16 KAQ CAPÏTULU
“Diablupa contran churakäyë”
“Diablupa contran churakäyë, y pëqa escaparmi qamkunapita ëwakunqa” (SANTIÄGU 4:7).
1, 2. ¿Imatatan Satanaspita y demoniukunapita musyanantsik?
TEYTANTSIK Jehoväqa shumaq Patsachö kushishqa kawakunantam imëpis munashqa. Tsënö kaptimpis, kanan witsan nunakunaqa Diablupa y demoniukunapa munënintam mas rurayan (2 Corintius 4:4). Pëkunata mana rikashqapis, kayanmi y noqantsikpita mas puëdeqmi kayan.
2 Jehovä Diosnintsik yanapamänapaq kaqta musyarpis, ima rurëkunawan Satanaswan demoniunkuna jutsaman ishkitsimanqantsiktam musyanantsik. ¿Imatatan rurashwan Jehoväta mas kuyanapaq, y Satanaspita cuidakunapaq? Yachakushun.
“QAPAREQ QAYAREQ LEONNÖMI”
3. ¿Imatatan Diablu munantsu?
3 Mana allikunapa pasarqa, nunakuna Jehovä Diosta manana sirwiyänampaq kaqtam Satanasqa nin (leyi Job 2:4, 5). Tsëmi juk nuna Jehoväta reqir qallëkuptinqa, Satanaswan demoniunkuna imëkanöpa michäkuyan. Y Teytantsik Jehoväta sirwiyänampaq änikuyaptin y bautizakuyaptinqa cölerapitapis wanuytam munayan. Bibliaqa nin, Diabluqa “qapareq qayareq leonnömi purikan, pitapis tragakurkïta” munar (1 Pëdru 5:8). Diabluqa manam munantsu Teytantsik Jehoväta kuyarnin sirwinata (Salmus 7:1, 2; 2 Timoteu 3:12).
Jehovä Diosta sirwinqantsikqa, manam ichikllapis Satanasta gustantsu.
4, 5. (1) ¿Imatatan Satanas rurëta puëdintsu? (2) ¿Imanötan Diablupa contran churakashwan?
4 Teytantsik Jehovä mas puëdeq kaptinmi, Satanastawan demoniunkunataqa mantsanantsiktsu. “Jatun ” “mëtsikaq” sirweqninkuna salvakuyänampaqmi Diosnintsikqa änikushqa ( sufrimientupitaRevelacion [Apocalipsis] 7:9, 14). Teyta Dios yanapamashqam, Diabluqa salvakunata michämäshuntsu.
5 Jehovä Diosnintsikta kuyarnin sirwishqaqa, Satanasqa manam ima ruramënintsikta puëdinqatsu. Bibliachöqa nimantsik: “Teyta Dioswan këkäyaptikiqa pëpis qamkunawanmi këkanqa” (2 Crönicas 15:2; leyi 1 Corintius 10:13). Abel, Enoc, Noë, Sära, Moises y mas nunakunaqa, Jehoväta kuyarmi Diablupa contran churakäyarqan (Hebrëus 11:4-40). Noqantsikpis tsënölla ruranapaqmi, Diospa Palabran kënö nimantsik: “Diablupa contran churakäyë, y pëqa escaparmi qamkunapita ëwakunqa” (Santiägu 4:7).
¿IMANIRTAN ALLI TSARAKUNANTSIK?
6. ¿Satanas imatatan munan y imanötan tsëta ruran?
6 Jehovä Dios mas puëdeq kanqanta musyëkarpis, Satanasqa imëkanöpam Diosnintsikta sirwinata michäkun. Diabluqa imëkanöpam ishkitsimënintsikta munan, y tsëkunataqa manam kananllaraqtsu rurëkan. ¿Imanötan ishkitsimantsik?
