Zacarïaspa y Elisabetpa wamrankunam Juanqa karqan. Pëtaqa willakoqnin kanampaqmi Jehovä churarqan, y Mesïas chänampaqna kaqta willakunampaqmi mandarqan. Peru pëqa manam markakunachötsu ni Diosta adorayänan wayikunachötsu yachatsikoq, sinöqa tsunyaq sitiukunachömi. Mëtsikaq nunakunam Jerusalenpita y entëru Judëapita pëta wiyakoq ëwayaq. Tsënam, “Diosta kushitsita munarqa mana alli rurëkunata jaqiyë” nishpa yachatseq. Tsëmi jutsankunapita mëtsikaq arrepentikuyarqan, y Juanqa Jordan mayuchömi pëkunata bautizarqan.

Juanqa waktsallam karqan. Camëllupa millwampita rurashqa röpawanmi pureq, y pinteq kurukunata y tuna abëjakunapa mishkintam mikoq. Nunakunaqa pï kanqantam musyëta munayaq. Hasta orgullösu fariseukuna y saduceukunapis rikaqmi ëwayarqan. Tsëmi Juanqa kënö nirqan: “Arrepentikuyänëkim y cambiayänëkim. Qamkunaqa ‘Abrahanpa tsurinkunam kayä’ nirmi alli tukuyanki, peru tsëqa manam Diospa tsurinkuna kayanqëkitatsu rikätsikun”.

Pï mëmi, “¿imatataq rurayänä Diosta kushitsiyänäpaq?” nishpa Juanta tapukuyaq. Tsënam, “röpëkikuna ishkë kayäpushuptikiqa, wanaq kaqta jukninta qoykuyë” nishpa contestaq. ¿Y imanirtaq tsënöqa neq? Diosta kushitsita munarqa nuna mayinkunata kuyayänan precisanqanta musyayänampaqmi.

Jina impuestu cobrakoqkunatapis, “ama pitapis suwapäyëtsu ni engañayëtsu” nirqanmi. Y soldädukunatanam, “ama ulikuyëtsu ni chaskipakuyëtsu” nirqan.

 Sacerdötikunapis y levïtakunapis ëwayarqanmi Juanta rikaq, nïkurmi, “llapan nunakunam pï kanqëkita musyëta munayan” niyarqan. Tsënam Juanqa kënö nirqan: “Diospa willakoqnin Isaïas ninqannömi noqaqa nunakunata Jehoväman pushanäpaq tsunyaq sitiukunachö willakoq nuna kä”.

Nunakunaqa kushishqam Juan yachatsikunqanta wiyakuyaq, y “¿pëtsuraq Mesïas?” nishpam pï më tapukuyaq. Tsëmi Juanqa kënö nirqan: “Noqapitapis mas puëdeqmi ichikllachöna yurimunqa. Y noqaqa manam llanqinllatapis qotutsinäpaqnötsu kallä. Noqaqa yakuchömi qamkunata bautizayaq, peru pëqa santu espïrituwanmi bautizayäshunki”.