1, 2. ¿Pitaq huk seguro machënö?

PENSAKURKÏ, karuchö rikachakur purikaptiki ciëlota pukutë tsaparamunman. Tsëpitaqa, ciëlopis chillapyar räyokuna pashtar baldewan hichëpanö tamyar qallëkamunman. Tsë höraqa ëqillapa ëwarchi imallatapis ashinkiman tsapäshunëkipaq. Y ëwarëkar huk tsaki y alli machëta taririnkiman. ¡Imaraq kushikunkiman tarirerqa!

² Kanan, tsënö mantsëpaq tiempochömi kawantsik, y más mana allimanmi tikrakïkan. Pero kanmi huk seguro machë imëka mana allipitapis tsapëkamänapaq. ¿Mëqantaq tsë machëqa? Biblia nenqanta rikärishun: “Rasumpëpam Jehovataqa nishaq: ‘qammi kanki machënï, seguro pakämaqnï, y Diosnï, qamllamanmi imëpis markäkamushaq’” (Salmo 91:2).

3. ¿Imataraq rurashwan machënintsiknö Jehová Dios kanampaq?

³ Patsata y ciëlota Kamaq Jehová Diosnintsikmi seguro tsapämaqnintsik y täpamaqnintsikqa kanqa. ¡Imanö hatun bendicionmi këqa! Pëqa nunapitapis y imëka ushakätsimënintsik munaqpitapis más kallpayoqmi.  Y mana allita ruramashqapis Jehová Diosqa altsaramïta puëdenmi. ¿Imataraq rurashwan machënintsiknö Jehová Dios kanampaq? Pëmanmi confiakunantsik. Tsëmampis hina Bibliaqa yarpätsimantsikmi: “Dios cuyecamashqaqa imepis pe munanqano cawacuyë”, nishpa (Judas 21). Tsënömi, Dios Yayapa kuyakïninchö y Pëwan juntom imëpis këkänantsik. Tsënö rurashqaqa Pëqa tsapämaqnintsik seguro machënintsikmi kanqa. Pero, ¿imanöraq Kamamaqnintsikpa amïgon këman chashwan?

4, 5. ¿Imakunataq rikätsimantsik Dios kuyamanqantsikta?

⁴ Jehová Diosqa tukïnöpam kuyakïninta rikätsimarqontsik. Rikärishun mëqanyanshi kayan, tsë llapanta yarpëqa Diospa kuyakïninchö këkänapaqmi yanapamäshun. Kë librochö Bibliapita yachakonqëkikunaman pensakurkï. Kë Patsatam Kamamaqnintsikqa qaramarqontsik kushi kushi täränapaq, hinamampis atska mikïnintsik, yakuntsik, espantëpaq shumaq animalnintsikkuna, shumaq wëtayoq sitiokunatam qomarqontsik. Y Biblia Qellqatsimoqpis Dios Yaya kanqantam musyarerqontsik, tsëchömi imanö kanqanta y shutintapis willamantsik. Hina kë Patsaman kuyashqa Tsurinta kachëkamonqanta y noqantsik-rëkur hipar wanunanta permitenqantapis Bibliallachömi tarintsik (Juan 3:16). Tsënöpam huk shumaq y väleq qarënintsik qoykamarqontsik, tsërëkurmi shumaq kawëta shamoq tiempochö tarita puëdeshun.

⁵ Hina tsë shumaq kawëta tarinapaqqa ciëlochömi Jehová Dios huk gobiernota churashqa. Kë Gobiernoqa llapan hipakïnintsikkunatam ushakäratsimonqa y shumaq huertamanmi kë Patsata tikraratsenqa. ¡Imanö kushikïpaqmi tsëqa! ¡Kushishqa y mana chikinakushpanam finka kawakushun! (Salmo 37:29.) Tsë hunaq chämunanta shuyaranqantsikyaqqa, Diosnintsikpa alli consëjonkunam yanapamäshun alli kawakïkänapaq. Jehová Diosqa huk qarë mastaran  qomarqontsik, tsëqa oracionmi, y tsënam yanapamantsik pëwan parlanapaq. Këkunaqa rikätsimantsik, Jehová Dios qamta y llapan nunakunatapis kuyanqantam.

