32 watachö Pascua fiestapaq ichikllana pishikaptinmi, Jesusqa juk milagruta rurarqan, y tsë milagruqa Mateu, Marcus, Lücas y Juan librukunallachömi yurin.
Tsë milagruta rurarmi, Jesusqa wallkaq nunakunallawan mëtsikaqta qararqan. Tsënöllam kanampis pasakun.
-
Pitsqa tanta y ishkë pescädulla këkaptimpis, llapanta qarayänampaqmi Jesusqa qateqninkunata nirqan.
-
Tantakunata y pescädukunata tsarirkurmi Jesusqa mañakurirqan. Tsëpitanam qateqninkunata qorqan, y pëkunanam, tsëchö këkaq mëtsikaq nunakunata qoyarqan.
-
Jesuspa milagrunwanmi llapankuna pacha junta mikuyarqan. Pëqa qateqninkunallawanmi waranqëpayan nunakunata mikïninkuna qararqan.
-
Jesusmi willakurqan ushanan junaqkunachö sirweqninkunata “tiempunchö mikïnin qaranampaq” pikunata akranampaq kaqta (Mt 24:45).
-
1919 watachömi Jesusqa “wayinchö sirwipakoqkunata” mikï cuenta Diospa yachatsikïninkunata qonampaq “alli juiciuyoq y markäkïpaq sirwipakoq[ta]” akrarqan. Pëkunaqa ciëlupaq akrashqakunapita wakinllam kayarqan.
-
Apostolkuna kawayanqan witsanchönöllam, kanampis Jesusqa tsë wallkaqlla ciëlupaq akrashqa cristiänukunawan rurëkan.
¿Imanötaq rikätsiküman mikï cuenta Diospa yachatsikïninkunata qomänampaq Jesus patsätsinqanta respetanqäta y cäsukunqäta?