Rurëta munanqantsikkunaqa manam juk yarpëllatsu kayan. Tsëkunata ruranapaqqa alliran kallpachakunantsik y imëkataran patsätsipakunantsik.

Wakintaqa junaqkuna pasaptinran rurantsik, wakintanam killakuna y wakintanam watakuna pasaptinraq. Y watakunaraq pasanan kaptinqa, imata karpis tsëyaqqa rurëkänantsikmi.

Musyankim imata ruranëkipaq kaqta, alli amïgukunayoqmi kanki y mas kushishqam kanki.

Musyankim imata ruranëkipaq kaqta. Ichik rurëta munanqëkikunata ruranëkipaq kallpachakurqa, mas jatusaq rurëkunatam ruranki. Tsëkunata ruranqëkiqa mana allikunapa pasaptikipis, alli tsarakunëkipaqmi yanapashunki.

Alli amïgukunayoqmi kanki. Llapantsiktam gustamantsik amïguntsikkunaqa imatapis rurayänampaq churapakäyanqanta rurayaptin. Tsëmi amïguntsikkunawan imatapis juntu rurashqaqa mas alli amïgu kashun.

Mas kushishqam kanki. Imatapis ruranëkipaq churapakanqëkita cumplirqa mas kushishqam kanki.

Cristofermi nin: “Rurëta munanqantsikta ruranapaq churapakarqa, imëkatam rurapakuyta puëdintsik. Imatapis rurëta munanqantsikta rurarirqa, ¡alläpam kushikuntsik!”.

BIBLIACHÖ YACHAKUNQANTSIK: “Lamar lädupita pukutë juntamuptinqa musyantsikmi manaraq cosechanantsikpaq kashqanta” (Eclesiastes 11:4).

Munanqëkita ruranëkipaqqa këkunam yanapashunki:

Ruranëkipaq kaqkunata akrë. Llapan rurëta munanqëkikunata qellqë, y tsëpitana ichikllapa ichikllapa rurëta procurë.

¿Imanötan rurankiman? Këkunam yanapashunki:

• Imë ushanëkipaq kaqta alli patsätsi.

• Imanö ruranëkipaq kaqta qellqë.

• Imapis pasakuptin, imata ruranëkipaq kaqta alistakuy.

Rurar qallë. Manam llapan imata ruranëkipaq kaqtaraqtsu musyanëki. Puntataqa imata ruranëkipaq kaqta rikë y rurë. Imakunata rurashqana kanqëkita rikanqëkim yanapashunki.

BIBLIACHÖ YACHAKUNQANTSIK: “Imatapis shumaq yarpakachëkur rurarninqa allim yarqupakunqa” (Proverbius 21:5).