44 KAQ YACHAKUNËKIPAQ
¿Llapan fiestakunatsuraq Diosnintsikpaq alli?
Teytantsik Jehoväqa kushishqa kanata munarmi fiestata rurar familiantsikkunawan y amïguntsikkunawan juntakänata munan. Peru Jehoväqa manam munantsu llapan fiestakunata celebranantsikta. Tsëqa, ¿imanötan rikätsikushwan Jehoväta kuyanqantsikta y imanö sientikunqanta cuentachö katsinqantsikta?
1 KAQ: ¿Imanirtan Jehoväqa munantsu wakin fiestakunata ruranantsikta?
Ruranqëki fiestakuna mana alli religionkunapita kanqanta y Bibliachö ninqampa contran kanqanta musyarirqa capazchi creirinkitsu. Wakin fiestakunachöqa nunakunapa almankuna mana wanunqantam creitsikuyan, y demoniukuna rurayanqankunawanmi kushikuyan. Wakin fiestakunatanam rurayan ima mana allipis pasananta mantsar y alli suertiyoq këta munar (Isaïas 65:11). Tsëmi Jehoväqa sirweqninkunata kënö nin: ‘Pëkunapita witikuriyë y rakikäkuriyë [...] y mana limpiu kaqkunata ama yatayënatsu’ (2 Corintius 6:17). a
2 KAQ: ¿Ima nintan Jehovä nunakunata alabar fiestata rurayaptin?
Jehoväqa nin, “nuna mayinman confiakoq” kaqqa mana allichö ushanampaq kaqtam (leyi Jeremïas 17:5). Wakin fiestakunataqa rurayan gobernantikunapa, nacionninta defendeq nunakunapa, bandërakunapa y nacionninkunapa aniversariunta yarparmi (1 Juan 5:21). Wakinkunanam campäñata rurar o derëchunkunata respetatsita munar fiestata rurayan. Juk nunata alläpa respetar jutinchö fiestata rurashqa o Jehoväpa contran këkaptin ima fiestachöpis yanapakushqaqa, ¿imanöraq Jehovä sientikunman?
3 KAQ: ¿Fiestakunachö imakunata rurayanqantaq Jehoväta gustantsu?
Bibliachöqa nin, ‘mana controlakushpa upuyanqan’, ‘lluta portakuyänan fiestakunachö kayanqan’ y ‘machakuyanqanqa’ alläpa mana alli kanqantam (1 Pëdru 4:3). Wakin fiestakunachöqa mana allim nunakuna portakuyan y melanëpaq rurëkunatam rurayan. Tsëmi Jehoväwan amïgu kanantsikpaqqa tsë mana alli fiestakunachö kanantsiktsu ni melanëpaq rurëkunata ruranantsiktsu.
MASLLA YACHAKUSHUN
Ima fiesta kaptimpis, Jehovä munanqannö decidinëkipaq y ruranqëkiwan kushitsinëkipaq kaqtam yachakushun.
4 KAQ: Jehovä chikinqan fiestakunata rurayaptin ama mëtikushuntsu
Leyiyë Efesius 5:10 ima ninqanta y këkunapaq parlayë:
-
¿Imatataq cuentachö katsinantsik juk fiestata celebranapaq o mana celebranapaq?
-
¿Ima fiestakunatataq markëkichö rurayan?
-
Tsë fiestakunaqa, ¿Jehoväta gustantsuraq?
Pensarishun cumpleäñu fiestallaman. Bibliachöqa manam nintsu Jehoväpa sirweqninkuna cumpleäñunkunata celebrashqa kayanqanta, peru willakunmi Jehoväta mana adoraq nunakuna cumpleäñunkunata celebrayanqanta. Leyiyë Genesis 40:20-22 y Mateu 14:6-10 ima ninqanta y këkunapaq parlayë:
-
¿Imatan pasarqan tsë cumpleäñu fiestakunachö?
-
Kë textukunata leyirirqa, ¿ima ninkitaq? Teytantsik Jehoväpaqqa, ¿allitsuraq cumpleäñu fiestakunata rurayanqan?
¿Imanöraq Jehovä sientikunman cumpleäñuta celebraptiki o Biblia ninqampa contran rurayanqan fiestakunaman ëwaptiki? Leyiyë Exodu 32:1-8 ima ninqanta, VIDEUTA rikäyë y këkunapaq parlayë:
-
¿Imanirtan alli musyanantsik ruranqantsikkuna Jehoväta gustanqanta o mana gustanqanta?
-
¿Imanötan tsëta musyashwan?
