Jehoväpa paciencianqa ichikllachönam ushakärinqa. Tsë pasakuptinqa, mana alli religionkunam ushakäyanqa, juk grüpu nacionkunam Diospa sirweqninkunata ushakätsita munayanqa y Jehovämi Armagedonchö mana alli nunakunata ushakätsinqa. Tsëtam kushishqa shuyëkantsik.

Alläpa sufrimientu tiempuchö imakuna pasakunampaq kaqtaqa manam llapantatsu musyantsik. Y manam musyantsiktsu imë qallanampaq kaqta, gobiernukuna imanir religionkunata atacayänampaq kaqta. ¿Ëka tiempuraq nacionkunaqa Diospa sirweqninkunata atacayanqa y imanöraq tsëta rurayanqa? ¿Imanöraq Armagedonchö mana alli ruraqkunata Jehovä ushakätsinqa? Manam musyantsiktsu.

Bibliachömi willakun tranquïlu kanapaq, tsëmi shamoq tiemputaqa mantsanantsiktsu. Musyantsikmi ‘ushanan tiempuchöna’ kawëkanqantsikta (2Ti 3:1). Y mana alli religionkunata atacayanqampis ‘pöcu tiempulla kanampaq‘ kaqta, tsënöpa alli kaq religion mana ushakänampaq (Mt 24:22). Segürum këkantsik Jehoväqa sirweqninkunata salvanampaq kaqta (2Pë 2:9). Musyantsikmi mana alli ruraqkunata ushakätsinampaq Jehovä Jesusta akrashqa kanqanta, y pipis yupëta mana puëdinqan mëtsikaq nunakunata Armagedonchö salvanampaq kaqta (Ap 19:11, 15, 16).

Tsë llapan pasakunqanta rikarmi “alläpa mantsakar nunakuna desmayayanqa” (Lü 21:26). Peru noqantsikqa manam. Unë tiempu sirweqninkunata Jehovä imanö salvanqanta y shamoq tiempu imanö kanampaq kaqta Bibliachö leyirnin y tsëkunaman pensarninqa masmi Lücas 21:28-chö ‘ichikllachöna salvakuyänëkipaq kaqta yarpar, kallpata tsarir valienti kayë’ ninqanman confiakushun.