1, 2. ¿Imanötaq congregacionkunata watukaq wawqi Biblia willakunqan nunakunata rikaq, y imanir-raq shumaq kanman amïguntsik cuenta kayanqan?

“IMËKA amïgunkunapaqnömi Biblia willakunqan nunakunapaq parlan.” Tsënömi nirqan juk cristiäna congregacionkunata watukaq edäna wawqipa discursunta wiyarir. Y rasun kaqllatam nikarqan, porqui tsë cristiänuqa atska watapanam Bibliata estudiar y yachatsikur këkarqan, tsëmi Bibliachö ollqukunapita y warmikunapitaqa imëka kawëkaqpaqnö y amïgunkunapaqnö parlaq.

² ¿Manaku Diospa Palabran willakunqan nunakunapa amïgun këqa alläpa kushikïpaq kanman? ¿Tsënöku pëkunata rikanki? ¿Imanöraq sientikunkiman Diosta sirweq Noë, Abrahan, Rut, Elïas y Esterwan parlar, juntu kar y mas reqir? ¿Yanapashunkimantsuraq? ¡Mëraq consëjunkunawan y shumaq parlakïninkunawan yanapariyäshunkiman! (Leyi Proverbius 13:20.)

3. a) ¿Imanötaq yanapamashwan Biblia willakunqan markäkoq ollqukuna y warmikuna? b) ¿Ima tapukïkunapitataq yachakushun?

³ Alli ruraqkuna kawariyämuptinqa, kushishqam pëkunawan kawashun y amïgu kashun (Hëch. 24:15). Peru markäkoq (yärakoq) unë ollqukuna y warmikunaqa kanan witsampis yanapamashwanmi. ¿Imanö? Apostul Pablum imata ruranapaq kaqtapis kënö willamantsik: “Diosman marcäcoqcuna cawayanqannolla qamcunapis peman marcäcur imepis cawacuyë” (Heb. 6:12). Manaraq pëkunapita yachakurnin, Pablu ninqampaq tapukïkunapita yachakurishun: ¿Imataq markäkï, y imanirtaq wanantsik? ¿Imanötaq unë tiempu Diosta sirweqkunapita yachakushwan?

4. ¿Imatataq markäkïpaq nunakuna pensayan, y imanirtaq pantashqa kayan?

⁴ Markäkïqa alläpa kuyëpaqmi, Biblia willakunqan nunakuna alläpa precisaqpaq churayanqampitam kë libruchö yachakushun. Peru kanan witsan nunakunaqa manam precisaqpaqtsu churayan. Markäkïqa lluta creikïlla kanqantam pensayan. Peru ¿tsënötsuraq? Manam, rasumpa markäkïqa manam kushikur creikïllatsu ni Diosman  wisku cuenta creikïllatsu. Porqui shonquntsikchö imata munanqantsikqa cambiarinmanmi. Jina manam Diosman creikïllatsu, Bibliaqa “supëcunapis jucllella Dios cashqanta creyir[mi] mantsacashqa carcaryäyan” nirmi willakun (Sant. 2:19).

5, 6. a) ¿Imakunachötaq markäkïnintsik patsakashqa këkan? b) ¿Ima igualatsikïtaq rikätsikun markäkïnintsik alli patsakashqa kanampaq kaqta?

⁵ Rasumpa markäkïqa manam wakinkuna pensayanqannöllatsu. Markäkïpaq Biblia ima ninqanta rikärishun (leyi Hebrëus 11:1). Pabluqa ishkënöpam rikätsikurqan markäkï ima kanqanta. Juk kaqqa, “mana ricanqantsiccunatapis rasonpa ricarim”; tsëkunaqa kayan Jehovä, tsurin Jesus y ciëluchö mandakïkaq Diospa Gobiernunmi, y tsëkunataqa manam rikëta puëdintsiktsu. Juknin kaqnam, manaraq chämushqa këkaptin “rasonpa chasquinantsicpaq caqta seguracur [shuyaquï]”. Këllaman pensarishun, Diospa Gobiernun ichikllachöna mushoq Patsata apamunampaq kaqtaqa manam rikëta puëdintsiktsu. Tsëqa, ¿rasun kanqanman y chämunampaq kaqman markäkurnin shuyarëkanqantsik ardëlla kanqantaku rikätsun?