6. ¿Imanöraq Jehová Diospa kuyakïninta kutitsinkiman?

⁶ Kanannam tapukunëki: “¿Imanöraq Jehová Diospa kuyakïninta kutitsishaq?”, nishpa. Itsapis wakin nunakunaqa, “Jehová Diosta kuyarmi” niyanman. ¿Qampis tsënöllaku pensanki? Hatun kaq mandamientotam Jesus willakorqan: Jehová “Diosniquita cuyanqui llapan shonqiquiwan, llapan boluntaniquiwan y llapan yacheniquiwan” nishpa (Mateo 22:37). Tsënö kaptinmi Jehová Diosta llapan shonqïkiwan, yarpënikiwan, kawënikiwan, kuyanëki, pero ¿kuyë munëllatsuraq?

7. Dios Yayata rasumpëpa kuyanapaqqa, ¿kuyë munëllatsuraq? ¿Y imanirtaq tsënö ninki?

⁷ Kuyë munëpitapis rasumpa kuyëqa más kanqantam Bibliaqa rikätsimantsik. Awmi, kuyë munëqa alläpa precisom, shonquntsikpita patsë Diosta kuyar qallanapaqmi yanapamantsik. Más tantearinapaq: Huk manzanata munaptikeqa, ¿murunta qoykuyashuptikillatsuraq kushikunkiman? Manachi tsëllawantsu kushikunkiman. Manzano winanampaq murun alläpa preciso kaptimpis, qamqa frutantam munanki. Tsënöllam Jehová Diosta kuyë munënintsikwampis pasan: Tsë murunömi winanan y wayunan. Tsëmi Bibliapis yachatsimantsik: “Mandacushqancunata cäsucurnenqa, Diosta[m] cuyantsic. Y mandacushqancunaqa manam allapa sasatsu” nishpa (1 Juan 5:3). Tsënöllam hina, Dios Yayata rasumpëpa kuyënintsikqa alli frütuyoq kanan, tsëtaqa rikätsikushun alli rurënintsikkunawanmi (leyi Mateo 7:16-20).

8, 9. ¿Imanötaq Jehová Diosta kuyanqantsikta, y llapan qomanqantsikpita agradecikonqantsikta rikätsikuntsik?

⁸ Diosta kuyanqantsiktaqa rikätsikuntsik mandamientonkunata wiyakur y llapan yachakonqantsikta rurarmi, tsëqa facil-llam,  Jehová Diospa mandamientonkunaqa manam utitsikuntsu. Tsëpa rantenqa kushi kushi kawanapaqmi yanapamantsik (Isaías 48:17, 18). Jehová Dios pushamänantsikta haqerqa llapan qomanqantsikpita alläpa agradecido kanqantsiktam rikätsikushun. Pero alläpa llakinëpaqmi nunakuna Diosman mana witita munayanqanqa, noqantsikqa alläpa agradecïdom këta munantsik. Huk kutim Jesus chunka leprösokunata hamperqan, pero hukllëllam agradecikoq kutïkorqan (Lucas 17:12-17). Tsë agradecikoq nunanömi këta munantsik manam tsë isqon mana agradecikoq nunakunanötsu.

⁹ Tsëpenqa, ¿Jehová Diospa ima mandamientontataq cäsokushwan? Wakin mandamientonkunataqa kë librochömi yachakorqontsik. Wakin wakinllatapis yarpärishun y tsë wiyakïqa yanapamäshun Diosnintsikpa kuyakïninchö këkänapaqmi.

10. ¿Imanirtaq Jehová Diospita imëpis yachakïkëqa alläpa preciso?

