Bibliachömi willakun Diabluqa ‘entëru patsata engañëkanqanta’ (Apocalipsis 12:9). Diabluwan demoniukunaqa manam munayantsu Bibliachö ninqanta creinantsikta. Pëkunaqa nunakunatam creitsita munayan, wanushqakunaqa espïritukuna këkäyanqanchö kawëkäyanqanta. Tsëta imanö rurayanqanta rikärishun.

Mëtsika religionchömi yachatsikuyan nuna wanuptinqa, alman o espïritun, espïritukuna këkäyanqanman ëwanqanta. Pëkunam niyan cuerpun wanushqa kaptimpis, espïritunqa kawëkanqanta, y almaqa o espïrituqa mana imëpis wanunqanta.

Peru Bibliachöqa manam tsëtatsu nin. Bibliachö “espïritu” nirqa, “shütanqantsikpaqmi” masqa parlan. Peru “espïritu” palabraqa manam pulmonnintsikwan shütanqantsikllatatsu rikätsikun. Jesuspa qateqnin Santiägum willakun, “kawatsikoq kallpannaq kar[qa] cuerpu wanushqa o wañushqa” këkanqanta (Santiägu 2:26). Tsëmi rikätsikun espïrituqa cuerpuntsikta kawëkaqta katseq mana rikakoq kallpa kanqanta.

“Almapaq” parlarnam Bibliachö willakun, nunapis o animalpis  alma kayanqanta, y almaqa wanunqanta o wanutsita puëdiyanqanta (Marcus 3:4; Apocalipsis 8:9).

Bibliaqa manam nintsu nuna wanuptinqa, cuerpumpita imapis yarqur juk sitiuta ëwakunqanta. Bibliachöqa willakun wanushqakunaqa, mana ima rurëta puëdiyanqanta, mana imatapis yarpäyanqanta y manana parlayanqantam:

• “Kawëkaqkunaqa musyayanmi wanuyänampaq kaqta. Peru wanushqakunaqa, manam ni imatapis musyayannatsu ni manam pägutapis chaskiyannatsu. Y kawëkaqkunapis manam wanushqakunataqa, imata rurarpis cuentaman churayannatsu. Wanurirqa o wañuskirqa manam ni ima rurëtapis pensankinatsu, ni manam imatapis yachankinatsu ni musyankinatsu. Tsëmi rurëta puëdirqa, kawanqëkiyaq llapan kallpëkiwan rurë” (Eclesiastes 9:5, 10).

• “Wanushqakunaqa manam Teyta Jehoväta alabayantsu, pamparäyanqanchöqa manam alabayantsu” (Salmus 115:17).

Bibliachöqa manam nintsu nuna wanuptinqa, alman o espïritun kawar sïguinqanta. Tsëtaqa Diabluwan demoniukunam nunakunata  creitsiyan. Engañakur tsëkunata yachatsikuyanqanqa, manam Jehoväta ichikllapis gustantsu (Proverbius 6:16-19; 1 Timoteu 4:1, 2).

Wanushqakunawan parlayanqanta neqkunawampis Diabluqa nunakunata engañanmi. Pëkunaqa espïritukuna këkäyanqampita parlayämunqanta wiyëta puëdiyanqantam niyan. Wanushqakunawan parlayanqanta neqkuna y mëtsikaq nunakunam creiyan, tsë parlamoqkunaqa wanushqakunapa espïritun kayanqanta. Peru Bibliachö ninqannöpis wanushqakunaqa manam tsëta rurëta puëdiyantsu (Eclesiastes 9:5, 6, 10).

Tsëqa, ¿pikunatan wiyayanqanta parlayämun? ¡Tsëtaqa demoniukunam rurayan! Kawëkaptin pitapis rikëta puëdirmi, demoniukunaqa musyëta puëdiyan pï nunapis imanö parlanqanta, imanö kanqanta, imakunata ruranqanta y imakunata musyanqanta. Tsëmi wanushqa nuna tukuyta puëdiyan (1 Samuel 28:3-19).

Mana rasumpa kaq cuentukunawampis, Diabluqa wanushqakunapaq mana rasumpa kaqtam  nunakunata creitsin. Tsë cuentukunata wiyarmi nunakunaqa Bibliachö ninqanman creiyantsu (2 Timoteu 4:4).

