1. Pentecostes Fiestachö nunakuna imanö këkäyanqanta willakaramuy.

 JERUSALENCHÖQA imëkata rurarmi këkäyarqan. a Templuchö altarpita qoyë o qoshni yarquykaptinmi levïtakunaqa Hallel nir reqiyanqanta (113 a 118 kaq Salmukunata) cantëkäyarqan. Capazchi wakinkuna cantar niyanqanta wakinkuna contestayaq. Cällikunachöqa, Elampita, Mesopotamiapita, Capadociapita, Pontupita, Egiptupita, Römapita y tsënö karu sitiupita forastërukunam junta këkäyarqan. b ¿Imatataq celebrëkäyarqan? Pentecostes Fiestata o ‘Cosëcha Qallanan Fiestatam’ (Nüm. 28:26). Tsë fiestataqa cada watam kushishqa rurayaq. Tsëqa cebäda cosëcha ushanqanta y trïgu cosëchana qallanqantam rikätsikoq.

2. ¿Imatan pasarqan 33 wata Pentecostes Fiestachö?

² 33 wata nuëvi de la mañänanö pasanqantaqa atska watapachi yarpäyarqan. Illaqpitam “shukukuy vientunöraq” o “shukukïnöraq” ciëlupita bunrurunqanta wiyayarqan (Hëch. 2:2; Teyta Diospa Willakïnin). Tsë büllanqanqa Jesuspa cientu veintinö qateqninkuna këkäyanqan wayi juntam wiyakarqan. Tsëpitanam qallunö ninakuna yurirkur cada ünupa jananman churakanqanta rikäyarqan, y tsëqa mana creipaqnömi karqan. c Tsë höram Jesuspa qateqninkunaqa “santu espïrituta chaskiyarqan” y juk idiömakunata parlëta puëdiyarqan. Juntarëkäyanqan wayipita yarqur “idiömankunachö [...] parlapäyanqanta” wiyarmi, forastërukunaqa alläpa espantakuyarqan (Hëch. 2:1-6).

3. (1) ¿Imanirtan 33 wata Pentecostes Fiestachö pasanqantaqa imëpis qonqayarqantsu? (2) ¿Imanötan Pëdruqa “Diospa Gobiernumpa” kima llävinkunapita punta kaqta utilizarqan?

 ³ Diosta adoraqkunaqa tsë pasanqantaqa manachi imëpis qonqayarqantsu. Tsë junaqmi Diospa Israelnin nir reqinqantsik grüpu patsakarqan. Pëkunaqa ciëluta ëwayänampaq akrashqa cristiänukunam kayan (Gäl. 6:16). Peru manam tsëllatsu pasarqan. Tsëpita mas rätunllatam Pëdruqa mëtsikaq nunakunata parlaparqan. Tsënömi “Diospa Gobiernumpa” kima llävinkunapita punta kaqta utilizarqan. Tsë llävikunawanmi tukuyläya nunakunata yanaparqan shumaq bendicionkunata chaskiyänampaq (Mat. 16:18, 19). Punta kaq lläviwanmi judïukunata y judaismu religionman yëkushqakunata yanaparqan, alli noticiakunata chaskikuyänampaq y santu espïrituwan akrashqa kayänampaq. d Tsënömi pëkunapis Diospa Israelnin tikrar Diospa Gobiernunchö gobernanti y sacerdöti këta puëdiyarqan (Apoc. 5:9, 10). Tsëpitaqa Samariapita nunakunatapis tsënöllam yanaparqan, y ultimutanam juk nacionpita nunakunata. ¿Imatataq yachakuntsik 33 wata Pentecostes Fiestachö pasanqampita?

4. ¿Imanirtan nintsik kanan witsan cristiänu congregacionchö kaqkunaqa, 33 watachö patsakaq congregacionpita shayämunqanta?

⁴ Tsëllaraq yachakunqantsiknöpis, cristiänu congregacionqa patsakarqan, Jesuspa cientu veintinö qateqninkuna “juk sitiullachö” o wayipa altusninchö këkar santu espïrituta chaskiyaptinmi (Hëch. 2:1). Peru  tsë tardipaqqa mëtsikaqnam bautizakushqa kayarqan. Tsë witsan patsakaq congregacionqa kananyaqmi mas atskayar sïguikan. Awmi, kanan witsan cristiänu congregacionchö warmikuna y ollqukunapis Teyta Diostam kuyayan. Pëkunaqa manaraq ushakë chämuptinmi, ‘llapan nacionpita nunakuna musyayänampaq Teyta Diospa Gobiernumpita alli noticiakunata entëru patsachö’ willakuykäyan (Mat. 24:14).