¹⁰ Jehová Diosta alleq reqiqa pëman witinapaqmi  alläpa preciso. Kë yachakïqa manam imëpis ushakanmantsu. Yarpakurkï, ampipa alalaq hirkachö këkanqëkiman, y qoñükunëkipaqqa yamtata qotïkur nina tsaritsinqëkita. ¿Haqirinkimantsuraq tsë tsaritsinqëki nina ichikllapayan upinanta? Manachi upinantaqa haqinkimantsu. Más yamtanchi winankiman mana upinampaq, upiriptenqa alalëwampis wanurinkimanchi. Imanömi yamtapis alläpa preciso nina mana upinampaq, tsënöllam hina Jehová Diosta kuyënintsik mana ushakänampaqqa ‘Diospita yachakï’ alläpa preciso (Proverbios 2:1-5).

11. ¿Imanötaq Jesuspa yachatsikïnin yanaparqan qateqninkunata?

¹¹ Jesusqa munarqan qateqninkunapa kuyëninkuna Jehová Diosman y Palabranman más miranantam. Kawariramurmi Jesusqa ishkë qateqninkunata willaparqan, Escrituras Hebreas nishqanchö wakin profecïankuna pëchö cumplikanqanta. ¿Imanötaq kë yanaparqan qateqninkunata? Tsëpitanam qateqninkuna niyarqan: “Jesus captinchi, nänichoqa shonquntsic allapa cushicorqon, Diospa palabranta willapar cäyitsimashqa” nishpa (Lucas 24:32).

12, 13. a) Wakin nunakunaqa, ¿imanirtaq Jehová Diosta y Palabran Bibliata kuyayantsu? b) ¿Imataraq rurashwan Jehová Diosta kuyënintsik mana ushakänampaq?

¹² Rasumpëpa Biblia nenqanta yachakïkaptiki, ¿manaku qampapis shonqïki kushikorqan Dios kuyëwan? Tsënöchi kashqa. Tsënöllam wakintapis pasashqa. Pero tsënö kaptimpis, tsë kuyakïta shonquntsikchö katsinan y winatsinanqa manam faciltsu. Kanan tiempopaqmi: “Nunacunapa cuyaquinincunapis ushacäquiconqa”, nerqan Jesus y tsëtaqa manam qatita munantsiktsu (Mateo 24:12). ¿Imataraq rurankiman Jehová Diosta y Palabran Bibliata kuyanqëki mana ushakänampaq?

¹³ Jehová Diospita y Jesucristupitam imëpis yachakïkänëki (Juan 17:3). Diospa Palabranta leirerqa alleq yarpakachar tapukunki: “¿Imatataq kë leenqäqa Jehová Diospita yachatsiman? ¿Llapan shonquwan, yarpëniwan y kawënïwan más kuyanäpaqku yanapaman?” (leyi 1 Timoteu 4:15). Kënö yarpakachaptikeqa,  Jehová Diosta kuyëniki manam ushakanqatsu.

14. ¿Imanirtaq orakïqa alläpa preciso, Jehová Diosman kuyakïnintsik mana ushakänampaq?

¹⁴ Jehová Diosman kuyakïnintsik mana ushakänampaqqa imëpis orakïkänantsikmi (1 Tesalonicenses 5:17). Kë oracionqa Diosnintsikpa alläpa väleq qarënin kanqantam yachakorqontsik capítulo 17 nishqanchö. Nuna mayintsikkunawan kuyanakur y alli kakunapaqqa seguido y shonqupita patsëmi parlapänakunantsik. Tsënöllam hina Jehová Diosta imëpis shonquntsikpita patsë parlapëkashqaqa kuyënintsik ushakanqatsu. Tsëmi orakorqa llutallatsu ni tsëllatatsu imëpis parlakïkashwan, sinöqa pensashwanmi. Imanömi huk wambra teytanta parlapan, tsënömi noqantsikpis Jehová Diosta parlapashwan. Awmi, pëtaqa shonquntsikpita patsë y alläpa respëtowanmi parlapashwan (Salmo 62:8). Tsëmi, Dios Yayata shumaq adoranapaqqa kikintsik alleq Bibliantsikta estudiakushwan y orakushwan shonquntsikpita patsë. Tsëta rurarqa Diospa kuyakïninchömi imëpis këkäshun.

15, 16. ¿Imanirtaq Reinopita willapäkïta huk tesörotano valoryoqta rikashwan?

