NUNAKUNA NIYANQAN.

Atskaq nunakunam pensayan leykunata respetar pukllayaptinqa, qellëpaq pukllayanqan allilla kanqanta. Gobiernu ruratsinqan loterïa niyanqan pukllachöqa, wakin ganayanqan qellëwanmi nunakunata yanapayan.

BIBLIACHÖ NINQAN.

Bibliachöqa manam qellëpaq pukllayanqampaq parlantsu. Peru Bibliachö ninqanmi yanapamantsik, tsë pukllakunata Teyta Dios imanö rikanqanta musyanapaq.

Qellëpaq pukllaqkunaqa wakimpa qellënintam ganar apakuyan, y tsëqa “imatapis ërayëpa munëpita[m] cuidakuyänëki” nir Jesus consejakunqampa contranmi (Lücas 12:15). Nunakunaqa imatapis ërayëpa munarmi pukllayan. Ganayänampaq mana fäcil kaptimpis, tsë pukllakunata patsätseqkunaqa, mëtsika millonta ganayänampaq kaqtam niyan. Rïcu këta munarmi nunakunaqa, qellëpaq pukllayanqan wayikunachö mëtsika qellëta gastayan. Imatapis ërayëpa mana munayänampaq nunakunata yanapanampa rantinmi, tsë pukllakunaqa qellëta fäcil ganëta munayänampaq yanapan.

Qellëpaq pukllaqkunaqa kikinkunallaman pensarmi, wakin pukllaqkuna perdiyanqan qellëta ganëta munayan. Bibliachöqa kënömi nimantsik: “Ama pï nunapis biennimpaq kaqllata ashitsuntsu, sinöqa wakimpa biennimpaq kaqta ashitsun” (1 Corintius 10:24). Chunka Mandamientukunapita juk kaqmi kënö nin: “Manam nuna mayikikunapa [...] imantapis munapäyänëkitsu” (Exodu 20:17). Imëkanöpa ganëta munaqkunaqa, jukkunapa qellëninwan quedakuyänampaqmi perdiyänanta munayan.

Tsënöllam Bibliachöqa cläru nimantsik, imatapis tarinapaq yanapakoq podertanö suertita mana rikänapaq. Israelïtakunapa tiempunchöpis, wakinqa Teyta Diosman mana markäkurmi o yärakurmi, “Suertita Apamoq” santuta adorar qallëkuyarqan. Tsëta rurayanqanqa, ¿alliku Teyta Diospaq karqan? Pëqa kënömi nirqan: “Rikënïchö mana allikunata y melananqäkunatam [...] rurayarqëki” (Isaïas 65:11, 12).

Wakin nacionchöqa tsë pukllakunata ruratsir ganayanqan wakin qellëwanmi, educacion asuntuchö y qellë asuntuchö nunakunata yanapayan. Peru tsë qellëta imanö utilizäyanqanqa, manam cambiantsu imatapis ërayëpa munar, kikinkunallaman yarpar o imatapis mana gastarlla tariyanqantaqa.

“Manam nuna mayikikunapa [...] imantapis munapäyänëkitsu” (Exodu 20:17).

BIBLIACHÖ NINQAN.

Bibliachöqa clärum kënö nin: “Imëkanöpa rïcu këta munaqkunaqa, tentacionman y trampaman, y juiciunnaq y mana allita rurakoq munëkunamanmi ishkiyan, y tsëkunam mana allikunaman y ushakëman chätsin” (1 Timoteu 6:9). Nunakunaqa imatapis ërayëpa munarmi qellëpaq pukllayan. Peru imatapis ërayëpa munë alläpa mana alli kaptinmi, Diospa Palabranqa tsëpita imëkanöpa cuidakunapaq nimantsik (Efesius 5:3).

Tsëta pukllaqkuna qellëta fäcil tariyaptinmi, tsë pukllakunaqa nunakunata “qellëta” kuyatsin. Y Bibliachömi cläru nimantsik, qellëta kuyëqa ‘imëka mana allikunaman chätsikunqanta’. Mas qellëyoq këta munarmi, wakinkunaqa qellëllapaq yarparäkuyan. Tsëmi alläpa llakikuywan sufriyan, y manam Teyta Diosmampis markäkuyannatsu o yärakuyannatsu. Bibliachömi nimantsik imatapis ërayëpa munaqkunaqa, ‘imëka sufrimientukunata pasayanqanta’ (1 Timoteu 6:10).

Imatapis ërayëpa munaqkunaqa, manam kayäpunqan qellëwan conformakuyantsu ni kushishqatsu kayan. Eclesiastes 5:10 textuchömi kënö nin: “Qellëllapaq löcuyäkoq nunaqa, manam tarinqan qellëwan conformakuntsu, tsënöllam imëkayoq këllaman yarparäkoq nunapis, tarinqan cösaskunawan conformakuntsu”.

Qellëpaq pukllaq mëtsikaq nunakunam, kananqa dejëta puëdiyantsu. Qellëpaq pukllallachö kakoqkunaqa, Estädus Unïdusllachömi mëtsika kayan.

Proverbius 20:21 ninqanmi yachatsimantsik, imatapis ërayëpa munaqkunaqa, rïcu tikrarpis, Diospa bendicionninta mana tariyanqanta. Manam tsëllatsu, qellëpaq pukllallachö kakoqkunaqa, höraqa jaqam tikrayan, mana allichömi ushayan y amïgunkunata, trabäjunkunata y familiankunatam dejayan. Bibliachö consëjukunata cäsukunqantsikmi, tsëkunapita cuidakunapaq yanapamantsik.

“Imëkanöpa rïcu këta munaqkunaqa, tentacionman y trampaman, y juiciunnaq y mana allita rurakoq munëkunamanmi ishkiyan, y tsëkunam mana allikunaman y ushakëman chätsin” (1 Timoteu 6:9).