5. Punta cristiänukuna kawayanqan witsan y kanan witsampis, ¿imatataq congregacionchö kaqkuna rurëta puëdiyan?

⁵ Cristiänu congregacionchö kaqkunaqa kikinkunapuram yanapanakuyaq y animanakuyaq. Tsënömi ciëluta ëwayänampaq akrashqakuna rurayarqan, y tsëpitaqa wakin üshakuna nir reqinqantsikkunapis tsënömi rurayarqan (Juan 10:16). Pabluqa alläpam valorarqan wawqi panikuna yanapanakuyanqanta. Tsëmi Römachö cristiänukunaman cartakur kënö qellqarqan: “Diospa kaqchö mas alli kayänëkipaqmi, Diospita ima bendicionllatapis apamunäpaq, qamkunata alläpa rikëta munä, o tsëpa rantinqa, markäkoq o yärakoq kanqantsikrëkur, awmi, qamkuna markäkoq kayanqëkirëkur y noqa yärakoq kanqärëkur, juknintsik juknintsik kallpata chaskinapaq” (Rom. 1:11, 12).

6, 7. ¿Imanötan congregacionchö kaqkuna cumplikäyan llapan nacionpita nunakunata yachatsiyänampaq Jesus mandanqanta?

⁶ Punta cristiänukuna logrëta munayanqanllatam kanan witsan congregacionchö kaqkunapis logrëta munayan. Puntataqa qateqninkunata Jesus kënö mandanqantam cumpliyänan: “Qatimaqnïkuna kayänampaq llapan nacionpita nunakunata yachatsiyë, y Teytapa, Tsuripa y santu espïritupa jutinchö bautizayë. Qamkunata llapan mandanqäkunata cäsukuyänampaq yachatsiyë” (Mat. 28:19, 20). Mana fäcil kaptimpis, tsëta rurëqa alläpa kushikuypaqmi.

⁷ Kanan witsanqa, Jesus mandakunqanta rurayänampaq Teyta Dios akranqan  cristiänu congregacionqa Jehoväpa testïgunkunam kayan. Rasunmi mëtsika idiömakunachö nunakunata yachatsinanqa manam fäciltsu. Peru milpitapis mas idiömakunachö Bibliapita publicacionkunata ruratsimurmi Testïgukunaqa tsëta logrëkäyan. Qamqa, ¿ëwëkankiku reunionkunaman y yanapakuykankiku alli noticiakunata willakur y nunakunata yachatsir? Jehoväpa jutimpita nunakunata yachatseqkunaqa wallkaqllam kayan, tsëmi tsë rurëchö yanapakuykarqa alläpa kushikuy.

8. Congregacionchö kanqëkipitaqa, ¿ima bendiciontataq chaskikanki?

⁸ Kë alläpa mana alli tiempukunachö kushishqa kanëkipaq y alli tsarakunëkipaqmi, Jehoväqa entëru Patsachö wawqi panikunawampis yanapashunki. Hebreu cristiänukunaman cartakur Pablu kënö nir qellqanqanman pensari: “Kuyakoq kanapaq y alli kaqta rurëchö yanapanakunapaq, juknintsik juknintsik alli reqinakushun, y ama wakinkuna imëpis rurayanqannöqa juntakëta dejashuntsu, sinöqa juknintsik juknintsik animanakur këkäshun, masraq Teyta Dios nunakunata juzganan tiempu chëkämunqantana rikëkarqa” (Heb. 10:24, 25). Këchö ninqannöpis, congregacionchö karqa Jehovä permitiptinmi wakinkunata animëta y änimuta chaskita puëdinki. Tsëmi wawqi panikunapitaqa karupäkurinëkitsu ni reunionkunaman faltanëkitsu.

9, 10. ¿Imatataq wakinkunaqa rurayan juk idiömata parlaq nunakunata yachatsiyänampaq?

⁹ Tsë junaqqa, judïukuna y judaismu religionman yëkushqakunapis kushishqachi këkäyarqan! Tsëchö këkaqkunaqa cäsi llapanchi griëgu o hebreu idiömachö parlapänakuyaq.  Peru tsë höraqa, cada ünum “kikinkunapa idiömankunachö Jesuspa qateqninkuna parlapäyanqanta” wiyayarqan (Hëch. 2:6). Alli noticiakunata idiömankunachö wiyayanqanqa, shonqunkunayaqchi chärirqan. Rasunmi Teyta Diosqa manam cristiänukunata yanapamantsiknatsu juk idiömakunachö parlanapaq. Tsënö kaptimpis, atskaqmi llapan nacionpita nunakunata Diospa Gobiernumpita willëkäyan. ¿Imanötan tsëta rurëkäyan? Wakinkunaqa juk idiömata parlaq congregacionchö o juk nacionchö yanapakuyänampaqmi juk idiömata yachakuyan. Pëkunaqa cuentatam qokuyashqa juk idiömata yachakuykäyanqanta musyarnin wiyaqninkuna alläpa espantakuyanqanta.