¹⁵ Bibliata estudiar y mañakurnenqa hapallantsikllam Diosta adorëkantsik. Kananqa rikärishun, wakin nunakunawan këkar ruranqantsikta: Tsëqa creenciantsikkunapita parlëmi. ¿Pillawanqa parlarqonkinaku Biblia yachatsikonqampita? Tsënö rurashqa karqa alläpa kushikïpaq rurëtam rurarqonki (Lucas 1:74). Jehová Diospita yachakonqantsikta parlarqa, llapan cristiano chaskenqan mandätotam cumplikantsik: Diospa Reinompita alli noticiakuna willapäkïta (leyi Mateo 24:14; 28:19, 20).

¹⁶ Apóstol Pabluqa alläpam kuyëkorqan Jehová Diospita willapäkïta, tsëmi huk väleq tesörom nerqan (2 Corintios 4:7). Jehová Diospita y ruramunampitawan parlëqa ima trabäjopitapis más allim. Huk lädopaqa, llapampitapis más  kuyakoq Teytantsiktam servintsik y más huk lädopanam atska bendicionkunata chaskintsik. Willapäkoq ëwarqa, alli shonquyoq nunakunatam yanapantsik Diosnintsikta serviyänampaq y alli kawëman apakoq nänichö kayänampaq.  ¡Manam ni ima trabäjopis kënöqa kushitsimantsiktsu! Hinamampis, Jehová Diospita y Palabrampita willapäkushqaqa, fënintsik y kuyakïnintsikmi miran. Y Jehová Diosqa alläpam kushikun alli kaqta ruranapaq sinchikushqaqa (Hebreus 6:10). Rikanqantsiknöpis, mana haqishpa këta rurashqaqa Jehová Diospa kuyëninchömi imëpis këkäshun (leyi 1 Corintios 15:58).

17. ¿Imanirtaq willapäki alläpa urgente?

¹⁷ Reinopita willapäkïqa alläpa urgente kanqantam yarpashwan. Tsëmi Bibliapis nimantsik: “Ime öra eque örapis, alli tiempucho y mana alli tiempuchopis, shumaq pasensiequiwan Diospa palabranta willapä[qui]” nishpa (2 Timoteu 4:2). ¿Imanirtaq willapäkïqa tiempontsikchö alläpa urgente? Diospa Palabranmi contestaramantsik: “Jehovapa hatun piñakïnin hunaqqa këllachönam. Këllachönam, rasllanam shamïkun” nishpa (Sofonías 1:14). Awmi, kë llapanta Jehová ushakäratsimunan hunaqqa rasllanam chëkamun. ¡Tsëtam nunakunaqa musyayänan! Hinamampis alleqmi musyayänan, kë tiempoqa Jehová Diosta Gobernantenkunatanö wiyakuyänampaq alli tiempo kanqanta, ushakëqa “manam demoramunnatsu” (Habacuc 2:3).

18. ¿Imanirtaq rasumpëpa cristianokunawan junto Jehová Diosta adorashwan?

¹⁸ Rasumpa cristianokunawan junto adorëkänatam munan Jehová Diosqa. Tsëmi Palabran nimantsik: “Jucnintsic jucnintsic yanapanacur cuyanacur alli rureta tïrashun. Diosta alabanantsic wayicho imepis ellucashun ama waquincunanoqa mana ewashpa quecashuntsu. Antis jucnintsic jucnintsic callpata qonacur quecashun” (Hebreus 10:24, 25). Cristiano mayintsikkunawan reunionkunaman ëwarnenqa, kuyë Diosnintsiktam alabantsik y adorantsik. Hinamampis wakinkunawanmi animanakuntsik y yanapanakuntsik.

19. ¿Imataraq rurashwan cristiano mayintsikkunawan más kuyanakunapaq?