Juk fiesta alli o mana alli kanqanta musyanapaqqa këkunatam musyanantsik
-
Tsë fiestapaqqa, ¿ima nintaq Bibliachö? Tsë fiesta mëpita yurimunqanta y imanir rurayanqantam musyanantsik.
-
Tsë fiestataqa rurayan, ¿nunakunata yarpäyänampaq o bandërankunata adorayänampaqku? Jehoväpa sirweqninkunaqa Jehovällatam adorantsik y pëlla llapantapis altsamunampaq kaqmanmi confiakuntsik.
-
Tsë fiestachöqa, ¿Jehovä melananqan cösaskunataku rurayan? Jehoväpa sirweqninkunaqa mana allikuna y melanëpaq rurëkunataqa manam rurantsiktsu.
5 KAQ: Fiestakunata imanir mana celebranqëkita jukkunata entienditsi
Fiestakunaman invitamashqa imanir mana ëwanantsikpaq kaqta ninanqa manam fäciltsu. Tsëmi imanir mana ëwanqëkita pacienciawan y respëtuwan entienditsinëki. Juk warmi tsënö ruranqanta VIDEUCHÖ rikäyë.
Leyiyë Mateu 7:12 ima ninqanta y këkunapaq parlayë:
-
Kë textuchö ninqannöpis, ¿noqantsik creinqantsiknö mana creikoq familiantsikkunata michashwantsuraq fiestakunata rurayänanta?
-
Celebrayanqan fiestakunaman mana ëwarpis, ¿imanötan rikätsikunkiman familiëkita kuyanqëkita y respetanqëkita?
6 KAQ: Jehoväqa kushishqa kanatam munan
Jehoväqa munan familiantsikkunawan y amïguntsikkunawan juntakar kushishqa kanatam. Leyiyë Eclesiastes 8:15 ima ninqanta y këpaq parlayë:
-
Leyirinqantsiknöpis, ¿imanö kawakunatataq Jehoväqa munan?
Jehoväqa munan, sirweqninkuna juntakar imallatapis rurar kushishqa kayänantam. VIDEUCHÖ rikäyë Jehoväta sirweqkuna asamblëakunachö imanö kushishqa kayanqäta.
Leyiyë Gälatas 6:10 ima ninqanta y këkunapaq parlayë:
-
Jukkunata imatapis qarëta munar o yanapëta munarqa, ¿fiestataraqku ruranantsik?
-
Qampaqqa imatan mas alli kanman, ¿mana puëdikarpis fiesta witsankunaraq imatapis qarakunqëkiku, o kapushunqëki höra kushishqa qarakunqëkiku?
-
Testïgukunaqa wamrankuna kushikuyänampaqmi juntakar imallatapis rurayan o qarayan. Wamrëki kaptinqa, ¿imataraq rurankiman pëkuna kushishqa kayänampaq?
WAKIN IMA NIYANQAN: “Fiestakuna mana alli kaptimpis, masqa välin familiawan y amïgukunawan juntu kanqantsikmi”.
-
Qamqa, ¿ima ninkitan?
KËTAM YACHAKURQUNKI
Jehoväqa munan familiantsikkunawan y amïguntsikkunawan juntakar imallatapis kushikunapaq ruranatam, peru manam munantsu pë chikinqan fiestakunata ruranataqa.
¿Yarpankiku?
-
¿Imatataq rurankiman juk fiesta Jehoväta gustanqanta o mana gustanqanta musyanëkipaq?
-
¿Imanötan familiantsikkunata y amïguntsikkunata entienditsishwan fiestakunata mana celebranqantsikta?
-
¿Imanötan musyantsik kushishqa kanantsikta Jehovä munanqanta?
MASTA YACHAKUY
Jehoväpa sirweqninkuna ima fiestakunata mana celebrayanqanta musyanëkipaq leyi.
“¿Imanirtan Jehoväpa testïgunkunaqa wakin fiestakunata celebrayantsu?” (jw.org päginachö yarqamoq)
Jehoväpa testïgunkuna cumpleäñukunata imanir mana celebrayanqanta yachakuy.
“¿Imanirtan Jehoväpa testïgunkunaqa cumpleäñukunata celebrayantsu?” (jw.org päginachö yarqamoq)
Escuëlankunachö fiestakunata celebrayaptin Jehoväta kuyaq wamrakuna imata rurayanqanta rikë.
¿Imanötan Jehoväpa sirweqninkunaqa sientikuyan navidä fiestata mana celebrayänampaq decidiyanqampita?
“Kananqa mas kushishqam kawakuyan” (Täpakoq, 1 de diciembri 2012)
