Nunakunata Bibliapita yachatsinapaqqa chusku videukunam kapamantsik. ¿Imapaqtan kë videukunata rurayämushqa y imanötan Diospita yachatsikurnin utilizashwan?

• ¿Imanirtaq Bibliapita yachakunkiman? (complëtu kaq). Kë videutaqa rurayämushqa, nunakuna ima religionyoq karpis Bibliapita yachakuyta munayänampaqmi. Nunakuna musyëta munayanqampaq respuestakunata Bibliachö ashiyänampaqmi yanapan y juk igualatsikuywanmi Bibliachö ninqankuna rasumpa kanqanta rikäyänampaq entienditsin. Y videupa ushananchömi Bibliapita yachakuyta munar imata rurayänampaq kaqta nin.

• ¿Imanirtaq Bibliapita yachakunkiman? (wallkalla kaq). Kë videupis complëtu kaqnöllam, peru mas wallkallam, tsëmi nunakuna alläpa tiempunkuna mana kanqan sitiukunachö yachatsikunapaq yanapakun.

• ¿Imanötaq Bibliapita yachatsikïnëkuna? Kë videuqa nunakuna Bibliapita grätislla yachatsikunqantsikta rikäyänampaq y yachakuyta munayänampaqmi rurayämushqa. Y yachakuyta munar imanö mañakuyänampaq kaqta y tsëpaq nunakuna tapukuyanqantam contestan.

• Kushikuyämi Bibliapita yachakuyta munanqëkita. Bibliapita yachakuykaqkunatam kë videutaqa rikätsintsik. Kushishqa kawakushun neq librupa 2 kaq päginanchöraq tsë videupaq parlaptimpis, Kushishqa kawakushun neq follëtuwan yachakuykarpis tsë videutaqa rikätsita puëdintsikmi. Tsë videuqa imanö libru kanqanta y Bibliapita yachakuykaqtam imanö yachakunampaq kaqta entienditsin.

Cada videu imapaq rurakashqa kaptimpis, puëdintsikmi imë hörapis nunakunata rikätsita o mandëta. Diospita yachatsikunqantsik höra kë videukunata nunakunata rikätsinapaq alli yachakushun.