⁶ Manam. Apostul Pablum cläru rikätsikun rasumpa markäkïqa alli patsakashqa këkanqanta. Markäkïqa ‘rasonpa chasquinantsicpaq caqta seguracur shuyaquïmi’ neq palabrakunataqa, “wayipa escritüran o tïtulun” nirpis tumatsiyanmi. Pipis juk wayiki qarëkuyäshunkiman. Wayipa tïtulunta qorishurniki, “kaq këmi wayiki” nirishunkiman. Tsënö nirqa manam tsë escritüra papel wayiki kanqantatsu nikäshunki, peru tsë papelmi rikätsikun tsë wayiqa qampana kanqanta, juk parlakïchöqa, tsë escritüra papelmi wayiki cuenta. Tsënö kaqllam markäkïqa seguramantsik Palabranchö Dios awnikunqankunaqa llapan cumplikänampaq kaqta.

7. ¿Imataq rasumpa markäkïqa?

⁷ Rasumpa markäkïqa (yärakuyqa) Jehoväman llapan shonquwan y rasumpa confiakïmi. Tsënö markäkïyoq karmi Diosnintsikta rikantsik kuyakoq teytatanö y llapan awnikunqanta cumplimunampaq kaqta següru kantsik. Peru manam tsëllatsu. Imanömi nunaqa mikïta wanantsik, tsënöllam markäkïwampis pasan. Rurënintsikwanmi rikätsikunantsik, y mana tsënö rurashqaqa ushakärinmanmi (Sant. 2:26).

8. ¿Imanirtaq markäkï alläpa precisan?

⁸ ¿Imanirtaq markäkïqa alläpa precisan?  Apostul Pablum imanir alläpa precisanqanta rikätsikun (leyi Hebrëus 11:6). Mana markäkurqa Diosman witita manam puëdishuntsu ni rikënimpaq allitsu kashun. Tsëmi, ciëluchö Teytantsik Jehoväman witinapaq y pëta alabanapaqqa markäkoq kanantsik alläpa precisan.

9. ¿Imanötaq Jehovä rikätsikushqa markäkïta wananqantsikta musyanqanta?

⁹ Markäkïta alläpa wananqantsiktam Jehoväqa musyan, tsëmi alliyätsinapaq y imanö rikätsikunapaq yanapakïkunata qomantsik. Juk kaqqa, alli markäkïyoq congregacionta rikaq cristiänukunam kayan, tsëmi “qamcunapis pecunano Diosman marcäcoq [cayë]” nir Biblia consejamantsik (Heb. 13:7). Jina “atsca nunacuna Diosman marcä[coqcunapaqmi]” Pabluqa parlarqan, y pëkunaqa Diosta sirweq unë ollqukuna y warmikunam kayarqan (Heb. 12:1). Apostul Pabluqa Hebrëus librupa 11 capïtulunchömi wakinkunapaq parlarqan, peru masran kayan. Tukï edäyoq ollqukunapa y warmikunapa kawënimpita y imapa pasayanqampita willakïkunam Bibliachöqa atska këkan. Markäkïta precisaqpaq manana churayanqan witsanchöqa, pëkunapita yachakunqantsikmi alli yanapamäshun.

10. ¿Imanötaq japallantsik estudianqantsik yanapamashwan Biblia willakunqan markäkoq ollqukunapita y warmikunapita yachakunapaq?

¹⁰ Pitapis manaraq alli reqirninqa, manam pëpita yachakïta puëdishwantsu. Tsëmi kë libru rurakämunampaqqa alliraq estudiayarqö, tsënöpa markäkoq ollqukunata y warmikunata rikëkaq cuenta pëkunapita yachakunëkipaq. ¿Manatsuraq juk publicacionkunapa yanapakïninwan tsë yachatsikïpita mas yachakurinkiman? Japallëki Bibliata estudianqëki höra tsënö ruranëkipaqmi niriyaq. Jina sitiukuna imanö kanqanman y imanö witsankunachö cada willakï pasanqanman pensar leyi. Jirkakunata rikëkanqëkiman, imëka pukutaqta mäkïkanqëkiman, y tsë kinrëchö pasëkanqanta wiyëkanqëkiman pensë. Y tsëpitapis masqa, tsë nunakuna imata pensayanqanta y sientiyanqanta entiendita tïrë. Diosta unë sirweqkuna pasayanqanman churakar yachakuptikiqa, imëka kawëkaq cuentam qampaq kayanqa. ¡Pëkunapita mas yachakuptikiqa, amïguïkikuna cuentam kayanqa!

11, 12. a) ¿Imanöraq Abrahanpa y Särapa amïgunnö sientikushwan? b) ¿Imanötaq Änapita, Elïaspita y Samuelpita yachakunqantsik yanapamashwan?

