BIBLIACHÖQA manam lluta fiestakunata o religiosa kaqkunata celebranapaq parlantsu. Tsëpenqa, ¿imanötaq qallarqan kë fiesta rurëkuna? Biblioteca nishqankunaman ëwarqa, markëkichö reqishqa fiestakunapita parlaq librokunatam tarinki. Rikärishun wakinllatapis.

Semana Santa. Jesus wanonqampita y kawarimonqampita yarpëmi niyaptimpis, mana alli costumbrekunam kayan, y procesionkunawanmi celebrayan. Tsëmi, Jesus manaraq shamuptin unë Babiloniokuna rurayanqanta Las Grandes Religiones Ilustradas nishqan librochö willamantsik: “Imägenninkunataqa alläpam adornëkuyaq [...]. Shumaq y alläpa chaniyoq vestïdokunawanmi vestitsiyaq, wallqakunawampis, anïllokunawampis, pulcërakunawampis adornayaqmi, y shumaq sitiokunachömi churaraq, y tsëpitanam procesionkunapaq horqayaq” nishpa.

Año Nuevo. Wakin markakunachöqa Año Nuëvoqa huk killakunachömi ratan, y celebrayampis cada markachö hukläyam. Tsëmi qallanqampita leintsik: “46 wata manaraq Cristu shamuptinmi Julio César nishqan emperador romano patsätserqan Año Nuëvota 1 de enërochö celebrayänampaq. Y tsë hunaqqa qallanankunapa y punkukunapa diosnin Jano nishqampa fiestantam celebrayarqan. Enero killam [latincho, Januarius] Jano shutita chaskerqan, y Jano nishqan diosqa ishkë qaqllayoqmi karqan, hukninmi nöpanman rikararqan, hukninnam qepaman” (The World Book Encyclopedia). Tsëmi Año Nuevo celebrëqa unë mana alli creenciakunapita shamun.

Huk fiestakuna. Hinantin Patsachö fiestakuna rurayanqampita parlarqa manachi ushashwantsu. Pero Jehová Diosqa manam munantsu fiestankunata rurapar nunakunata o imakunatapis alabanata (Jeremías 17:5-7; Hechos 10:25, 26). Hinamampis huk fiesta Diospaq alli kanqanta o mana alli kanqantapis musyanapaqqa, imanö tsë fiesta qallamonqan musyëmi yanapamäshun (Isaías 52:11; Apocalipsis 18:4). Fiestakunata celebrashqa mana allipa Dios rikanqantaqa, willamantsik kë libropa capítulo 16 nishqanchö rikanqantsik textokunam.