Abrahanwan Säraqa unënam casädu kayarqan. Y Ur markachö shumaq wayinkunata jaqirïkurmi carpakunallachöna täräyarqan. Säraqa Jehoväman confiakurmi kushishqa kawakoq.

Säraqa wamrayoq këtam munarqan, tsëmi Abrahanta kënö nirqan: “Sirwimaqnï Agarchö wamrëki kapushuptikiqa, noqapa cuentam kanqa”. Tiempu pasariptinqa, Agarqa juk ollqu wamratam qeshpikurirqan, y Ismael nirmi jutin churayarqan.

Tsëpita atska tiempu pasariptinmi, Abrahan 99 watayoq këkaptin y Sära 89 watayoq këkaptin, kimaq (kimsaq) nunakuna watukaq chäyarqan. Abrahanqa juk monti jawanmanmi jamatsirqan y mikïninkunam qararqan. ¿Musyankiku tsë watukaqkuna pikuna kayanqanta? Angelkunam kayarqan. Y kënömi Abrahanta niyarqan: “Watanmi qamwan warmiki wamrayoq kayanki”. Säraqa carpa rurinllapitam tsëta wiyëkarqan, tsëmi asinar kikinllachö, “¿kë edäna këkartsuraq wamrayoq këküman?” nirqan.

Qateqnin wataqa Jehoväpa angelnin ninqannöllam Säraqa juk ollqu wamrata qeshpikurirqan. Abrahanqa Isaac nirmi jutin churarqan, tsëqa, “asikï” ninanmi.

 Isaac pitsqa watayoq këkaptinmi Säraqa rikarqan Ismael burlapanqanta. Tsëmi wamranta imapis pasananta mana munar Abrahanta kënö nirqan: “Agartawan Ismaelta këpita qarqurïkï”. Qallananchöqa, Abrahanqa manam munarqantsu warmin ninqanta rurëta. Peru Jehoväpis manam munarqantsu Isaacta imapis pasananta, tsëmi Abrahanta kënö nirqan: “Sära nishunqëkita rurë. Ismaeltaqa noqam cuidashaq. Peru äninqaqkunaqa Isaacwanmi cumplikanqa”.