7. Jehovä Diospa sirweqninkuna, ¿imata rurayänantatan Satanas munan?
7 Apostol Juanmi nirqan: “Mana cäsukoq nunakunaqa Satanaspa makinchömi këkäyan” (1 Juan 5:19). Diospa sirweqninkunapis munëninta rurayänantam Satanasqa munan (Miquëas 4:1; Juan 15:19; Revelacion 12:12, 17). Ichik tiempullana kananta musyarmi, Diospa sirweqninkuna mana allita rurayänampaq imëkanöpa ishkitsita munan.
8. ¿Imatatan Diospa sirweqninkunaqa cuentachö katsinantsik?
8 Bibliachöqa nin, ‘ciëluchö puëdeq alläpa mana alli espïritukunawan’ tsaränakur këkanqantsiktam (Efesius 6:12). Teytantsik Jehoväta sirwir qallanqantsikpitam Diabluwan y demoniukunawan pelyaq cuenta këkantsik. Tsëmi apostol Pabluqa, Diospa sirweqninkuna alli tsarakuyänampaq kima kuti qellqarqan (Efesius 6:11, 13, 14).
9. ¿Imatatan Satanaswan demoniunkuna munayan?
9 Satanaswan demoniunkunaqa, imëkanöpam jutsaman ishkitsimënintsikta munayan. Tsëmi Diablu ishkitsimënintsikta munaptin alli tsarakushqa karpis, yapëchö manana ishkitsimänapaq kaqtaqa nishwantsu. Diabluqa imakunachö pantanqantsiktam rikan, y tsëkunatam utilizan ishkitsimänapaq. Bibliaqa tsëkunapita cuidakunapaqmi yanapamantsik (2 Corintius 2:11; rikäri 254 päginachö 31 kaq yachatsikuyta “Satanas ruranqankuna”). Jukqa nunakunata demoniukuna ruratsiyanqanmi.
DEMONIUKUNAPA CONTRAN CHURAKÄSHUN
10. (1) ¿Imatatan demoniukuna nunakunata ruratsiyan? (2) Jehovä Diosqa, ¿ima nintan tsë rurëkunapaq?
10 Demoniukunaqa brujerïawan, suerti qatitsikuywan, kuka chaqchëwan y wanushqakunapa almanta tapuywanmi nunakunata engañayan. Jehovä Diosqa Palabranchömi nimantsik, tsë rurëkunata melananqanta y pëta sirwikarqa demoniukuna rurayanqanta mana ruranapaq (Deuteronomiu 18:10-12; Revelacion 21:8). Diospa sirweqninkunaqa, manam demoniukuna rurayanqanta ruranantsiktsu (Romänus 12:9).
11. ¿Imamantan chärishwan demoniukuna rurayanqan gustamashqa?
11 Demoniukuna rurayanqan gustamashqaqa, Satanasqa rasmi jutsaman ishkiratsimäshun. Demoniukuna rurayanqanta rurashqaqa, manam Teytantsik Jehovä kuyamäshunnatsu.
SATANASQA ENGAÑAMËNINTSIKTAM MUNAN
12. ¿Imanötan nunakunata Satanas engañan?
12 Satanasqa ichikllapa ichikllapam nunakunata engañan. Tsëmi nunakunaqa, “mana alli kaqta” allitanö rikäyan y “alli kaqtana” mana allitanö rikäyan (Isaïas 5:20). Bibliachö yachakunqantsikkuna mana yanapakunqanta y Diosnintsikta mana cäsukur mas kushishqa kanapaq kaqtam Diabluqa nin.
13. ¿Imanötan Satanasqa nunakunata pantatsin?
13 Diosnintsik nunakunata kamanqampitam, Satanasqa ima alli kanqanta y ima mana alli kanqanta nunakunata pantatsishqa. Eden huertachömi Ëvata kënö tapurqan: “¿Rasunpaku Dios niyäshurqunki montikunapa wayïninta mana mikuyänëkipaq?” (Genesis 3:1). Tsëpitanam angelkunapa puntanchö Jobpaq Jehoväta kënö tapurqan: “¿Debaldillaku Jobqa Diosta respetashqa?” (Job 1:9 TNM). Jesus bautizakuriptimpis Satanasqa kënömi nirqan: “Diospa tsurinkunapita karqa, kë rumikunata niri tantaman tikrariyänampaq” (Mateu 4:3).
