22 KAQ WILLAKÏ
Puka lamarchömi milagruta rurarqan
Israelïtakuna Egiptupita ëwakushqa kayanqanta wiyarirqa, alläpam faraonqa cölerëkurqan. Soldädunkunatam kënö nirqan: “Guërrapaq rurashqa carrëtäkunata alistayë, y qepankunata ëwashun. Ardëmi libri jaqirirquntsik”. Tsënam soldädunkunata pusharkur israelïtakunata qatipar ëwarqan.
Junaqpaqa juk pukutëwanmi Jehoväqa markanta pusharqan, y paqaspanam, rawrëkaq ninawan. Puka lamar kuchunmanmi chäratsirqan, y tsëchö quedakuyänampaqmi nirqan.
Tsëpitanam, faraonwan tröpankuna qepankunachöna këkaqta rikëkuyarqan. Y lamar kuchunchö karmi ni mëpa escapakïta puëdiyarqantsu. Tsëmi Moisesta piñapëpa kënö niyarqan: “¡Kananqa llapantsikmi ushakäshun! ¿Imapaqtaq Egiptupita jorqayämarqëki?”. Peru Moisesqa kënömi nirqan: “Ama mantsakäyëtsu. Shuyäyë y rikäyë Jehovä imanö salvamänapaq kaqta”. ¿Moisesqa alläpam Jehoväman confiakoq aw?
Tsënam Jehoväqa israelïtakunata nirqan carpankunata ëllupakuyänampaq. Y tsë ampim Jehoväqa pukutëninta kuyuratsirqan israelïtakunapa qepankunaman y Egiptu nunakunapa puntankunaman. Egiptu nunakuna këkäyanqan sitiuqa ampirarqanmi, peru israelïtakuna kaqchöqa atsikyarqanmi.
Tsëpitanam Jehoväqa Moisesta nirqan makinta lamarman kamänampaq. Y kamäriptinmi entëru paqas vienturqan. Tsënam lamarqa ishkëman rakikärirqan y chowpichö näninö quedarirqan. Y millonyëpayan israelïtakunaqa tsaki patsapam juknin läduman tsimpayarqan.
Faraonwan tröpankunaqa israelïtakunapa qepankunatam yëkuyarqan. Peru Jehoväqa llapan Egiptu nunakunatam pantatsir usharqan. Y carrëtankunapa ruëdankunapis yarqukarmi usharqan. Tsënam soldädukunaqa kënö nir qayariyarqan: “¡Këpita ras escapakushun! Porqui markanrëkurmi Jehovä pelyëkan”.
Jehoväqa Moisestam kënö nirqan: “Makikita lamarman kamë”. Tsënam, Egiptu tröpakunapa janankunaman yaku illaqpita kutirirqan. Y Faraonwan llapan soldädunkunam wanuyarqan. Manam jukpis salvakurqantsu.
Tsënam israelïtakunaqa lamarpa wak tsimpanchö Diosta alabar kënö cantayarqan: “Cantarnin Jehoväta alabashaq, porqui alläpa puëdeq kënintam rikätsikushqa. Bestiakunata y soldädukunatam lamarman qarpushqa”. Y warmi kaqkunanam, tushur y panderëtakunata tocar kayarqan. Rasumpa libri tikrarirmi alläpa kushikuyarqan.
“Tsëmi kallpata tsarir kënö nita puëdintsik: ‘Jehovämi yanapamaqnï; manam mantsakäshaqtsu. ¿Imataraq nuna ruramanman?’” (Hebrëus 13:6).