Peru ¿imanirtan Diabluwan demoniukunaqa nunakunata engañayänampaq imëkata rurayan? Tsëtaqa rurayan Diospa contran churakänantsikta munar y pëkunata adoranantsikta munarmi. Pëkunaqa munayan nimanqantsikta creir Jehoväta mana gustanqanta ruranantsiktam. Tsëkunapita wakinqa, nunakuna wanuyaptin imëkata rurayanqanmi.

Kuyë familiantsikkuna wanuptinqa alläpam llakikuntsik, y tsëta rikätsikunqantsikqa allillam. Jesuspis amïgun Läzaru wanushqanta musyarmi “waqarqan” (Juan 11:35).

Pï nunapis wanuptinqa imëkatam rurayan, peru manam entëru Patsachötsu igual-lla rurayan. Wakin rurayanqanqa manam Bibliachö ninqampa contrantsu, peru wakintaqa wanushqakuna kawëkäyanqanta pensar y kawëkaqkunata rikëkäyanqanta pensarmi rurayan. Wakin markachönam, wanushqakunapa espïritunta cöleratsita mantsar, vëlakunata prendiyan, alläpa llakikuyan y pampakur imëkata rurayan. Peru Bibliachö “wanushqakunaqa, manam ni imatapis musyayannatsu” niptinmi, tsëta ruraqkunaqa nunakunata engañanampaq Diablu ruranqanchö yanapakuykäyan (Eclesiastes 9:5).

Wakinnam yanapanantsikta wanayanqanta pensar, y pëkunawan  mana yamë kayaptinqa imatapis rurëkuyänanta mantsar wanushqakunapaq imëkata rurayan. Wakin nacionchönam, wanunqampita juk killa o juk wata cumpliriptin, juntakëkur misata ruratsiyan. Tsëtaqa rurayan espïritukuna këkäyanqanman ‘tsimpanampaq’ wanushqa nunata yanapayanqanta pensarmi. Wakin markachönam, wanushqakuna mikuyänampaq y upuyänampaq imëkata apayan.

Tsëkunata ruraqkunaqa wanushqakunapaq nunakunata creitsinqanchömi Diabluta yanapayan, tsëmi tsëkunata rurëqa allitsu. ¿Allitanötsuraq Jehovä rikanman demoniukuna engañayaptin nunakuna rurayanqanman ichikllapis mëtikushqa? ¡Manam! (2 Corintius 6:14-18).

Rasumpa kaq Diospa sirweqninkunaqa, Diablu engañaptin nunakuna rurayanqanman mëtikuyänampa rantinmi, wanushqakunapa familiankunata shumaq yanapayänampaq y shoqayänampaq kallpachakuyan. Pëkunaqa musyayanmi pï nunapis wanuptinqa, Jehovälla yanapëta puëdinqanta (Job 14:14, 15).

Wakinkunaqa kikinkunam demoniukunawan parlayan, wakinnam wanushqakunawan parlayanqanta neqkunaman ëwayan. Tsëtam espiritismu nir reqiyan. Vudü niyanqanta rurë, brujerïata rurë, magia rurë, makinkunata leyitsikuyanqan y wanushqakunata tapukuyanqampis espiritismu niyanqanmi.

Tsëkuna mana alli kanqanta rikätsikurmi Bibliachöqa kënö nin: “Manam qamkunachöqa pillapis kanantsu, warmi ni ollqu tsurinkunata ninachö rupatseq, shamoq tiempuchö pasanampaq kaqta willakoq, magia ruraq, suertita qateq, hechicëru, pitapis brüjatseq, wanushqakunawan parlaqkunata o brüjukunata tapukoq ni wanushqakunawan parlaq. Tsëkunata ruraqtaqa, Teyta Jehoväqa alläpam melanan” (Deuteronomiu 18:10-12).

¿Imanirtan Jehoväqa tsëkunata mana ruranapaq cläru nimantsik?

Jehoväqa biennintsikpaqmi espiritismu niyanqanman mana mëtikunapaq nimantsik. Pëqa  kuyakoqmi y nunakunapaqmi yarpachakun, y musyanmi demoniukuna rurayanqanman mëtikoqkunaqa alläpa sufriyanqanta.

Tsënömi pasarqan wanushqakunawan parlanqanta neq Brasil nacionpita Nilda jutiyoq warmitapis. Pëtaqa demoniukunam alläpa sufritsiyarqan. Pëmi kënö willakun: “Espïritukunaqa [...] noqaman yëkamurmi munayanqanta ruratsiyämaq. Höraqa cuentata qokurmi imatapis ruraq kä, höranam imata ruranqäpitapis musyaqtsu kä. Peqäpita o umäpita mana alli kaptïmi hospitalchö internayämarqan. Demoniukuna imëkata rurar sufritsiyämaptin nerviupita sufrirmi, tranquïla kanäpaq jampita upoq kä, y seguïdu upyar y fumarmi qallëkurqä. Atska watapam tsënö karqä”.

Tsëpitanam Jehoväqa demoniukunapita libri kanampaq sirweqninkunawan Nildata yanaparqan. Kananqa shumaq y yamëmi kawakun. Pëmi këta nin: “Llapan nunakunatam nï, mana alli espïritukunawanqa ichikllapis mana mëtikuyänampaq”.