1 KAQ YACHAKUNËKIPAQ

¿Imanirtan Bibliapita yachakuyqa alli?

KICHË

Kë vïdachöqa imëkapaqmi yarpachakuntsik: kikintsikpaq, familiantsikkunapaq y jukkunapaqpis. “¿Imanöraq familiäwan kushishqa kawakuyäman? ¿Imataraq ruräman imäkunapis mana faltanampaq? ¿Imanöraq warë warätin kashaq?” nirmi yarpachakuntsik. Bibliachöqa llapan musyëta munanqantsikmi qellqarëkan, y atskaqmi tsëkunata yachakurnin kushishqana kawakuyan. ¿Bibliapita yachakuyqa pillatapis reqinqëkita yanapanmantsuraq?

1 KAQ: Bibliapita yachakurqa, ¿imakunatatan musyashun?

Bibliapita yachakurqa musyashun Patsachö nuna imanö kawar qallanqanta, imapaq kë munduchö kawanqantsikta, imanir imëka sufrimientu kanqanta, wanushqakunapaq Bibliachö ima ninqanta, alli kawakuyta munëkarpis guërrakunata imanir rurayanqanta, kë Patsata ima pasanampaq kaqta, y maskunatam. Atska millon nunakunam tsëkunata yachakushqa kar kananqa kushishqana kawakuyan.

2 KAQ: Bibliachö consëjukunaqa, ¿imakunachötan yanapamantsik?

Bibliachöqa alli consëjukunam kan. Tsë consëjukunaqa yanapamantsik familiachö kushishqa kanapaq, mana allikunapa pasar yamë kanapaq, y ima trabäjuchö karpis kushishqa kanapaqmi. Tsëkunata y mastam ichikllapa ichikllapa yachakunki, y Bibliachö ‘llapan qellqarëkaq [...] alli’ kanqantam cuentata qokunki (2 Timoteu 3:16).

Kë libruqa manam Bibliatsu, sinöqa Bibliapita yachakunëkipaqmi yanapashunki. Tsëmi Bibliachö ima ninqanta ashinëkipaq yuriptinqa llapanta leyinëki y imata yachatsikunqanman pensanëki.

MASLLA YACHAKUSHUN

Jukkunata Biblia imanö yanapanqanta, Bibliata leyi gustamänapaq imata ruranapaq kaqta, y pillapis yanapamashqaraq alli entiendinapaq kaqtam yachakushun.

3 KAQ: Bibliaqa allita ruranapaqmi yanapamantsik

Bibliaqa nänita alli rikänapaq yanapakoq aktsinömi. Imata ruranantsik kaptimpis, ima mas alli kanqanta musyanapaq, y warë warätin ima pasanampaq kaqta musyanapaqmi yanapamantsik.

Leyiyë Salmus 119:105 ima ninqanta y këkunapaq parlayë:

Salmus 119:105 qellqaqqa, ¿ima nirqantaq Bibliapaq?
¿Qamqa ima ninkitan?

4 KAQ: Llapan musyëta munanqantsiktam Bibliachöqa yachakuntsik

Juk warmish unëpana musyëta munanqanta Bibliachö yachakunaq. VIDEUTA rikäyë y këkunapaq parlayë:

VIDEU: Bibliachöqa llapan musyëta munanqantsikmi këkan (1:48)

Kë videuchö warmiqa, ¿imakunatatan musyëta munarqan?
Bibliapita yachakunqanqa, ¿imanötan yanaparqan?

Llapan musyëta munanqantsikta yachakuyta procuranapaqmi Bibliachöqa nimantsik. Leyiyë Mateu 7:7 ima ninqanta y këkunapaq parlayë:

Qamqa, ¿imatatan imëpis musyëta munashqanki? ¿Bibliaqa yanapashunkimantsuraq tsëta musyanëkipaq?

5 KAQ: Bibliata leyiqa shumaqmi

Biblia leyitaqa atskaqmi gustayan, y imëka allikunatam yachakuyan. VIDEUTA rikäyë y këkunapaq parlayë:

VIDEU: Bibliata leyipaq (2:05)

Videuchö jövinkunaqa, ¿ima niyantan librukuna leyipaq?
Biblia leyipaqqa, ¿ima niyantan?

Bibliapita yachakurqa imapa pasarpis yamëran kawakuntsik y allina kawakunapaq kaqtam yachakuntsik. Leyiyë Romänus 15:4 ima ninqanta y këpaq parlayë:

¿Musyëta munankimantsuraq mana allikunachö tsarakunapaq y kushishqa kanapaq Biblia imanö yanapakunqanta?

6 KAQ: Bibliata alli entiendinapaqqa jukran yanapamänantsik

Bibliataqa cada ünum cuentantsikpa leyinantsik, peru alli entiendinapaqqa jukraq yanapamänatam necesitantsik. Leyiyë Hëchus 8:26-31 ima ninqanta y këpaq parlayë:

Bibliata alli entiendinapaqqa, ¿imatatan necesitantsik? (Rikäyë 30 y 31 kaq versïculukunata).

Etiopïa nacionpita nunataqa jukran yanaparqan Bibliachö leyinqanta entiendinampaq. Kanan witsampis atskaqmi jukkuna yanapayaptinraq Bibliata entiendiyashqa.

WAKIN IMA NIYANQAN: “Bibliapita yachakuyqa qelakunallapaqmi”.

¿Qamqa ima ninkitan?

KËTAM YACHAKURQUNKI

Bibliapita yachakunqantsikqa yanapamantsik alli kawakunapaq, musyëta munanqantsikta musyanapaq, mana allikunapa pasar yamë kanapaq y mana allikuna ushakänampaq kaqta musyanapaqmi.