¹¹ Diosta sirweq unë nunakunapita mas  yachakurmi, pëkunanö këta munanki. Këllaman pensari, yachatsikoqkunata wanayanqan markaman yanapakoq ëwanëkipaq Jehovä invitayäshunkiman, o yachatsikunan sasanö (ajanö) kanqanta ruranëkipaq niriyäshunkiman. Tsë precisaqta ruranëkipaq kaqman pensar respëtuwan Jehoväman mañakuptikiqa, Abrahan ruranqampita yachakunqëkim yanaparishunki. Pëwan Säraqa Ur markachö llapanninkunata jaqirirmi juk markata ëwakuyarqan, y tsënöpam imëka bendicionkunata chaskiyarqan. Rurayanqanta qatiptikiqa, imëka amïguïki cuentam pëkuna kayanqa.

¹² Kananna pensari pillapis mana alli tratashunqëkiman y tsëna reunionkunaman ëwëtapis munankinatsu. Tsëta pasaptikiqa Änaman pensanqëkim yanaparishunki, Peninä tukïta rurar llakitsiptimpis Jehovä sirwitaqa manam jaqirqantsu. Ruranqampita yachakunqëkiqa alli kaqta akranëkipaqmi yanapashunki, y mas rasumpanömi Äna qampaq kanqa. Jina ruranqëkikuna imachöpis mana yanapakoqnö kanqanta pensarqa, itsa Elïasnö sientikunki. Kawënimpaq Diospa Palabran willakunqanchömi rikanki, Elïasqa imëka pruëbakunata pasanqanta y Jehovä imanö shoqanqanta y tsapanqanta. ¿Ima nishwanraq jövinkunata yanaqinkuna mana alli rurëkunaman inkitayanqampitaqa? Samuelpita yachakuyanqanmi yanaparinqa, Diospa carpa wayinchö Elïpa tsurinkuna mana allita rurayaptimpis, pëqa tsë rurëninkunaman manam ishkirqantsu.

13. ¿Biblia willakunqan nunakunapa markäkïninkunapita yachakunqantsikqa markäkïnintsik mana kaqlla kanqantaku rikätsikun? Willakaramï.

¹³ ¿Diosta unë sirweqkunapita yachakunqantsikqa rikätsikun markäkïnintsik mana kaqlla y mana rasumpa kanqantaku? ¡Manam! Kikin Diospa Palabranmi nin tsë ollqukunapa y warmikunapa markäkïninkunapita yachakunapaq (1 Cor. 4:16; 11:1; 2 Tes. 3:7, 9). Jina kë libru willakunqan nunakunapis, Diosta sirweq mas puntata kawashqa nunakunapitam yachakuyarqan. Këllaman pensarishun, kë librupa 17 kaq capïtulunchömi Äna mañakur parlanqanta Marïapis mañakïninchö wakin wakinta utilisarqan, tsëta ruranqanmi rikätsikun Änapita yachakunqanta. ¿Tsëqa Marïapa markäkïnin mana kaqlla kanqantaku rikätsikun? Manam. Änapita yachakunqanmi Marïataqa yanaparqan Jehoväman mas markäkunampaq y pëpa rikëninchö alli warmi kanampaq.

14, 15. ¿Ima yanapakïkunataq kë libruchö kan, y imanötaq alli provechashwan?

 ¹⁴ Markäkïnintsikta (yärakuynintsikta) alliyätsinapaqmi kë libruqa yanapamäshun. Kë librupa yachatsikïninkunaqa 2008-2013 watakuna españolchö yarqamoq Täpakoq revistachö “Pëkunapita yachakushun” neq yachatsikïkunapitam jorqakämushqa. Tsënö kaptimpis, yapakashqaran mas yachatsikïkuna. Cada capïtulu imapita yachatsikunqanta yachakunapaq y imanö yanapamanqantsikta musyanapaqmi tapukïninkuna yanapamäshun. Kë librumanqa shumaq coloryoq dibüjukunatam churayämushqa, y revistachö yarqamoq wakin dibüjukunatapis altsapäyashqam o mastam churayashqa. Jina kë libruchöqa precisaq yanapakïkunam kan; imë tiempuchö pasanqan willakïkuna y ishkë mäpakuna. Kë librupitaqa japallantsik y congregacionchö yachakïtapis puëdintsikmi. Jina familiakunapis juntu yachakïta puëdiyanqam. ¿Imanirtaq willakïninkunata sinchipa leyiriyankitsu? ¡Tsënö rurayaptikiqa alläpam gustayäshunki!

¹⁵ Diosta sirweq unë nunakuna rurayanqampita yachakunapaqmi kë libruqa yanapamäshun. Leyinqantsikmannömi markäkïnintsik mas alliyanqa, y tsënöpam ciëluchö Teytantsik Jehoväman mas witishun.