¹⁰ Tsënömi Christine jutiyoq panita pasarqan. Pëqa qanchis Testïgu mayinkunawanmi gujaratï idiömata yachakurqan. Gujaratï idiömata parlaq trabajaq mayinwan tinkurnam tsë idiömachö saludarqan. Trabajaq mayinqa alläpam espantakurqan y alläpa difïcil yachakunan këkaptin gujaratï idiömata imanir yachakuykanqantam tapurqan. Tsënömi shumaq parlakuriyarqan, tsënam tsë warmiqa “willakuyanqëki alläpa väleq kaptinchi qamkunaqa tsëta rurayanki” nirqan.

11. ¿Imanötan alistakushwan juk idiömata parlaq nunakunata parlapänapaq?

¹¹ Rasunmi, juk idiömata yachakuytaqa capaz llapantsiktsu puëdishun. Tsënö kaptimpis, juk idiömata parlaq nunakunata Diospa Gobiernumpita yachatsinapaqmi imëpis listu këkänantsik. Juknöpaqa tsëta rurashun JW Language^® neq aplicacionta utilizarmi. Tsëmi yanapamäshun sitiuntsikchö parlayanqan idiömakunachö nunakunata saludëta yachakunapaq. Nunakuna mas yachakuyta munayänampaqnö imata ninapaq kaqtapis yachakuyta puëdintsikmi. Internetchö jw.org päginaman yëkuyänampaqpis nirishwanmi, o parlayanqan idiömachömi  videukunata y publicacionkunata rikäratsishwan. Tsëkunata alli provecharqa, idiömankunachö parlapäyaptin nunakuna espantakuyanqanta rikar punta cristiänukuna kushikuyanqannömi noqantsikpis kushikushun.

12. (1) ¿Imanötan Diospa willakoqnin Joelqa Pentecostes Fiestachö pasanqampaq unëpitana willakurqan? (2) ¿Imanirtan punta cristiänukunaqa Joel willakunqan cumplikänanta shuyëkäyarqan?

¹² Pasanqampita yachakur sïguishun. “Pëdruqa [...] sharkurmi” tsëchö këkaq mëtsë nacionpita nunakunata parlaparqan (Hëch. 2:14). Wiyëkaqninkunatam nirqan Teyta Dios willakunqan cumplikaptin juk idiömakunachö parlëkäyanqanta. Teyta Diosqa willakoqnin Joelwanmi unëpitana kënö nir willakushqa karqan: “Tukuyläya nunakunata[m] podernïwan yanapashaq” (Joel 2:28). Punta cristiänukunaqa tsënö pasanampaq kaqtam shuyëkäyarqan. ¿Imanir? Manaraq ciëluta ëwakurmi Jesusqa qateqninkunata kënö änishqa karqan: “Noqa Teytata rogakuptïmi, pëqa qamkunawan imëpis kanampaq juk mas yanapakoqta dispunimunqa: [...] santu espïrituta” (Juan 14:16, 17).

13, 14. ¿Imatataq Pëdru rurarqan nunakunapa shonqunman chänampaq, y imanötan pënölla rurashwan?

¹³ Yachatsikunqanta ushëkarmi Pëdruqa kënö cläru nirqan: “Llapan Israel nunakuna alli cläru musyayätsun, qamkuna qeruchö wanutsiyanqëki Jesusta, Señor kanampaq y Cristu kanampaq Teyta Dios churanqanta” (Hëch. 2:36). Rasunmi, tsëchö këkaqkunapitaqa atskaqmi Jesusta qeruchö wanutsiyaptin tsëchötsu këkäyarqan. Peru Jesusta wanutseq nacionpita karmi pëkunapis culpayoq kayarqan. Tsënö kaptimpis,  Pëdruqa shonqunkunaman chëta munarmi judïu mayinkunata respëtuwan parlaparqan. Manam pëkunata condenëtatsu munarqan, sinöqa arrepentikuyänantam. Judïu mayinkunaqa manam ofendikuyarqantsu. Tsëpa rantinqa, “shonqunkunachö alläpa llakikur[mi]”, “¿imatataq rurayäshaq?” nir tapuyarqan. Pëdruqa respëtuwan parlaparmi wiyëkaqninkunapa shonqunman charqan y arrepentikuyänampaq yanaparqan (Hëch. 2:37).