¹⁹ Cristiano mayintsikkunawan Jehová Diosta adorarqa masmi kuyanakushun. Y cristiano mayintsikkunapa alli rurëninkunata  rikëqa alläpa precisom, tsënöllam noqantsiktapis Jehová Diosqa rikëkämantsik. Cristiano mayikikuna perfecto kayänanta ama shuyarëtsu. Llapantsikmi mana alli ruraq kantsik y espiritualmentepis manam igualtsu poquntsik (leyi Colosenses 3:13). Llapan shonqunwan Jehová Diosta kuyaqkunatam amïguïkikunapaqqa ashinkiman, y tsënö rurarqa shonqïpita patsëmi Diosta kuyanki. Cristiano mayikikunawan Jehová Diosta adoraptikeqa, tsëmi alläpa yanapashunki Dios Yayapa kuyakïninchö imëyaqpis kanëkipaq. Kanannam rikärishun Jehová Diosta llapan shonqunkunawan fiel sirveqkunataqa bendecinanta.

20, 21. ¿Imataq “rasumpëpa kawë”, y imanirtaq alläpa shumaq kanqa?

²⁰ Jehová Diosqa kawëtam qaran rasumpëpa sirveqninkunataqa, pero ¿imanö kawëta? Itsapis wakinnintsikqa, kawëkätaq, mikütaq, upütaq, shütätaq, nishwan. Kushi kushi kanqantsik hora itsapis “¡këmi kawëqa!” nishwan. Tsënö kaptimpis, kanan tiempoqa manam ni pï tarintsu rasumpa kaq kawëta nimantsikmi Bibliachöqa.

²¹ “Rasumpëpa kawëman tsaripukï” nishpam Bibliaqa willamantsik, o “rasumpëpa kawëta tari” nishpa Nuevo Testamento de José María Valverde, nishqannöpis (1 Timoteu 6:19, NM). ‘Rasumpëpa kawë’ nerqa, shamoq tiempochö kawëpaqmi parlan. Perfecto karmi rasumpëpaqa kawashun, qallananchö Dios munanqannö. Tsë shumaq Paraïsochöqa manam qeshyashuntsu, yamë y kushishqam kawakushun, tsënömi “rasumpëpa kawë” kanqa, tsëqa mana ushakaq kawëmi (1 Timoteu 6:12, NM). ¿Manaku tsënö shumaq kawakï shuyarämantsik?

22. ¿Imanötaq “rasumpëpa kawëta” tarinkiman?

²² ¿Imanötaq ‘rasumpëpa kawëtaqa’ pipis tarinman? Kë kawëpaq manaraq parlarninmi, Pabluqa cristianokunata willaparqan “allicunallata rurar nuna mayincunata imecachopis yanapayänanpaq” (1 Timoteu 6:18). Këtaqa tarishun Bibliapita  yachakonqantsikta kawënintsikchö rurarmi. ¿Alli rurëkunawanmi ‘rasumpëpa kawëtaqa’ tarishun nikarqantsuraq Pabluqa? Manam, tsëqa ‘Diospa qarëninmi’ (Romanos 5:15). Pero fiel sirveqninkunata qararqa Jehová Dios kushikunmi. Pëqa ‘rasumpëpa kawëyoq’, mana ushakaq, yamë y kushishqa kawanëkitam munan. Kënö kawëmi Diospa kuyëninchö llapan këkaqkunataqa shuyaran.

23. ¿Imanirtaq Jehová Diospa kuyakïninchö këqa alläpa preciso?

²³ Llapantsikmi tapukushwan, “¿Biblia nenqannötsuraq Diosta adorëqa?”, nishpa. Kë tapukïta, awmi nishpa cada hunaq contestarqa, alli nänipam ëwëkantsik. Y Jehová Dios tsapäkïnintsik kanqantam confiakushwan. Pëqa kë ushanan tiempochö mana allikunapitam sirveqninkunata tsapëkonqa. Hinamampis këllachöna këkaq mushoq Patsamanmi yëkatsimäshun. ¡Imanö kushikïpaqraq kanqa! ¡Imanöraq kushikïkushun kë ushanan tiempokunachö alli kaq näni akranqantsikta! Kanan alli kaqta akrarqa ‘rasumpëpa kawëtam’ mana wanushpa kawanki, Jehová Dios imëpis kawanata munashqannö.