14. ¿Imanötan Diabluqa demoniunkuna rurayanqanta rikätsikun?
14 Unënöllam Diabluqa kanampis nunakunata pantëkätsin. Demoniukuna rurayanqantam allitanö rikätsikun. Tsëmi Diospa wakin sirweqninkunapis, demoniukuna rurayanqanta allitanö rikäyashqa (2 Corintius ). Tsëqa, ¿imatan yanapamäshun jutsaman mana ishkinapaq? ¿Imatatan rurashwan Satanas mana engañamänapaq? Kushikunapaq rikanqantsikchö, pukllanqantsikchö y wiyanqantsikchö, y qeshyarnin jampikunqantsikchö imanö engañamanqantsikta yachakushun. 11:3
SATANASQA MUNANQANTSIKWANMI ISHKITSIMANTSIK
15. ¿Imakunachötan demoniukuna rurayanqanta rikëkashwan o rurëkashwan?
15 Atska videukuna, pelïculakuna, televisionchö rikanqantsikkuna y Internetchö rikänapaq o pukllanapaq kaqkunaqa, demoniukuna rurayanqanta, brujerïata y mas mana allikunatam rikätsikayämun. Wanushqakunapaq rurayanqanchö, juk animalpa ñatinninta rikäyanqanchö y sueñïninkunaman creiyanqanchöpis demoniukuna rurayanqantam rikantsik. Tsë rurëkuna allilla kanqanta nirmi, mëtsikaq nunakunaqa demoniukuna rurayanqanta rurëkäyan. Diabluqa tsë rurëkuna mana musyëpaqnö, shumaq y kushikuypaq kanqantanömi rikätsikun. Tsëmi wakinkunaqa “noqaqa demoniukuna rurayanqanta manam rurätsu” nirnin, demoniukuna rurayanqanta pelïculachö, televisionchö y imëkachö rikaräkuyan. ¿Noqantsiktapis tsëqa pasamashwanku? (1 Corintius 10:12).
16. ¿Imanirtan demoniukuna rurayanqanwan kushikushwantsu?
16 Satanaswan demoniunkunaqa manam musyëta puëdiyantsu imaman yarpanqantsikta. Tsënö kaptimpis, noqantsikpaq y familiantsikpaq imata akranqantsikchömi, imaman yarpanqantsikta y ima gustamanqantsikta musyayan. Rikanqantsik pelïcula, wiyanqantsik müsica y leyinqantsik librukuna brüjukunapita y demoniukuna rurayanqampita parlaptinqa, Satanaswan demoniunkunaqa tsëkuna gustamanqantsiktam rikäyanqa. Y tsëkunata rikaräkushqaqa, jutsamampis ishkiratsimashwanmi (leyi Gälatas 6:7).
17. ¿Imanötan Satanasqa alli saloryoq këta munanqantsikwan ishkiratsimashwan?
17 LLapantsikmi alli saloryoq këta munantsik. Tsëta munanqantsikwanmi Satanasqa mana alli rurëman ishkiratsimantsik. Kanan witsan qeshyëkaqkunaqa, kachakëta munarmi më tsëman ëwayan (Marcus 5:). Y mana kachakarmi, brüjukunaman y shoqmakoqkunaman ëwayan. Diospa sirweqninkunaqa musyantsikmi, tsë rurëkuna mana alli kanqanta y demoniukunapita shamunqanta. Tsëmi tsëkunawan jampikuntsiktsu ( 25, 26Levïticu 19:31).
Qeshyarninqa Jehovä Diospa yanapakuyninta ashi.
