¿IMANIRTAN CELULARPA YACHATSIKUNANTSIK? Celularpa o telëfunupa yachatsikunqantsikqa “alli willakïkunata chipyëpa” yachatsikunapaqmi yanapakun (Hch 20:24). Y wayinkunachö mana tarinqantsik nunakunata yachatsinapaqpis yanapakunmi. Tsënöllam qeshyapäkur o mana alli tiempurëkur wayintsikpita mana yarquyta puëdir yachatsikunapaqpis yanapakun.

IMANÖTAN YACHATSIKUSHWAN

• Puntataqa alli yachakuy. Nunakuna imata yachakuyta munayanqanta puntata qellqë. Y mana contestayäshuptiki imanir qayëkanqëkita willar juk mensäjita dejanëkipaq alistë. Imapita parlapänëkipaq yachakunqëki hojëkita mësëkichö katsi. Y fäcil-lla yacharatsinëkipaq JW Library^® o jw.org^® päginata celularnikichö kicharätsi.

• Mana mantsakushpa parlapë. Tsë nunata o warmita rikëkaqnölla shumaq parlapë. Pillawampis yachatsikuy, tsënöpa imatapis tapuyäshuptiki ashirnin yanapashunëkipaq. Imatapis mana nishuptikiqa ama upällaqa quedakuytsu.

• Watukaq kutinëkipaq niri. Parlapanqëki nuna o warmi shumaq wiyakuptinqa, yapë qayarnin parlakuriyänëkipaq imallatapis tapuri. Internetpa o celularpa juk revistata o juk videuta aparatsinëkipaqpis niri o kikiki apapunëkipaqpis niri. Puëdirninqa Internetchö päginantsikman yëkurinampaq y watukaq kutinëkipaq niri.