¿IMA noticiakunatataq periödicokunata leir, televisionta rikar o radiota wiyar tarinki? ¡Guerrakuna, terrorismo y imëka mana alli rurëkunapis kanmi! Kananna kikikipa kawënikikunaman yarpakurkï. Itsapis kastëkikunapa o amïguïkikunapa wanïnin o qeshyënin llakikätsishunkiman. O itsapis alli nuna Jobnö, ‘nanatsikïkunawan y llakikïkunawampis utishqana’ këkankiman (Job 10:15).

Itsapis tapukunkiman:

• ¿Këtatsuraq noqapaq y llapan nunakunapaqpis Dios munarqan?

• ¿Mëchöraq problëmakunata altsanäpaq yanapakïta tarïman?

• ¿Imëllapis kë Patsachöqa alli kawë kanqatsuraq?

Bibliallachömi kë tapukïkunapa respuestantaqa tarintsik.

“Mananam waqayanqanatsu ni llaquiyanqanatsu, mananam imancunapis nananqanatsu, ni wanuyanqanatsu.” (Apocalipsis 21:4)

“Luychunöran cojokunapis eqikachäyanqa.” (Isaías 35:6)

“Wiskukunapa nawinkunapis kichakärenqam.” (Isaías 35:5)

 ‘Wanushqacunam [...] cawariyämonqa.’ (Juan 5:28, 29)

“Manam ni pï patsachö täraq: ‘Qeshyämi nenqanatsu’.” (Isaías 33:24)

“Patsachöqa alläpa atskam grano [o mikï] kanqa.” (Salmo 72:16)

Ama qepa päginakunachö rikanqëki ardëlla kanqanta pensëtsu. Diosmi änikushqa, y imanö cumplimunantapis Bibliam willamantsik.

Pero manam tsëllatsu. Bibliaqa kanan tiempochö imanö kushi kushi kawëtapis yachatsimantsikmi. Ichikllapis pensakurkï kikikipa yarparënikikunaman y problëmëkikunaman. Itsapis qellëpaq, kastëkikunapaq, o kuyashqa kastëkikunapa saludninman o wanushqanman yarparanki. Tsë problëmakunata o yarparëkunata aguantanapaqmi Bibliaqa yanapamantsik, hina consolamantsikmi kë hawanchö tapukïkunapa respuestankunata nimarnintsik:

• ¿Imanirtaq hipantsik?

• ¿Imanöraq yarparënintsikkunata altsashwan?

• Kushishqa kastantsikkunawan kawanapaqqa, ¿imataraq rurashwan?

• ¿Imaraq pasamantsik wanurishqa?

• ¿Imëllaqa wanushqa kuyë kastantsikkunata rikärishuntsuraq?

• ¿Imanirtaq creintsik Dios änikonqanta cumplimunanman?

 Këyaq leinqëkim rikätsikun Biblia nenqanta yachakïta munanqëkita. Y tsëpaqqa kë librom yanapashunki. Rikë kë tapukïkunaqa pärrafukunachö këkan. Atska waranqa nunakunam kushikuyashqa, Jehová Diospa testigonkuna tapukïkunawan y respuestakunawan Bibliapita yachatsikuyanqanta, y tsënölla qamtapis yanapashunëkitam munayä. Y rasumpëpa Biblia yachatsikonqanta yachakïnikichö Dios bendecïkushï.