18. ¿Mëmantan Diospa sirweqninkunaqa jampikoq ëwanantsiktsu?
18 Wakin israelïtakuna brüjukunaman ëwashqa kayaptinmi, Jehovä Diosqa pëkunapaq kënö nirqan: “Makikikunata pallarirkur mañakayämuptikipis tumakurishaqmi. Kutïkuryan mañakayämaptikipis manam wiyayashqëkinatsu” (Isaïas 1:15). Brüjukunaman ëwayaptinmi Jehovä Diosqa mañakuyninkunata wiyaqtsu. Teytantsik Jehovä qeshyëkashqa yanapamänata y mañakunqantsikta wiyananta munarqa, manam brüjukunaman jampikoq ëwanantsiktsu (Salmus 41:3). Imanö jampikunapaq kaqmanmi alliraq yarpänantsik (Mateu 6:13). Y manam demoniukuna rurayanqanwanqa jampikunantsiktsu. (Rikäri 255 päginachö 32 kaq yachatsikuyta “Imanö jampikunapaq”).
DEMONIUKUNAPAQ CUENTUKUNA
19. ¿Imanirtan mëtsikaq nunakuna Diabluta mantsayan?
19 Satanaswan demoniunkuna mana kayanqanta niyaptimpis, wakinkunataqa mantsakätsiyashqam. Nunakunaqa tuku waqariptin pillapis wanunampaq kaqta, allqu awllarqa almata rikashqa kanqanta y maskunatam niyan. Demoniukunata mantsayänampaqmi, wakinkunaqa demoniukuna rurayanqanta cuentakuyan. Y wakinkunataqa, tsë cuentukunata wiyë y yapë willakuy gustanmi. Tsë cuentukunarëkurmi nunakunaqa Diabluta mantsayan.
20. ¿Imata rurartan Satanasta yanapëkashwan?
20 Satanasqa nunakuna mantsayänantam munan (2 Tesalonicensis 2:9, 10). Tsëmi ulikïta o llullakuyta alläpa yachar, Satanasqa demoniunkuna rurayanqan mana rasumpa kaptimpis nunakunata creitsin. Y tsë nunakunaqa demoniukuna rurayanqanta rikashqa o wiyashqa kayanqanta nirmi, tsë cuentukunata yapa yaparkur willakuyan. Diospa sirweqninkunaqa, manam tsë cuentukunata willakur Satanasta yanapëta munantsiktsu (Juan 8:44; 2 Timoteu 2:16).
21. Demoniukunapaq parlanantsikpa rantinqa, ¿imapitatan parlanantsik?
21 Diospa sirweqninkunaqa manam Satanastawan demoniunkunata mantsanantsiktsu. Juk wawqita o juk panita demoniukuna mana allita rurayashqa kayaptinqa, manam tsëkunapita willakur purinantsiktsu. Noqantsikqa Jesusmanmi yarpänantsik, pëpita y Teytan Jehovä yanapanqampitam masqa parlanantsik (Hebrëus 12:2). Demoniukuna rurayanqampita qateqninkunata manam parlapaqtsu. Tsëpa rantinqa Jesusqa “Diospa espantëpaq rurëninkunapita” y Gobiernumpitam parlaq (Hëchus 2:11; Lücas 8:1; Romänus 1:11, 12).
22. ¿Imata ruranëkipaqtan kallpachakunëki?
22 Satanasqa imëkanöpam munan Teytantsik Jehoväpita rakimënintsikta. Imakunawan ishkitsimanqantsikta musyarmi, demoniukuna rurayanqantaqa ni imanöpapis rurëta munantsiktsu. Manam munantsiktsu Diablu jutsaman ishkitsimänata (leyi Efesius 4:27). Satanaspa contran churakarqa manam munëninta rurashuntsu, y Teytantsik Jehovä noqantsikwan kaptinmi imatapis mantsashuntsu (Efesius 6:11).