Siërra Leöna nacionpita Dauda jutiyoq nunam kënö willakun: “Norti läduchö këkaq provinciapa caserïunchömi winarqä. Wamrallaraq këkaptïmi, kastäkuna y juk familia chakra asuntu discutiyarqan. Ishkan familiam tsë chakrapa duëñun kayanqanta niyaq. Tsëmi arreglayänampaq brüju nunata qayatsiyarqan. Pëqa juk nunata espëjuta aptarkatsirmi yuraq tëlawan tsaparkurqan. Rätunllatam tsë nunaqa karkaryar y sudar qallëkurqan. Y espëjuta rikëkurmi fuertipa kënö nirqan: ‘¡Yuraq röpayoq edäna nunatam shamuykaqta rikëkä! Tsë nunaqa jatunmi y awkinnam, yuraq aqtsayoqmi y manam derëchunatsu purin’.

¡Tsënö nirqa awilüpaqmi parlëkarqan! Tsëpitanam mana imanö këta puëdir fuertipa kënö nirqan: ‘¡Mana creimarqa shamur espëjuchö rikäyë!’. Peru ¡manam ni pï rikëta munarqantsu! Tsënam brüjuqa höjakunata juntëkur ruranqanwan y calabäzuchö apanqan yakuwan tsaqtsur, tsë nunata calmakätsirqan.

Espëjuta këkätseq nunawanmi ‘awilüqa’ familiäta nirqan, tsë chakraqa noqakunapa kanqanta. Y awilätam nirqan mana mantsakushpa tsë chakrachö murukunampaq, y juknin familiapis acuerdum karqan. Tsënömi tsë problëmata arreglayarqan”.

 Inti o rupay jeqanan läduchö këkaq Africa kinrëchöqa, tsënö pasakunqantam seguïdu willakuyan. Wakin nunakunanöllam, tsëchöpis atskaq creiyan, wanushqakunaqa espïritukuna këkäyanqanman ëwayanqanta, y tsëpita Patsachö nunakunata rikëta puëdiyanqanta y allita o mana allita rurëta puëdiyanqanta. ¿Rasuntsuraq tsë creiyanqannö pasakun? ¿Rasumpatsuraq wanushqakunaqa kawëkäyanraq? Mana tsënö kaptinqa, ¿pikunatan wanushqakunapa espïritun kayanqanta niyan? Tsëkunata musyanqantsikqa alläpam yanapamäshun. Tsëpitam kawënintsik o wanuynintsikpis kanqa.