Fumëtaqa dejëta puëdinkim

KANANQA ‘valienti kë y jinan höra rurar qallë’ (1 Crönicas 28:10). ¿Ima mastataq ruranëki cigärru fumëta dejanëkipaq?

Imë dejanëkipaq kaqta decidi. Estädus Unïduschö Departamento de Salud y Servicios Humanos niyanqanmi nin, fumëta dejëta munaqkunaqa, decidiyanqampita manaraq ishkë semäna pasaptin, imë junaq dejayänampaq kaqta decidiyänampaq. Tsënöpam decidiyanqanta cambiayanqatsu. Calendariuchö imë junaq dejanëkipaq kaqta marquë, decidinqëkita amïguykikunata willë y ima pasaptimpis ama decidinqëkita cambiëtsu.

Juk tarjëtata rurë. Imakuna yanapashunëkipaq kaqta y kë qateqninchö ninqanta tsë tarjëtaman qellqë.

● Imanir fumë dejëta munanqëkita

● Fumëta munanqëki höra qayanëkipaq kaqkunapa nümerunta

● Fumëta dejanëkipaq yanapashunqëki kaqta (capaz këmanqa Gälatas 5:22, 23 ninqanta y mas textukunata qellqankiman)

Tsë tarjëtata ama dejëtsu, y cada junaq kutin kutin leyi. Fumëta dejashqana karpis, yapë fumëta munanqëki höra tsëchö ninqanta leyi.

Puntallapitana alistakuy. Decidinqëki junaq manaraq chämuptin, fumanëkipaq ruranqëkikunata rurënatsu. Sharkunqëki höralla cigärruta fumarqa, juk höranö pasanqanchöraq fumanëkipaq patsätsi. Mikunqëki höra o mikur usharir fumarqa, mana fumanëkipaq churapakë. Ama fumayanqan sitiukunapa pasëtsu. Japallëki fuertipa kënö nita yachakuy: “Gracias. Kananqa manam fumänatsu”. Tsënömi decidinqëki junaq fumëta dejanëkipaq listu këkanki, y tsëmi yanapashunki, ichikllachöna fumëta dejanëkipaq kaqta yarpänëkipaq.

¿Ima mastataq ruranëki? Decidinqëki junaq chämunqanmannö, larguyman picashqa zanahoriata, chiclikunata, tsakitsishqa frütakunata y maskuna mikunëkipaq alistë. Amïguykikunata y familiëkikunata yarpätsi, imë junaq fumëta dejanëkipaq kaqta y imanö yanapayäshunëkipaq kaqta. Manaraq tsë junaq chämuptin, wayikichö, cärruykichö, röpëkipa bolsillunchö o trabäjuykichö katsinqëki cigärruta ushakätsi. Tsënölla cigärrupa uchpanta churanëkipaq katsinqëkita, encendorkunata y cigärruta munatsishoqnikikunata ushakätsi. Cajonnikichö kaptinqa mas fäcilmi tarinëkipaq kanqa, peru rantinëkiraq kaptin y amïguykitaraq mañakunëki kaptinqa manam fäciltsu kanqa. Ultimu kaq cigärruta fumarirqa, manana yapë fumanëkipaq Teyta Diosman mana dejëpa mañakuy (Lücas 11:13).

Atskaq nunakunapaqmi cigärruqa amïgunkuna cuenta kashqa, peru mana alli amïgunö kanqanta y mana allita rurakunqanta cuentata qokurmi, cigärru fumëta dejayashqa. Qampis puëdinkim cigärru fumë dejëta y imatapis kikiki decidita. Tsëqa salornikipaqmi alli kanqa.

[Fötu]

Ruranqëki tarjëtata ama dejëtsu, y cada junaq kutin kutin leyi