Jesusqa ultimu cënachömi apostolninkunata, “kanan paqasqa llapëkim jaqirayämanki” nirqan. Tsënam Pëdruqa, “llapankuna jaqiriyäshuptikipis, noqaqa manam jaqirishqëkitsu” nirqan. Peru Jesusqa kënömi nirqan: “Manaraq juk gällu cantaptinmi, kima kuti mana reqimanqëkita ninki”.

Jesusta Caifaspa wayinman soldädukuna apayanqan hörapaqqa, cäsi llapan apostolkunam escapakushqa kayarqan. Peru ishkaqqa nunakunawan juntum ëwayarqan. Jukqa Pëdrum karqan. Pëqa Caifaspa wayimpa patiunmanmi yëkurirqan, y qoñükur këkäyanqanmanmi witirirqan. Y atsikyaqchö juk sirwipakoq warmi rikëkurmi, “¡qamtaqa reqeqmi! ¡Qampis Jesuswanmi pureq kanki!” nirqan.

Pëdrunam, “manam noqatsu kä. Pantëkankim” nirqan, y punku kaqtam ëwakurqan. Tsëchöpis juk sirwipakoq warmi rikärirmi tsëchö këkaqkunata, “¡kë nunapis Jesuswanmi pureq!” nirqan. Peru Pëdruqa, “¡piraq Jesuspis kakun!” nirqanmi. Tsëllanam juk nunapis kënö nirqan: “Qampis tsë kastallam kanki. Porqui qampis Jesusnömi Galilëa nunakunanö parlanki”. Y Pëdruqa, “¡manam tsë nunata reqïtsu!” nirqanmi.

Tsë höram juk gällu cantarirqan. Y Pëdruqa Jesus rikarëkanqanta cuentata qokurirmi cenëkäyaptin ninqanta yarpärirqan. Tsëmi waqtata yarqïkur alläpa waqarqan.

Tsëyaqmi Judïukunapa Precisaq Cortimpita kaqkunaqa Caifaspa wayinchö ëllukäyarqan Jesusta juzgayänampaq. Pëkunaqa puntapitanam wanutsita munayarqan, tsëmi imallatapis taripïta munayarqan. Peru manam puëdiyarqantsu imapitapis acusëta. Tsënam Caifasqa, “¿Diospa Tsurinku kanki?” nishpa tapurirqan. Y Jesusqa, “awmi” nirqanmi. Tsënam Caifasqa, “ima mas pruëbatataq wanantsik. ¡Diospa contranmi tsënö parlashqa!” nirqan. Y llapan juzgaqkunam, “kë nunaqa wanïtam merecin” niyarqan. Nïkurmi laqyar, toqapur y nawinta  tsaparkur maqar ushayarqan, y, “¡Diospa willakoqnin karqa, pï laqyashunqëkita willayämë!” nirmi burlakuyarqan.

Patsa waräriptinqa Judïukunapa Precisaq Cortinmanmi Jesusta apayarqan, y yapëmi, “¿Diospa Tsurinku kanki?” nishpa tapuyarqan. Tsënam Jesusqa, “awmi. Kikikikunapis tsëtataq nikäyanki” nirqan. Y yapëmi, “¡Diospa contranmi parlashqa!” nishpa acusayarqan. Nïkurmi Römapita gobernador Ponciu Pilätupa wayinman apayarqan. ¿Y imataq pasakurqan? Rikärishun.