noviupa amïgun cuenta karmi Juanqa alläpa kushikurqan. Wakin qateqninkunaqa Jesusta qatirmi qallëkuyarqan, y tiempuwanqa santu espïrituwanmi akrashqa kayarqan. Y Juanqa wakin qateqninkunapis Jesusta qatiyänampaqmi nirqan. Pëqa, Cristupa sagrädu rurënimpaq nänita alistanampaqmi carguta chaskishqa karqan. Tsëmi Juanqa kënö nirqan: “Pëqa atskayarmi sïguinan, peru noqaqa wallkayarmi sïguinä” (Juan 3:30).

Tsëpita tiempuwanmi, Juan jutiyoq Jesuspa juk qateqnin, Jesucristu mëpita shamunqanta y nunakuna salvakuyänampaq precisaq rurëyoq kanqanta kënö nir qellqarqan: “Rarapita shamoq kaqqa, llapan wakin kaqkunapa janampam këkan [...]. Teytaqa kuyanmi Tsurita, y makinmanmi llapan cösaskunata churashqa. Tsuriman markäkunqanta rikätsikoq kaqqa, imëyaqpis kawakïtam chaskin; Tsurita mana wiyakoq kaqqa, manam kawëta chaskinqatsu, sinöqa Diospa piñakïninmi pëchö imëpis këkanqa” (Juan 3:31, 35, 36). Nunakuna tsëta musyayänanqa alläpam precisarqan.

Rurënin ima kanqanta y wallkayänanta willakurinqampita ichik tiempullatanam, Bautizakoq Juanta carcelman llawitsiyänampaq rey Herödis mandakurqan. Tsëtaqa rurarqan wawqin Filïpupa warmin Herodïaswan casakunqan alläpa mana alli kanqanta cläru rikätsishqa kaptinmi. Juanta carcelman llawitsishqa kayanqanta musyarirqa, Jesusqa qateqninkunawanmi Judëapita Galilëaman ewkurqan (Mateu 4:12; Marcus 1:14).