Africa kinrëchöqa atskaqmi cuentakuyan wanushqakunata kawëkaqta rikäyanqanta, y masqa kawayanqampita karu sitiuchömi pitapis rikäyan. Peru, ‘pï nunapis wanushqampita kutimuyta puëdirqa, ¿familiampita y amïgunkunapita karu sitiutatsuraq ëwakunman?’.

Manatsuraq rikäyanqan nunaqa, ¿wanushqa rikoq nunalla kanman? Maslla musyarinapaq, juk kutim ishkaq nunakuna caserïuchö yachatsikuykäyaptin, edäna nuna juk ishkë hörapa qepankunata ëwarqan. Imanir tsëta ruranqanta tapurnam musyariyarqan, pëkunapita juknin unëna wanukoq wawqin kanqanta pensanqanta. Pantashqa këkarpis, pantashqa kanqanta niyaptinqa manam creita munarqantsu. Tsëqa, ¡amïgunkunata y vecïnunkunataqa capazchi wawqinta rikashqa kanqanta willarqan!

Capaz qampis wiyarqunki imatapis rikäyanqanta, wiyayanqanta  o suëñuyanqanta willakuyanqanta. Tsëta pasaqkunaqa alläpam mantsakäyan. Africa kinrëchö inti o rupay jeqanan läduchö kawaq Marein jutiyoq warmim willakun, wanushqana awilan paqaskunapa qayanqanta. Alläpa mantsakarmi Mareinqa qayëkachar llapan familianta riyatseq o rikchatseq, y tsëpita tiempuwanqa löcayarqanmi.

Wanushqakuna rasumpa kawëkarqa, ¿familiankunata mantsakätsiyanmantsuraq? Manachi tsëtaqa rurayanmantsu. Demoniukunam nunakunataqa mantsakätsiyan.

Peru ¿ima nishwantan niyanqankuna yanapakoqnö y shoqakoqnö kaptinqa? Maslla musyarinapaq, Siërra Leöna nacionchö kawaq Gbassay jutiyoq warmim qeshyëkarqan. Tsënam suëñuyninchö yuripur wanushqana papänin nirqan, juk plantaman ëwëkur rapranta jipinampaq, y yakuwan juntarkur upunampaq. Manaraq tsëta rurarqa manam piwampis parlanantsu karqan. Pëqa niyanqannö rurarmi alliyärirqan.

Juk warminam nirqan, wanushqana nunan paqaspa yuripunqanta, y nunanqa alli rikakunqanta y shumaq röpawan vistishqa këkanqanta.

 Tsë yuripoqkuna niyanqanqa allinö y yanapakoqnömi. Tsëqa, ¿Diospitaku shamun? Manam Diospitatsu shamun. Jehoväqa ‘rasumpa kaqllatam parlan’ (Salmus 31:5). Pëqa manam imëpis engañamashwantsu. Demoniukunallam tsëtaqa rurayan.

Peru ¿kanku allita ruraq demoniukuna? Manam kantsu. Nunakunata yanapaq tukurpis, llapanmi mana alli kayan. Ëvawan parlarqa, Diablupis shumaqmi parlaparqan (Genesis 3:1). Peru, ¿imatan Ëvata pasarqan ninqanta wiyar cäsukunqampita? Wanurqanmi.

Qampis musyankichi engañakuyta munar o imatapis logrëta munarqa, nunakuna shumaq parlapäkuyanqanta. Nunakunam niyan: “Cäran shumaq kaptimpis, manam shonquntaqa rikëta puëdintsiktsu”. Bibliachönam nin, ‘Satanaspis alli angel tukunqanta’ (2 Corintius 11:14).

Teyta Diosqa manam Patsachö nunakunata suëñutsinnatsu, revelannatsu ni espïritukuna këkäyanqampita parlapannatsu. Pëqa “imëka allikunata rura[yä]nampaq” listu këkäyänampaqmi, nunakunata Bibliawan yachatsin (2 Timoteu 3:17).

Jehoväqa musyanmi demoniukuna peligrösu kayanqanta, tsëmi kuyamarnintsik Diablu imakunata ruranqampita cläru willamantsik.