¹⁴ Nunakunapa shonqunman chänapaqqa noqantsikpis Pëdrunömi ruranantsik. Yachatsikushqa nunakuna mana rasumpa kaqta nimashqaqa, manam llapan nimanqantsiktatsu correginantsik. Tsëpa rantinqa, imachöpis acuerdu kanqantsikpitam parlapänantsik, tsëpitanam Diospa Palabranchö ninqantapis entiendiratsishwan. Pëdru ruranqannölla respëtuwan parlapashqaqa, alli shonquyoq nunakunaqa masmi wiyakuyta munayanqa.

15. (1) ¿Imatataq judïukunata y judaismu religionman yëkushqakunata Pëdru nirqan, y imatataq pëkuna rurayarqan? (2) ¿Imanötan musyantsik bautizakoq nunakunaqa bautizakuyänampaq listu këkäyanqanta?

¹⁵ Tsë kushikuypaq junaqqa, ninqankunata shumaq chaskikoq judïukunata y judaismu religionman yëkushqakunatam Pëdruqa kënö nirqan: “Arrepentikuyë, y [...] cada ünu [...] bautizakuyë” (Hëch. 2:38). Tsënö niptinmi tres milnö nunakuna bautizakuyarqan. Capazchi tsë nunakunaqa Jerusalenchö y amänunchö këkaq jatun pözukunachö bautizakuyarqan. e ¿Mana pensashpaku pëkunaqa bautizakuyarqan? Këchö willakunqanqa, ¿Bibliapita  yachakuykaqkuna y Testïgukunapa wamrankunapis, manaraq listu këkarpis, prontulla bautizakuyänampaq kaqtaku rikätsikun? ¡Manam tsënötsu! Pentecostes Fiestachö bautizakoq judïukuna y judaismu religionman yëkushqakunaqa, Bibliatam alli estudiayaq y sirwiyänampaq Jehovä akranqan nacionpitam kayarqan. Manam tsëllatsu, Dios mandakunqanta cäsukurmi, wakinqa alläpa karupita tsë fiestaman ëwashqa kayarqan. Pëkunaqa Teyta Dios rurëta munanqanchö Jesucristu imanö yanapakunqanllatanam yachakuyänan karqan. Tsëta musyarirqa, Teyta Diosta sirwir sïguiyänampaqmi listuna këkäyarqan. Peru kananqa Diospa sirweqnin y Cristupa qateqninnam kayänan karqan.

16. ¿Imanötan punta cristiänukunaqa alli nuna kayanqanta rikätsikuyarqan?

¹⁶ Tsë nunakunata Jehovä bendicikanqantaqa musyantsik, Bibliachö kënö willakuptinmi: “Llapan creikoq tikraqkunam juntu këkäyarqan, y imëkankunatam rakipänakuyaq, chakrankunata y imëkankunata rantikuykurmi, cada ünuta wanayanqanmannö tsë qellëta entregayarqan” (Hëch. 2:44, 45). f Punta cristiänukuna rurayanqannömi, kanan witsan cristiänukunapis kuyakoq y alli nuna kanantsik.

17. ¿Imatataq rurayänan bautizakuyta munaqkuna?

¹⁷ Kanan witsampis, Diosllatana sirwiyänampaq bautizakuyta munaqkunaqa Bibliachö ninqantaran rurayänan. Puntataqa Bibliapitam yachakuyänan (Juan 17:3). Tsëpitanam Diosman markäkuyänan o yärakuyänan, y unë mana allikunata rurayanqampita llakikurmi tsëkunapita arrepentikuyänan (Hëch. 3:19). Tsëpitanam imanö kawayanqanta cambiayänan y Jehovä munanqannöna kawayänan (Rom. 12:2; Efes. 4:23, 24). Tsëkunata rurar-ran, Diosman mañakur pëllatana sirwiyänampaq änikuyta y bautizakuyta puëdiyanqa (Mat. 16:24; 1 Pëd. 3:21).

18. ¿Imapitataq bautizakushqana cristiänukunaqa kushikuyan?

¹⁸ Qamqa, ¿Jehovällatana sirwinëkipaq änikurqunkinaku y bautizakurqunkinaku? Tsëta rurashqana kaptikiqa, punta cristiänukunata yanapanqannömi Jehoväqa santu espïritunwan qamtapis yanapashunki. Tsëmi nunakunata rasumpa kaqta yachatsinëkipaq y Dios munanqanta ruranëkipaq yanapashunki. ¡Jehovä yanapamanqantsikta musyëqa alläpa kushikuypaqmi!