22 KAQ YACHAKUNËKIPAQ

¿Imanötan alli noticiakunata yachatsikunkiman?

KICHË

Bibliachö rasumpa kaqta yachakurirqa capazchi ninki: “¡Këtaqa jukkunapis yachakuyänanmi!”. Awmi llapankunam yachakuyänan. Peru tsënö pensarpis Bibliapita yachakunqëkita jukkunata parlapëtaqa capazchi mantsapakunki o penqakunki. Këchömi yachakunki Bibliachö alli noticiakunata imanö yachatsikunëkipaq kaqta y tsëta ruranqëki kushishqa kanëkipaq imanö yanapashunqëkita.

1 KAQ: Bibliapita yachakuykanqëkita, ¿imanötan jukkunata parlapankiman?

Jesuspa discïpulunkunam niyarqan: “Manam rikäyanqäpita ni wiyayanqäpita parlëta dejëta puëdiyätsu” (Hëchus 4:20). Pëkunaqa Diospita yachakuyanqanta valorarmi pï mëta yachatsita munayarqan. Pëkunanölla yachatsikuyta munarqa familiëkikunawan y amïguykikunawan juntakunqëki o tinkunqëki höra Diospita parlapärï (leyi Colosensis 4:6).

Diospita yachatsikur imanö qallanëkipaq

Familiëkita Bibliapita parlapänëkipaq capaz kënö nir qallankiman: “Kë semäna yachakunqäqa alläpam gustamashqa”.
Juk amïguyki qeshyaptin o yarpachakuptin Jehovä imanö yanapanampaq kaqta Bibliachö leyipë.
Semäna ushë imata ruranqëkita trabajaq mayikikuna tapupäyäshuptikiqa, Bibliata estudiar o reunionchö yachakunqëkikunata parlapë.
Internetchö jw.org päginaman yëkuyänampaq amïguykikunata yachatsi.
Bibliata estudiayanqëki höra jukkunata invitë o jw.org päginachö Bibliapita yachakuyta munanqanta qellqanampaq niri.

2 KAQ: ¿Imanirtan wawqi panikunawan Diospita yachatsikunëki?

Jesuspa discïpulunkunaqa manam reqiyanqankunallatatsu Diospita yachatsiyarqan sinöqa llapan nunakunatam. Tsëmi Jesusqa ishkë ishkë mandarqan kikin ëwanampaq kaq llapan markakunaman y sitiukunaman Diospita yachatsikoq ëwayänampaq (Lücas 10:1). Tsënö yachatsikurmi mëtsika nunakunata Diospita yachatsiyarqan. Y juntu yachatsikuyanqanqa mas kushishqa sientikuyämpaqmi yanaparqan (Lücas 10:17). Allichi kanman wawqi panikunawan yachatsikoq yarqunëkipaq churapakanqëki.

MASLLA YACHAKUSHUN

Diospita mana mantsakushpa yachatsikunëkipaq y yachatsikur kushishqa kanëkipaq kaqtam yachakushun.

3 KAQ: Jehovämi yanapashunki

Wakinkunaqa Diospita yachatsikuyta mantsayan nunakuna imataraq niyämanqa o imataraq noqapaq pensayanqa nirmi.

Yachakuykanqëkita jukkunata parlapëta pensarqa, ¿imanötan sientikunki? ¿Imanir?

VIDEUTA rikäyë y këpaq parlayë:

VIDEU: Jehovätam mañakurqä valienti kanäpaq (4:05)

Videuchö rikanqantsik jövinkunataqa, ¿imatan yanaparqan Diospita yachatsikuyänampaq?

Leyiyë Isaïas 41:10 ima ninqanta y këpaq parlayë:

Diospita yachatsikuyta mantsapakurqa, ¿imanirtan Jehoväman mañakunëki?

¿Musyarqëkiku?

Mëtsikaq Testïgukunam pensayashqa Diospita yachatsikuyta mana puëdiyänampaq kaqta. Sergey jutiyoq Testïgush imapaqpis mana välinqanta y pitapis parlapëta mana puëdinampaq kaqta pensanaq. Tsënö kaptimpis, Bibliapita yachakurir imata ruranqanta willakurmi kënö nin: “Mantsapakuykarpis yachakunqäkunatam jukkunata parlapar qallarqä, tsëmi yanapamarqan allina sientikunäpaq y yachakunqäkunata mas yarpänäpaq”.

4 KAQ: Respëtuwanmi pitapis parlapänëki

Pitapis Diospita manaraq parlaparmi imata y imanö parlapänëkipaq kaqta pensanëki. Leyiyë 2 Timoteu 2:24 y 1 Pëdru 3:15 ima ninqanta y këkunapaq parlayë:

Këchö leyinqantsikta, ¿imanötan cuentachö katsinkiman Diospita yachatsikur?
Familiëkikuna y amïguykikuna yachatsinqëkita mana creiyaptin o mana cäsukuyaptinqa, ¿imatataq rurankiman? ¿Y imatataq rurankimantsu?
Yachatsinqëkita creiyänampaq obliganëkipa rantin, ¿imanirtan respëtuwan parlapänëki?

5 KAQ: Diospita yachatsikurqa kushishqam kantsik

Gobiernumpita alli noticiakunata willakunampaqmi Jehoväqa Jesusta mandarqan. Y Jesusqa, ¿imanötan Jehovä mandanqanta cumplirqan? Leyiyë Juan 4:34 ima ninqanta y këkunapaq parlayë:

Alli mikurqa kushishqa y allim kawakuntsik. ¿Imanirtan Jesusqa nirqan Diospita yachatsikuyqa mikuy cuenta kanqanta?
Diospita yachatsikunqëki, ¿kushishqa kanëkipaq yanapashunkimantsuraq?

Këkunata rurë:

Nunakunata Diospita parlapar qallanapaq reunionkunachö yachatsikayämunqanta yachakuy.
Bibliapita yachëkätsishoqnikita tapuy reunionkunachö demostracionkunata ruranëkipaq imata ruranëkipaq kaqta. Tsë demostracionkunata ruranqëkim yanapashunki mas alli yachatsikunëkipaq.
Kë libruchö “Wakin ima niyanqan” y “Wakin imata tapumanqantsik” ninqampita yachakuy nunakuna imatapis tapuyäshuptiki yachatsinëkipaq.

WAKIN IMATA TAPUMANQANTSIK: “¿Imanötan këkanki? ¿Imatataq kë semäna rurarqunki?”.